​ဖံ​ဖံ​အဲ​မၣ်

ပှၤသးပှၢ်တဲစိၤဘၣ်ဃးဒီးတၢ်လီၢ်တၢ်ကျဲတဘျုးပူၤအကျါပၣ်ဃုာ်ဒီးတၢ်ဂ့ၢ်တၢ်ကျိၤလၢအတဲဖျါထီၣ်၀ဲပှၤကညီ
လၢပျၢၤသ့ၣ်တဖၣ်အတၢ်သံတၢ်ပှၢ်, တၢ်ဟါမူၤဟါမၢ်ဒီးတၢ်ဆူးတၢ်ဆါစှၤအဃိအသးသမူထီမးလီၤ.
လၢအပူၤကွံာ်,ပှဲၤနံၣ်ပှဲၤလါန့ၣ်ပတသ့ၣ်ညါဘၣ်.ပှၤသးပှၢ်တဲစိၤ၀ဲတၢ်မၤအသးတဘျီလၢတီအူတကပၤန့ၣ်
လီၤ.ထံကျိအိၣ်၀ဲတဘိတၢ်ကိးအမံၤလၢမုၣ်ကမဲကျိ(ပယီၤကိးလၢမုဆိုးမေချာင်း),အိၣ်တုၤခဲကနံၣ်အံၤန့ၣ်လီၤ.

ဖဲန့ၣ် တၢ်စံၣ်ဃဲၤ၀ဲလၢပှၤမုၣ်ကမဲတဂၤဟဲက့ၤလၢကစၢၢ်ဒိၣ်(သံဖီထီၣ်),လၢညါပှၤအိၣ်ဖဲကစၢၢ်ဒိၣ်အါအါဂီၢ်ဂီၢ်, တဆူးတဆါတဟါမူၤဟါမၢ်ဒီးတသံတပှၢ်နီတဂၤဘၣ်.တနံၤတခီၣ်ပှၤသ၀ီဖိဂီၢ်မုၢ်သ့ၣ်တဖၣ်အဲၣ်ဒိးမၤလုၢ်အုၣ်
ထါလၢတၢ်သံတၢ်ပှၢ်အဂီၢ်အဃိဖီၣ်န့ၢ်သၣ်မံယီၤတဒု, မၤသံ၀ဲဒီးဘိၣ်ထီၣ်၀ဲလၢချီၣ်ဒီးမၤလုၢ်အုၣ်ထါ
လၢတၢ်သံအဂီၢ်အဃိ,ပှၤသံပှၤဟါမၢ်လၢာ်အိၣ်တ့ၢ်ဒၣ်ထဲပှၤမုၣ်ကမဲတဂၤဧိၤဒီးအ၀ဲအိၣ်ဖဲကစၢၢ်ဒိၣ်တဘူၣ်
လၢၤဘၣ်.မ့မ့ၢ်ဃ့ၢ်ထီၣ်၀ဲဆူမုၢ်ထီၣ်ကလံၤစိးတခီဆူထံကျိတဘိအစိးခံလၢအမ့ၢ်ဒ့လိာ်အဒ့တဒ့,ဒီးဖဲန့ၣ်အိၣ်
ဖျဲၣ်အဖိခွါတဂၤဒီးလၢခံကဲထီၣ်က့ၤသ၀ီဖိတဖျၢၣ်လီၤ.မ့ၢ်လၢမုၣ်ကမဲအ၀ဲန့ၣ်လဲၤအိၣ်ဆိးဖဲန့ၣ်အဆိကတၢၢ်
အဃိသ၀ီန့ၣ်တၢ်ကိးအီၤလၢမုၣ်ကမဲသ၀ီဒီးထံကျိတခီမုၣ်ကမဲကျိတုၤခဲကနံၣ်အံၤလီၤ.
 
ခံတီၤတတီၤပကထံၣ်ဘၣ်လၢ,၀့ၢ်တီအူအမုၢ်ထီၣ်ကယံၤခံမံၤလာ်ဖဲပသံၣ်ခၠီဒီးပ့ၣ်လ့ၣ်ခံဒၢကါအဘၢၣ်စၢၤန့ၣ်
လီၤ.ဖဲန့ၣ်ထံကျိအိၣ်၀ဲတဘိဒီးအကၢၢ်ခိၣ်န့ၣ်သ၀ီဖးဒိၣ်လၢပျၢၤအိၣ်၀ဲတဖျၢၣ်တၢ်ကိးအီၤလၢဘီမုၢ်ဒၢန့ၣ်လီၤ.
တၢ်စံး၀ဲလၢသ၀ီဘီမုၢ်ဒၢအ၀ဲအံၤအပူၤပှၤတဆူးတဆါတသံတဟါမၢ်ဘၣ်နီတစုနီတဂၤဘၣ်.ဒီးပှၤအါထီၣ်ဂီၢ်
ထီၣ်ရးမးလီၤ.မ့မ့ၢ်သ၀ီအဂၤလၢအအိၣ်၀းတရံးအီၤတဖၣ်တခီတၢ်သံတၢ်ပှၢ်အိၣ်၀ဲဒီးပှၤညီနုၢ်ကွဲအ၀ဲသ့ၣ်လၢ
ကလဲၤမၤလုၢ်အုၣ်ထါဆူပှၤဒူပှၤသ၀ီဒီးတၢ်မုာ်ဘၣ်အ၀ဲသ့ၣ်လၢာ်သးလီၤ.လၢအသ၀ီဒၣ်၀ဲတခီတၢ်သံတၢ်ပှၢ်
တအိၣ်ဘၣ်,အဃိထီဘိကအုကစွါဒီးကိးထီၣ်၀ဲဒ်သိးကမၤလုၢ်အုၣ်ထါဘၣ်၀ဲအဂီၢ်လီၤ.လၢတၢ်သးခုလၢတၢ်သံ
အပူၤတလၢကွံာ်အခၢးဒီးအိၣ်တသ့တဘၣ်အပူၤ,အ၀ဲသ့ၣ်လဲၤမၤန့ၢ်ညၣ်ဖးဒိၣ်တဘိလၢထံကျိပူၤဒီးဟဲက့ၤ
စိာ်၀ဲဆူသ၀ီပူၤ, မၤန့ၢ်၀ဲအဆ့ဒုးကၤထီၣ်၀ဲ၀ံၤဘိၣ်ထီၣ်၀ဲဒီးလဲၤပာ်၀ဲလၢဘျီၣ်ပူၤ, ဒီးကွဲပှၤသ၀ီဖိလၢသ၀ီအ
ဂၤတဖၣ်လၢကဟဲမၤလုၢ်အုၣ်ထါစံၣ်ကျံၣ်အူမီနွံနံၤနွံနၤဃုာ်ဒီးအ၀ဲသ့ၣ်န့ၣ်လီၤ.နွံနံၤနွံနၤပှဲၤထီၣ်ဒီးလဲၤခူၣ်
လီၤဘါဘၢကွံာ်၀ဲလီၤ.အန့ၣ်တဘျီဃီတၢ်ဆူးတၢ်ဆါတၢ်သံတၢ်ပှၢ်အိၣ်ထီၣ်လၢသ၀ီဖးဒိၣ်တဖျၢၣ်အံၤအပူၤတုၤ
ဒၣ်လဲာ်ပှၤမၤလုၢ်အုၣ်ထါတကဲတချုးလၢၤဘၣ်.ထဲပှၤခူၣ်လီၤပှၤသံဒၣ်လဲာ်ပှၤဖီအီၣ်တ့ၤအီၣ်တချုးတဒးသ
တးဒီးပှၤမူဒံးသ့ၣ်တဖၣ်ဃ့ၢ်မှံဟးဖျိးကွံာ်ခဲလၢာ်ဆူသ၀ီအဂၤတဖၣ်န့ၣ်လီၤ.တၢ်စံး၀ဲလၢဖဲသ၀ီန့ၣ်အကပၤထံ
ကျိဖိတဘိန့ၣ်အလၢၢ်အိပူၤလ့အိပူၤလၢညါခရံာ်အနံၣ်၁၉၀၀အပူၤအတ့ၤပှၤထံၣ်ဒံးကတံၤဖးဒိၣ်တဘျုးဖျၢၣ်
လၢအမ့ၢ်ပှၤလၢညါလၢအတချုးသံဒံးတဖၣ်အတၢ်ဖိတၢ် လံၤလီၤ.မ့မ့ၢ်ခဲအံၤထံကျိစိာ်လီၤမဲးဧိၤဟီၣ်ဧိၤ, တၢ်
လ့ၣ်တၢ်ဒ့ဒီးလုာ်ဘၢကွံာ်လၢၢ်ပူၤလ့ပူၤဒီးကတံၤတဖၣ်ပှၤတထံၣ်က့ၤလၢၤဘၣ်.
 
သၢတီၤတတီၤပကထံၣ်ဘၣ်ဖဲတီအူတၢ်ပၢအပူၤသၣ်တီၣ်အမုၢ်ထီၣ်ကလံၤထံးသ၀ီသ့ၣ်ယၣ်ယူၢ်န့ၣ်လီၤ.ပှၤသး
ပှၢ်တဲစိၤ၀ဲ,လၢပျၢၤဖဲသ၀ီအ၀ဲန့ၣ်အပူၤတၢ်ဆူးတၢ်ဆါတၢ်သံတၢ်ပှၢ်တအိၣ်ဘၣ်,ပှၤအါထီၣ်ဂီၢ်ထီၣ်,အိၣ်ထဲတၢ်
မုာ်တၢ်ခုၣ်တၢ်ဃူတၢ်ဖိးန့ၣ်လီၤ.တနံၤတခီၣ်သးပှၢ်တဂၤလဲၤဟးဆူပှၢ်လၢ်ကျါဒီးခးလီၤတဲာ်န့ၢ်ကတံၣ်တဒုဟဲ
က့ၤစိာ်၀ဲလၢဟံၣ်ဒီးမၢအဖိခွါဃိလၢမ့ၣ်အူလီၤ.မ့မ့ၢ်အဖိခွါတခီဒုးကူထီၣ်သိးထီၣ်ကတံၣ်လၢနံၣ်လၢဆ့ဒီးပှၤသ
၀ီဖိမၤလုၢ်အုၣ်ထါ,စံၣ်ကျံၣ်အူမီနွံနံၤနွံသီပှဲၤထီၣ်ဒီးလဲၤခူၣ်လီၤဘါလီၤကွံာ်၀ဲလီၤ.မၤ၀ဲဒ်န့ၣ်၀ံၤသ၀ီဒီတသ၀ီ
ဟီၣ်ခိၣ်ယူၢ်လီၤကွံာ်အီၤကယီကယီန့ၣ်လီၤ.ဖဲဟီၣ်ခိၣ်ယူၢ်လီၤကွံာ်သ၀ီကဖီလီဖိအခါပှၤမိၢ်ဒၢတဂၤလဲၤထီၣ်
ဟးလၢဟံၣ်ချၢဒ်သိးကလဲၤကွၢ်က့ၤအဘုလၢအလိလီၤ၀ဲ,ဒီးထံၣ်လၢဟံၣ်ချၢဃူလိာ်အသးဒီးဟီၣ်ခိၣ်ဒီးဖဲန့ၣ်အ
၀ဲသ့ၣ်ညါ၀ဲလၢအဟံၣ်လီၤတသုးလံအဃိခါလီၤ၀ဲဆူဟီၣ်ခိၣ်အလိၤဒီးဃ့ၢ်ကွံာ်၀ဲတကီၢ်ခါလီၤ.

သ၀ီဒီတဖျၢၣ်နုာ်လီၤဆူဟီၣ်ခိၣ်ပူၤဒီးပူၤဖျဲး၀ဲထဲမုၣ်ပှၢ်တဂၤအံၤလီၤ.တၢ်လီၢ်တၢ်ကျဲအ၀ဲန့ၣ်တုၤခဲကနံၣ်အံၤ
ဟီၣ်ခိၣ်တပှဲၤထီၣ်က့ၤဒံးဘၣ်,မ့မ့ၢ်တၢ်လီၤဆၢၣ်ဒံးဖးယိာ်ညါလီၤ.တၢ်စံၣ်ဃဲၤတဲဃဲၤဒီးတၢ်လီၢ်တၢ်ကျဲသ့ၣ်တ
ဖၣ်အံၤအိၣ်၀ဲသပှၢ်ကတၢၢ်ဒီးဒုးသ့ၣ်ညါပှၤလၢပျၢၤန့ၣ်တၢ်ဆူးတၢ်ဆါတၢ်သံတၢ်ဟါမၢ်တအိၣ်ဘၣ်.မ့မ့ၢ်တခီ
လၢပှၤကညီတဖၣ်အတၢ်မိၣ်န့ၢ်သးလီဒီးအတၢ်လူၤဘၣ်အသးလၢတၢ်မုာ်တၢ်လၤအပူၤအဃိကွဲန့ၢ်ကိးန့ၢ်က့ၤ
၀ဲတၢ်ဆူးတၢ်ဆါဒီးတၢ်သံတၢ်ဟါမၢ်တုၤအမၤက့ၤ၀ဲတနၢၤလၢၤဘၣ်န့ၣ်လီၤ.

ဟံး​န့ၢ်​အီၤ​လၢ​ပှၤ​က​ညီ​အ​လံာ်​ဖး​သၢ​တီၤ​လၢ​သ​ရၣ်​မိ​လိၤ​တီ​အူ​က​တဲာ်​က​တီၤ​ဝဲ