​ဖံ​ဖံ​အဲ​မၣ်

လၢပျၢၤပှၤဒီမိ၀ၤခံဂၤ,အိၣ်ဃုာ်၀ဲဒၣ်ထွဲဘၣ်ထွဲဘၣ်တုၤအဘၣ်မုၢ်ဘၣ်လါဒီးအမါတဂၤဆံးစၢ်ထီၣ်အဖိမုၣ်တဂၤ
ဒီးအပၢ်သံသဒၣ်ကွံာ်အီၤလီၤ.ဖိမုၣ်တဂၤအံၤယုၢ်န့ၢ်၀ဲအမံၤလၢနီၢ်ဘီယုၢ်ယ့ၤလီၤ.တုၤအသ့ဃ့ၢ်သ့ဟးသ့ထီၣ်
တစဲးဒီးအမိၢ်သံသဒၣ်ကဒီးအီၤဒီးအဖါတံၢ်စီၤပၤတဂၤကွၢ်လုၢ်ဖိက့ၤအီၤလီၤ.အဖါတံၢ်တခီမ့ၢ်လၢအတၢ်ဆိ
ကမိၣ်ဆိကမးတလၢတပှဲၤဘၣ်အဃိတအဲၣ်တကွံအီၤဘၣ်.တုၤအမုၣ်ကနီၤထီၣ်ဒီးအဖါတံၢ်စံးအီၤ,နအိၣ်ဒီး
ယၤအံၤမၤခုမၤဆှါနသးဒီးယကမၢပှၤဆးန့ၢ်နဆ့ကူယၣ်သိးလီၤ.ဖိသၣ်မုၣ်တဂၤအံၤတုၤအမုၣ်ကနီၤထီၣ်
နီၢ်နီၢ်တဘျီဒိၣ်တၢ်ဂ့ၤမးတုၤဖိၣ်သၣ်ခွါတဖၣ်ထံၣ်ဘၣ်အီၤဒီးတမဲာ်ဘၣ်သးစီၣ်အီၤန့ၣ်တအိၣ်နီတဂၤဘၣ်,
လဲၤအိၣ်သကိးအီၤကိးမုၢ်ဟါဒဲးလီၤ.ယံာ်ယံာ်ဒီးအဖါတံၢ်စံးအီၤ,ဖိဒိၣ်မုၣ်ဧၢ,နအိၣ်ဒီးယၤအံၤလၢာ်ဂီၤကသံၣ်
ဖိညါသူးဖိ,မ့ၣ်ဒၢဖၣ်ဒၢ,တရံးခိၣ်ဖးနးမးယတူၢ်တပှဲၤလၢၤဘၣ်.ဒီးအဖါတံၢ်ဟီထီၣ်ကွံာ်အီၤလီၤ.တၢ်အံၤမ့ၢ်ဒ်
ပှၤသးပှၢ်စံး၀ဲ,-

သ့ၣ်လၢအထီဘၣ်ကလံၤ
နီၢ်လၢအဂ့ၤဘၣ်တမှံၤ

နီၢ်ဘီယုၢ်ယ့ၤတဲဆၢက့ၤအဖါတံၢ်ဒီးစံး၀ဲဒၣ်,ယထီၣ်တစိၤလီၤတဃၣ်အံၤယတၢ်ဟဲ၀ံဟဲစိာ်တမုာ်တဂ့ၤစ့ၢ်ကီး
ဘၣ်.ယမ့ၢ်ပိာ်မုၣ်ယမ့ၢ်ပိာ်မၢၤဟးတသ့ဟးတဘၣ်ဘၣ်.နဟီဃ့ၢ်ဟီဟးယၤအံၤမ့ၢ်တၢ်ကီလၢယဂီၢ်ဒိၣ်မးလီၤ.
အဖါတံၢ်တခီတုၤအနၢ်ဟူအဖိဒိၣ်မုၣ်ကတိၤတၢ်ဒ်န့ၣ်ဒီးအသးထီၣ်တဘျီဃီ,ထူလီၤတဲာ်ကွံာ်အီၤလၢဟံၣ်ပူၤ
ဒီးသံတယူာ်ဘီတကျာ်ဘၣ်အသးတစိၢ်တပနာ်ညါလီၤ.တုၤအပၢၢ်ထီၣ်က့ၤလၢခိဒီးဂဲၤဆၢထၢၣ်ဟးကွံာ်၀ဲစု
ယၢ်ခီဒီးအဆ့ဖိတဘ့ၣ်လၢအလိၤလၢတၢ်မဲာ်ထံမဲာ်နိအပူၤလီၤ.တုၤနုၤတစုလဲၤလဲၤ၀ဲဒၣ်ထဲတဂၤဧိၤတုၤလၢ
ပှၢ်မုၢ်ကနၢပူၤသ့ၣ်ဃံၣ်တြတီၤမံတသီသီ,လဲၤကဒီးဆူပှၢ်မုၢ်ကနၢဒီယာ်ြတၤ,ဘီၣ်သိၣ်ကျါတၤက၀ဲၤကျါ,သံလၢ်
မူလၢ်တစးလၢၤ၀ဲဘၣ်.ယံာ်ယံာ်ဒီးထံၣ်လိာ်အသးဒီးအသကိးပိာ်မုၣ်တဂၤသိးဆ့၀ါဒ်အီၤအသိးလီၤ.

အ၀ဲသ့ၣ်ထံၣ်လိာ်အသးဒီးသံကွၢ်လိာ်အသး,ခွါမုၣ်ဧၢ,နဟဲလၢပှၢ်မုၢ်ကနၢဘီၣ်သိၣ်တၤက၀ဲၤကျါအံၤမ့ၢ်နတ
သူၣ်ပျံၤသးပျံၤတၢ်ဘၣ်ဧါ.အသကိးတဂၤတဲဆၢအီၤ,နသံကွၢ်ယၤတၢ်ဒီးယကတဲနၤကနၣ်ကွၢ်တဘီ,ယဲဒၣ်အံၤ
ယမိၢ်ဆံးစၢ်ယၤတသီခံသီ၀ံၤယပၢ်သံသဒၣ်ယၤလီၤ.လၢခံတယံာ်တမီၢ်ဘၣ်ဒီးယမိၢ်သံသဒၣ်ယၤကဒီးလီၤ.ယ
အိၣ်ဒီးယဖါတံၢ်စီၤပၤတဂၤဒီးအ၀ဲဒၣ်မ့ၢ်လၢအတၢ်ဆိကမိၣ်ဆိကမးတလၢတပှဲၤဘၣ်အဃိမၤအၢမၤနးယၤ
ဒိၣ်မးလီၤ.ယပုၢ်တအိၣ်နီတဂၤ,ယ၀ဲၢ်တအိၣ်နီတဂၤ,ယဖါတံၢ်စီၤပၤန့ၣ်တီၢ်ယၤတဘျီဆါတဘျီဆါယတူၢ်တ
န့ၢ်ခီၣ်တကဲလၢၤဘၣ်သတးဒီးယဘၣ်ဟးယဲဆူအံၤဆူဘးဒီးယထံၣ်လိာ်ဃိာ်လိာ်ယသးဒီးနၤခဲအံၤလီၤ.ဒီးနဲ
ဒၣ်စ့ၢ်ကီးတဲလီၤနဂ့ၢ်နကျိၤတက့ၢ်မီၣ်ခွါမုၣ်ဧၢ,ဒီးအသကိးမုၣ်တဂၤစးထီၣ်တဲကဒီး၀ဲ၀ံၤဒီးစံး၀ဲဒၣ်,နၤဒီးယၤ
အံၤပဘၣ်တၢ်တတၢၢ်တနါဒ်သိးသိးဒီးပတဲအလီၢ်တအိၣ်လၢၤဘၣ်လီၤ.တဘျီအံၤန့ၢ်လိာ်အသးခံဂၤလဲၤကဒီး
ဆူညါယံာ်ယံာ်ဒီးတုၤကဒီးလၢစီၤပၤခိၣ်ဒိၣ်နိးထီ,နၢၤခ့နၢၤပှၤ,စံးပှဲၤကတိၤပှဲၤ,သူၣ်လဲၢ်သးလဲၢ်တဂၤအဟံၣ်
ဂီၤထံးဒီးဆၢထၢၣ်အိၣ်လၢတၢ်ကိၢ်ကျါ,လၢစီၤပၤအနူၢ်မဲာ်ညါ,ပျံၤတၢ်ကနိးကစုာ်မးရၤရၤဒီးသၣ်၀ံၤစ့ၢ်ကီးမ့ၤ
ဒိၣ်မးလီၤ.စီၤပၤအဖိမုၣ်တဂၤထံၣ်လီၤအ၀ဲသ့ၣ်ဒီးက့ၤတဲဘၣ်အပၢ်လၢအထံၣ်ပှၤပိာ်မုၣ်ခံဂၤလၢနူၢ်မဲာ်ညါန့ၣ်
သတးဒီးအပၢ်ဒူအဖိမုၣ်အလိၤဒီးစံး၀ဲ, နထံၣ်ပှၤတမှံၤတပျီၤဟဲတုၤလၢဟံၣ်လၢဃီဒီးဘၣ်မနုၤလၢနတကိး
ထီၣ်ဆူဟံၣ်ပူၤဃီပူၤလဲၣ်.နဒုးအိၣ်အီၤလၢတၢ်ကိၢ်ကျါ,တၢ်ဘှံးအသးဒီးတၢ်သၣ်၀ံၤအသးလီၤ.ပှၤမ့ၢ်သံလၢပ
ဟံၣ်ခီၣ်ထံးဃီခီၣ်ထံးတဂ့ၤဘၣ်.ပှၤဒီခူပကွၢ်ကဲ,ပှၤဒီ၀့ၢ်ပကွၢ်ကဲမ့ၢ်သံတဂ့ၤဘၣ်.လဲၤဃီၤသံကွၢ်,ကိးလိာ်သု
သး,ထုးထီၣ်ဟ့ၣ်အီၤသုကူသုသိးဒီးဒုးကူဒုးသိးအီၤတက့ၢ်.တုၤနုၤတစုစီၤပၤအဖိမုၣ်လဲၤကိးထီၣ်ဖိသၣ်မုၣ်ခံ
ဂၤန့ၣ်,ထုးထီၣ်တၢ်ကူတၢ်သိးဒီးဟ့ၣ်ဒုးကူဒုးသိး၀ဲလီၤ.ဖိသၣ်မုၣ်ခံဂၤန့ၣ်ကူတဘူၣ်ဘၣ်,ဒီးတုၤစီၤပၤအဖိမုၣ်
တဖၣ်စံးအီၤလၢ,ပဟ့ၣ်ဒုးကူဒုးသိးသုလၢသုကသိးအဂီၢ်လီၤ.အလုၢ်အပှ့ၤန့ၣ်ပတစံးဘၣ်.ဒီးပိာ်မုၣ်ခံဂၤန့ၣ်လဲ
က့ၤအကူအသိး,၀ံၤဒီးပှၤခွဲးလီၤန့ၢ်အမ့ၤအထံဒီးပှၤဒုးအီၣ်ဒုးအီအ၀ဲသ့ၣ်လၢမ့ၤလီၤ.စီၤပၤတခီတုၤအထံၣ်
ဘၣ်ဖိသၣ်မုၣ်ခံဂၤန့ၣ်လီၤဆီဘၣ်အမဲာ်ဒီးဆိကမိၣ်၀ဲလၢအသးကံၢ်ပူၤ,ပှၤခံဂၤအံၤဒိၣ်တၢ်ဂ့ၤမးလီၤ.

မ့ၢ်အဟဲတၢ်ဂ့ၢ်ဒ်လဲၣ်ဒ်လဲၣ်န့ၣ်တၢ်မိၣ်သ့ၣ်ညါဘၣ်အသးသတးဒီးကိးဃီၤအဖိမုၣ်ဒီးမၢအဖိမုၣ်ကိးန့ၢ်အီၤဖိ
သၣ်မုၣ်ခံဂၤန့ၣ်လၢကဟဲဆူအအိၣ်လီၤ.တုၤအ၀ဲသ့ၣ်ဟဲဆူစီၤပၤအဂီၤထံးဒီးစီၤပၤသ့ၣ်ညါတဘျီဃီလၢပှၤခံ
ဂၤအံၤမ့ၢ်မးပှၤလၢအအိၣ်ဖျဲၣ်ထီၣ်လၢပှၤတူၢ်ဒိၣ်ကီၤဒိၣ်အကျါလီၤ.မ့ၢ်လၢအဒုးနဲၣ်ဖျါထီၣ်အတၢ်သံၣ်စူးလၢသူၣ်
က့သးပှၢ်တဖၣ်အမဲာ်ညါသ့သ့ဘၣ်ဘၣ်ဃံဃံလၤလၤအဃိလီၤ.စီၤပၤသံကွၢ်အ၀ဲသ့ၣ်ဒီးစံး၀ဲဒၣ်,ဖိဒိၣ်မုၣ်သ့ၣ်
ဧၢ,လၢခံလၢပျၢၤလၢဂံၢ်လၢနီၢ်ယတထံၣ်သုနီတဘျီဘၣ်.မ့ၢ်သုဘၣ်တၢ်တတၢာ်တနါတပူၤပူၤဧါ.သုတဲကွၢ်ဖါတံၢ်
တဘီဧဲၢ်.ဖိသၣ်မုၣ်စံးဆၢအီၤ,ဖါတံၢ်ဧၢ,ယကတဲယုၤနၤလီၤ.ပ၀ဲခံဂၤအံၤပဂ့ၢ်ပကျိၤတလီၤဆီလိာ်အသးဘၣ်.
ပဘၣ်ကိၢ်ဘၣ်ဂီၤဘၣ်နးဘၣ်ဖှီၣ်ဒ်သိးသိးလီၤ.ပအိၣ်လၢပဖါတံၢ်အသိးဒီးမၤနၢၤအီၣ်ဃီၣ်ပှၤ,၀့ၤပဒူတီၢ်ပစိာ်ပှၤ,
ဒီးဟီဃ့ၢ်ဟီဟးကွံာ်ပှၤလီၤ.ပသးအုးဘၣ်ဆၣ်ပမၤတသ့ဘၣ်.ပဘၣ်ဟးထီၣ်ကွံာ်လၢဟီၣ်လၢယၢၤလၢအဟံၣ်
အဃီဆူပှၢ်မုၢ်သီထိ,ဘီၣ်သိၣ်ကျါတၤက၀ဲၤကျါ,သ့ၣ်ဃံၣ်တြတီၤမံတသီသီ,လွဲၤဒီးလွဲၤတံးတံးတုၤလၢနအိၣ်ခဲ
အံၤလီၤ.

တုၤစီၤပၤနၢ်ဟူလၢဖိသၣ်မုၣ်ခံဂၤတဲလီၤအဂ့ၢ်အကျိၤ၀ံၤဒီးစီၤပၤစံးအီၤ,သုတဲလီၤသုသးနးတုၤချုးလီၤ.အိၣ်
လၢဖါတံၢ်အသိးတက့ၢ်.တၢ်ကိၢ်တၢ်ဂီၤအကျါန့ၣ်သုတဘၣ်မၤတၢ်ဘၣ်,သုတဘၣ်လဲၤသူၣ်ဘုဖျးဘု,ပဲာ်ခုးဖဲး
သံၣ်ဘၣ်,အိၣ်လၢဟံၣ်ဆုအီၣ်ဘုယီၢ်အီၣ်ဘု,ဖီအီၣ်တ့ၤအီၣ်ဒီးတမှံၤထီၣ်တမှံၤလီၤမၤစၢၤအီၣ်စၢၤတက့ၢ်. စီၤပၤတဂၤအံၤအဖိမုၣ်အိၣ်နွံဂၤလီၤ.တနံၣ်တနံၣ်ပှ့ၤန့ၢ်၀ဲအဆ့ကူယၣ်သိး,တနံၣ်ဘၣ်တနံၣ်ပှ့ၤန့ၢ်၀ဲအဆ့ကူ
ယၣ်သိး,တၢ်ကယၢကယဲလၢာ်စ့တဂၤတပီၢ်တပီၢ်လီၤ.ဒီးစံး၀ဲ,ဒ်ယပှ့ၤန့ၢ်ယဖိမုၣ်အတၢ်အသိး,ယဖိမုၣ်အီၣ်ဘၣ်
အသိးယကပှ့ၤန့ၢ်စ့ၢ်ကီးသု,ယကဒုးအီၣ်ဒုးအီသု,ဒီးယကပာ်ကဲသုဒ်ယဖိတံၢ်နီၢ်အသိးလီၤ.ဘၣ်ယိၣ်တၢ်နီတ
မံၤတဂ့ၤ.ဒီးဖိသၣ်မုၣ်ခံဂၤန့ၣ်စံးဆၢအီၤ,ဖါတံၢ်ဧၢ,ပတဖံးဘၣ်မၤဘၣ်,ပတလဲၤဘၣ်က့ၤဘၣ်လၢတၢ်ကိၢ်တၢ်ဂီၤ
အကျါ,ပဘၣ်အိၣ်လၢဒၢးခိၣ်လီၢ်ပူၤဂ့ၤဒိၣ်မးလီၤ.ဒီးစီၤပၤတဲကဒီးတၢ်ဒီးစံး၀ဲ,အၢၣ်,အိၣ်ဒီးယၤတက့ၢ်.သုမ့ၢ်အိၣ်
ဒီးယၤဂ့ၤဒိၣ်မးလီၤ.ပမ့ၢ်ကွၢ်လုၢ်က့ၤပှၤဖိၣ်ဃဲဆဲခိၣ်,ကဟုကယာ်က့ၤအီၤဂ့ၤဂ့ၤဘၣ်ဘၣ်ဒီးခဲကိာ်တဃၣ်န့ၣ်
ပကဘၣ်ဘျုးဘၣ်ဖှိၣ်ကန့ၢ်ဘူၣ်န့ၢ်တီၢ်လီၤ.ဒီးပိာ်မုၣ်ခံဂၤန့ၣ်အိၣ်၀ဲဒီးစီၤပၤလီၤ.ဖဲအဘူးအတံၢ်န့ၣ်၀့ၢ်အိၣ်၀ဲတ
ဖျၢၣ်ဒီးပိာ်ခွါဖိၣ်ဃဲအိၣ်တဂၤစ့ၢ်ကီးလီၤ.အခိၣ်သူခိၣ်လၣ်ဂ့ၤ,ဒိၣ်တၢ်က့ၢ်ဘၣ်ဂီၤဘၣ်ဂ့ၤမး,အိၣ်ဒီးတၢ်ကူၣ်တၢ်
ဆးလၢလၢပှဲၤပှဲၤ,အမိၢ်အပၢ်သံသဒၣ်အီၤဖဲအသ့ဃ့ၢ်သ့ဟးန့ၣ်စ့ၢ်ကီးလီၤ.အ၀ဲလဲၤအိၣ်ဒီးအဖါတံၢ်စီၤပၤတဂၤ
န့ၣ်,အတၢ်ကွၢ်လုၢ်ဖိက့ၤအီၤဒ်အဖိအသိးလီၤ.အိၣ်၀ဲဒီးအဖါတံၢ်တုၤအဖိၣ်သၣ်ခွါထီၣ်ဒီးသ့ဖံးသ့မၤ,သ့ကူၣ်
သ့ကၤသတးဒီးအဖါတံၢ်စီၤပၤဟ့ၣ်အီၤကဆီသၢဒု,ပနၢ်တကရၢဒီးစံာ်သၢလီၢ်လီၤ.စံာ်တလီၢ်တလီၢ်န့ၢ်ဘု
တကထိလီၤ.အဖါတံၢ်စံးအီၤ,ဖိဒိၣ်ခွါဧၢနအိၣ်ဒီးယၤလၢနနီၢ်ဆံးသးစၢ်,နမ့ၢ်ပိာ်ခွါလၢအသူၣ်ဘၣ်သးသ့,အဲၣ်မူ
အဲၣ်သကိးလၢပှဲၤဒီးတၢ်ကူၣ်တၢ်ဆးတၢ်သ့ၣ်ညါနၢ်ပၢၢ်လီၤ.ယဟ့ၣ်နၤတၢ်သ့ၣ်တဖၣ်အံၤမ့ၢ်အလၢပှဲၤစ့ၢ်ကီးဧါ.

ဖိၣ်ဃဲန့ၣ်စံးဆၢအီၤ,နပါ်ယၤဒ်နဖိနလံၤအသိး,နအဲၣ်ယၤကွံယၤ,နဟ့ၣ်လီၤယၤတၢ်တဖၣ်အံၤလၢပှဲၤလၢယ
ဂီၢ်တကးဘၣ်,နသူၣ်ဘၣ်သးသ့,ဒီးနတၢ်ဆိကမိၣ်ဆိကမးတဒ်ပှၤဂၤအသိးဘၣ်.ယစံးဘျုးစံးဖှိၣ်နၤဒိၣ်မးလီၤ.
တုၤနုၤတစုဖိၣ်ဃဲတဂၤန့ၣ်ဟးထီၣ်မၤစံာ်ဒီးမၤသ့ၣ်ဧိၤ၀ၣ်ဧိၤဒီးတနံၣ်ဘၣ်တနံၣ်ပှ့ၤကဆီန့ၢ်အသီတဒုတဒု
ဒီးစံာ်တလီၢ်တလီၢ်လီၤ.ယံာ်ယံာ်ဒီးအခ့အပှၤအါထီၣ်အါထီၣ်ဒီးကဲထီၣ်စီၤပၤတဂၤစ့ၢ်ကီးလီၤ.ပှၤဟဲတလိၢ်
အီၤတဘျုးဂၤဘၣ်ဆၣ်တအဲၣ်၀ဲဘၣ်.အဖါတံၢ်စီၤပၤတခီတဘျီန့ၣ်ကွၢ်ဃီၤတၢ်ဒီးစံး၀ဲဒၣ်,ယဖိဒိၣ်တဂၤအံၤ
ြကၢးလၢယဃုန့ၢ်အမါတဂၤလံလီၤ.ဒီးလဲၤ၀ဲဆူအအိၣ်ဒီးစံးဘၣ်အီၤ, ဖိဒိၣ်ဧၢ, အဆၢကတီၢ်ဘၣ်စ့ၢ်ကီးလံ, နြကၢးအိၣ်ဒီးနဟံၣ်နဃီ,နလီၢ်နကျဲ,ဒီးဖါတံၢ်ကဃုန့ၢ်နမါလီၤ.မ့ၢ်အဘၣ်နသးစ့ၢ်ကီးဧါ.ဖိၣ်ဃဲန့ၣ်စံးဆၢအီၤ,
ယပာ်နၤဒ်ယမိၢ်ယပၢ်အသိးဒီးနကွၢ်ကဲက့ၤယၤတုၤခဲကနံၣ်အံၤလီၤ.ယတလုၣ်သ့ၣ်ခါပတာ်နတၢ်ကတိၤစ့ၢ်
ကီးဘၣ်,ဖဲဒၣ်နဆိကမိၣ်ြကၢးလၢယဂီၢ်န့ၣ်ဒီးကွၢ်ဖဲနသးလီၤ.အဖါတံၢ်တဲကဒီးအီၤ,ယမ့ၢ်စံးနၤလၢမၤတက့ၢ်
ဒီးတဂ့ၤစ့ၢ်ကီးဘၣ်.

မ့ၢ်တၢ်၀ံကအိၣ်လၢယလိၤဧါ.အဃိယတမၤစ့ၢ်ကီးဘၣ်.ကွၢ်လၢအဘၣ်နသးပိာ်မုၣ်တဂၤဂၤဒီးတဲဘၣ်ဖါတံၢ်တ
က့ၢ်.ဖါတံၢ်ကမၤန့ၢ်ဒၣ်နၤလီၤ.တဘျီန့ၣ်ဖိၣ်ဃဲတဂၤန့ၣ်တၢ်ကၢၣ်အသးဒီးလဲၤဟးလိာ်ကွဲဒီးလဲၤဘၣ်လၢစီၤ
ပၤတဂၤအဟံၣ်ဒီးထံၣ်လၢပိာ်မုၣ်ခံဂၤဘီယုၢ်ယ့ၤ,ဒီးအပုၢ်တဂၤန့ၣ်ဂ့ၤဘၣ်လၢအမဲာ်သတးဒီးတုၤအဟဲက့ၤ
ဆူအဟံၣ်ဒီးမံတန့ၢ်အီၣ်တ၀ံၣ်လၢၤဘၣ်.အသးန့ၣ်အိၣ်စဲထီဒၣ်လၢပိာ်မုၣ်တဂၤန့ၣ်အလိၤလီၤ.နာ်သက့တဲ
ဖျါထီၣ်၀ဲလၢအဖါတံၢ်န့ၣ်တဘူၣ်ဘၣ်,မ့ၢ်လၢအမဲာ်ဆှးအဃိလီၤ.တုၤအ၀ဲလဲၤဟးဘၣ်တဘျီဒီးအိၣ်တကဲလၢၤ
ဘၣ်.တဘျီအံၤလဲၤဟးအိၣ်သကိး၀ဲကိးမုၢ်ဟါဒဲး,တမိၣ်ဟဲက့ၤလၢၤအသးဘၣ်.တၢ်ထုးဃၢဘၣ်အီၤတဒိးကွဲ
ဘၣ်.လဲၤဟး၀ဲပှဲၤထီၣ်ယဲၢ်ဘျီဃုဘျီသတးဒီးစီၤပၤကွၢ်ဃီၤတဘျးတယး၀ဲလၢပိာ်ခွါအ၀ဲအံၤဘၣ်အသးလၢပိာ်
မုၣ်တဂၤန့ၣ်လီၤ.

တုၤပိာ်ခွါက့ၤလီၤဒီးသံကွၢ်အဖိဒိၣ်မုၣ်ခံဂၤန့ၣ်စံး၀ဲ,ပိာ်ခွါလၢအဟဲဟးအိၣ်သကိးသုန့ၣ်မ့ၢ်သုကွၢ်ဘၣ်သု
သးစ့ၢ်ကီးဧါ.သုကွၢ်မ့ၢ်ဂ့ၤဒီးတဲဘၣ်ဖါတံၢ်တက့ၢ်.ပိာ်မုၣ်ဖိခံဂၤတခီစံးဆၢအီၤ,ပကွၢ်ဂ့ၤ၀ဲသၢၣ်.ဘၣ်ဆၣ်ပတၢ်တ
အိၣ်တယၢၤနီတမံၤဘၣ်,မ့ၢ်အဲၣ်ပှၤဒီးဂ့ၤယၢာ်.အဖါတံၢ်တခီစံး,မ့မ့ၢ်ဒ်န့ၣ်ဒီးဂ့ၤလံ,ဖါတံၢ်ဘၣ်အသးစ့ၢ်ကီးလီၤ.
အဖိဒိၣ်မုၣ်တခီတဲကဒီး၀ဲ,ပှၤတအဲၣ်ပှၤဘၣ်,ပတၢ်တအိၣ်တယၢၤဘၣ်.ဒ်နသ့ၣ်ညါအသိးပ၀ဲဒၣ်ပဘၣ်ဟးလၢ
ဟီၣ်လၢယၢၤ, လၢမဲာ်ထံမဲာ်နိလီၤ.မ့ၢ်လၢနအံးက့ၤကွၢ်က့ၤပှၤအဃိပအိၣ်မုာ်အိၣ်ခုၣ်ဘၣ်က့ၤလီၤ.

တုၤနုၤတစုစီၤပၤလဲၤဃီၤတရံးဆူစီၤပၤဖိၣ်ဃဲအဖါတံၢ်တဂၤအအိၣ်ဒီးသံကွၢ်၀ဲဒၣ်,သိၣ်ဧၢ,တဲဘၣ်နဖိဒိၣ်ခွါ
န့ၣ်တက့ၢ်.ယဖိဒိၣ်မုၣ်ခံဂၤဒိၣ်တၢ်ဂ့ၤမးလီၤ.တလာ်အၢလာ်ဃးဘၣ်,ယဆိမိၣ်ြကၢးဒီးအီၤကစီဒီလီၤ. နတဲဒီးကွၢ်နဖိဒိၣ်ခွါန့ၣ်တဘီဧဲၢ်.စီၤပၤတဂၤန့ၣ်စံးဆၢအီၤ,အၢၣ်သိၣ်ဧၢ,ယဲယဖိဒိၣ်ခွါန့ၣ်ယမ့ၢ်တဲဒီးစူၢ်ယက
လုၢ်ကိးဘျီဒဲးလီၤ.တလဲၤပူၤယၤဘၣ်.ကတိၤလိာ်အသးခံဂၤန့ၣ်၀ံၤဒီးစီၤပၤတဂၤန့ၣ်ဟဲက့ၤဆူအဟံၣ်လီၤ.
တုၤနုၤတစုစီၤပၤမၢပှၤလဲၤကိးဖိၣ်ဃဲဒ်သိးအကအိၣ်သကိးအီၤလီၤ.ဖိၣ်ဃဲဟဲတုၤဒီးစံး၀ဲဒၣ်,အၣ်လါ,ဖါတံၢ်ဧၢ
နတကိးြကီယၤနီတဘျီဘၣ်.မ့ၢ်နကတဲစ့ၢ်မနုၤတမံၤလဲၣ်.ဒီးအဖါတံၢ်တဲအီၤ,ဖိဒိၣ်ဧၢ,တဘျီညါအံၤအဆၢက
တီၢ်ဘၣ်လံလၢနဒၢးနလီၢ်အိၣ်စ့ၢ်ကီးလီၤ.နမ့ၢ်အိၣ်ဒ်အံၤတဂ့ၤတ၀ၢ်ဘၣ်.

လီၤနံးလီၤကျံၤလၢနတန့ၢ်ဖိန့ၢ်မါဘၣ်န့ၣ်တအိၣ်စ့ၢ်ကီးဘၣ်.ဒီးပိာ်မုၣ်လၢနလဲၤအိၣ်သကိးအီၤမဟါန့ၣ်မ့ၢ်န
ကွၢ်ဂ့ၤစ့ၢ်ကီးဧါ.နသးတခီတအိၣ်စ့ၢ်ကီးဘၣ်,မ့ၢ်နကစူၢ်နဖါတံၢ်အကလုၢ်ဧါ.ပိာ်မုၣ်အဖါတံၢ်မ့ၢ်စံးလၢမၤဒီးမ့ၢ်န
ကစံးဒ်လဲၣ်.ဖိၣ်ဃဲတဲဆၢ,စကွၢ်သ့ယၢာ်,ကွၢ်ဖဲနကတဲလီၤ.ပိာ်မုၣ်န့ၣ်ညါလၢယမဲာ်ညါတအိၣ်ဘၣ်,လၢယလီၢ်ခံ
တခီလီၤ.ယဲယပာ်မိၢ်ပာ်ပၢ်လၢနၤလီၤ.နမ့ၢ်စံးလၢမၤဒီးဘၣ်မၤလီၤ.ဖဲန့ၣ်အဖါတံၢ်တဲဆၢကဒီးအီၤ,ဂ့ၤဒိၣ်မး
လီၤ.ဒီးအၢၣ်လီၤ၀ဲလီၤ.တုၤမ့ၢ်အန့ၣ်တဘျီစီၤပၤကိးဃီၤဖံတိၢ်နိဒီးမၢ၀ဲအတၢ်လဲၤတလိၢ်ပိာ်မုၣ်န့ၣ်လီၤ.တ
လိၢ်လဲၤဒီးဟဲက့ၤတဲ၀ဲလၢအကဲထီၣ်ကဲထီလံသတးဒီးမုၢ်ဆ့ၣ်ထီၣ်ပိာ်မုၣ်တခီပျိၣ်လီၤဘုဟုဒီးလိလီၤ,မၤပာ်
စၢၤဟုဘုၣ်ဟုသး,ဒိသံးဖီမ့ၤမုၢ်ဟါလီၤအီလီၤသံးမိၢ်ကနါ,အီၣ်ဃံးအီၣ်ဃီၣ်၀ဲ၀ံၤမုၢ်ဆ့ၣ်ထီၣ်ကဒီးတနံၤဒိသံ
ထိးဒိသံဆီဒီးအီၣ်၀ဲအမူးလီၤ.ပိာ်မုၣ်တခီအဖါတံၢ်လၢာ်စ့လွံၢ်ကယၤဘး,ဒီးပိာ်ခွါတခီအဖါတံၢ်လၢာ်စ့ယဲၢ်က
ယၤဘးလီၤ.တုၤအအီၣ်မူးအီၣ်ပွဲ၀ံၤမုၢ်ဟါလီၤဒီးလဲၤဆှၢနုာ်က့ၤ၀ဲဆူပိာ်မုၣ်အဒၢးဖိပူၤန့ၣ်လီၤ.ဒ်အလုၢ်အလၢ်
အိၣ်၀ဲဒၣ်အသိး,ဘၣ်အိၣ်၀ဲဒၣ်လၢပိာ်မုၣ်အဒၢးန့ၣ်တုၤအထီၣ်ဖျဲးနွံသီ၀ံၤဒီးက့ၤအိၣ်က့ၤလၢအကစၢ်အဟံၣ်ဒၣ်
၀ဲန့ၣ်လီၤ.တုၤနံၣ်ဘၣ်ထီၣ်ကဒီးတဘျီတ့ထီၣ်ကဒီးအဟံၣ်သ့ၣ်ဘၣ်သၢစိၤအပျိာ်သၢဘိ၀ံၤအိၣ်၀ဲဒၣ်ဒီးအမါ,ဒီး
အခ့အပှၤအပျဲၢ်အဘီၣ်တြပုာ်ကလာ်ဖဲန့ၣ်လီၤ.ဖိၣ်ဃဲတဂၤအံၤသ့ၣ်နီၣ်အဖါတံၢ်ဂ့ၤမးလီၤ.မ့ၢ်အီၣ်ဘၣ်တၢ်တ
မံၤမံၤန့ၣ်လဲၤဆှၢဟ့ၣ်ဒုးအီၣ်အဖါတံၢ်ကိးဘျီဒဲးလီၤ.

နီၢ်ဘီယုၢ်ယ့ၤအ၀ၤတအိၣ်ဒံးဘၣ်,အိၣ်ဒီးအဖါတံၢ်တနံၣ်ကဒီးလီၤ.လၢခံစံးဘၣ်အဖါတံၢ်စီၤပၤန့ၣ်,ယမ့ၢ်ဟံးန့ၢ်
သုလၢတၢ်ဂ့ၤဒီးဂ့ၤ၀ဲလီၤ.ယအိၣ်ဖဲအံၤတမုာ်လၢၤဘၣ်ဒီးယအိၣ်ဒီးနၤတသ့လၢၤဘၣ်,တၢ်မိၣ်လဲၤဒံးယသးဆူ
ညါလီၤ.အဖါတံၢ်စံးအီၤ, ၱနကလဲၤတၢ်ဆူညါန့ၣ်နမ့ၢ်လၢပိာ်မုာ်ပိာ်မၢၤ,တၢ်မ့ၢ်ဂ့ၤလၢနဂီၢ်ဒီးယသးခုလီၤ.ယြတီ
နၤတသ့စ့ၢ်ကီးဘၣ်. ဒီးစံးဆၢအဖါတံၢ်, ကွၢ်လၢယတၢ်ဟဲ၀ံဟဲစိာ်လီၤ. အဖါတံၢ်ဟ့ၣ်လီၤအီၤစ့သၢပီၢ်ဒီးစံး၀ဲ, မ့ၢ်အဘၣ်နသးစ့ၢ်ကီးဧါ.ဒီးစံးဆၢ၀ဲ,သၢပီၢ်န့ၣ်ယတမၤဘၣ်.ယကဟံးန့ၢ်ထဲယဲၢ်ဆံလီၤ.တုၤနုၤတစုဟံးထီၣ်အ
တၢ်ကူတၢ်သိးဖဲအြကၢးအဘၣ်ဒီးထွးထီၣ်လဲၤ၀ဲဆူပှၢ်ဖးဒိၣ်ဃီသူဃီဂီၤအကျါလီၤ.လဲၤ၀ဲဒီးတုၤလၢဃီဖးဒိၣ်
တထူၣ်အခီၣ်ထံး,မ့ၢ်အဒိၣ်ဆံးဒိၣ်လဲၣ်ထဲအဆှၣ်ကွၢ်၀ဲအဃၢၤ၀း၀းန့ၣ်ဟါမုၢ်သၢနံၤညါဒီးကွၢ်ထီၣ်၀ဲဒၣ်ဆူအဒ့
အြတၢ်အစိးကတၢၢ်တဒ့န့ၣ်ကွၢ်ထီၣ်ဘၣ်မး၀ဲတလၢာ်မဲာ်ကွၢ်ခိၣ်ဖၢၣ်လီၤတဲာ်မးလီၤ.

လၢဃီဖးဒိၣ်တထံးအံၤအမုၢ်ထီၣ်တဘူးတယံၤန့ၣ်ကမါအိၣ်တဖျၢၣ်ဒိးကမါန့ၣ်အပူၤအိၣ်ပှဲၤဒီးတကီအသူအ
ဂီၤအဘီတဖၣ်လီၤ.ဖဲသ့ၣ်အခီၣ်ထံးန့ၣ်ကျဲဖိအိၣ်တဘိမၤအသးဒ်ပနၢ်ကျိၤအသိးဒီးနီၢ်ဘီယုၢ်ယ့ၤပိာ်ထီၣ်ကျဲဖိ
တဘိန့ၣ်ဒီးလဲၤကဒီးဆူညါထံၣ်လၢဒဲဖိတဖျၢၣ်အိၣ်ဒီးပှၤမုၣ်ပှၢ်တဂၤထါထၣ်လၢဒဲအပူၤလီၤ.တုၤပှၤမုၣ်ပှၢ်တ
ဂၤထံၣ်အီၤဒီးသံကွၢ်အတၢ်လၢအီၤလီၤ.နီၢ်ဘီယုၢ်ယ့ၤတခီတဲလီၤက့ၤအဂ့ၢ်အကျိၤ၀ံၤဒီးဃ့အိၣ်၀ဲလၢပှၤမုၣ်ပှၢ်
တဂၤအံၤအသိးဒီးအတၢ်တူၢ်လိာ်အီၤပာ်ကဲအီၤဒ်အဖိအသိးဒီးအဲၣ်၀ဲဒိၣ်မးလီၤ.ပှၤမုၣ်ပှၢ်တဂၤအံၤအဖိအ
လံၤတအိၣ်နီတဂၤဘၣ်ဒီးအ၀ၤတခီမ့ၢ်ပှၤမၤအီၣ်ညၣ်ဖိ,လဲၤမၤအီၣ်ညၣ်လၢပီၣ်လဲၣ်ပူၤ,ဘၣ်တဘျီဘျီဟဲက့ၤ
ဆူအဟံၣ်တတုၤဘၣ်.ယံာ်တသီခံသီလီၤ.နီၢ်ဘီယုၢ်ယ့ၤအိၣ်ဖဲပှၤမုၣ်ပှၢ်တဂၤအံၤအသိးတၢ်ဖံးတၢ်မၤအဂုၤအ
ဂၤလၢအကဘၣ်မၤ၀ဲကိၢ်ကိၢ်ဂီၤဂီၤန့ၣ်တအိၣ်စ့ၢ်ကီးဘၣ်, အိၣ်ဒၣ်ထဲအထါလုၢ်ထါထၣ်, ဆုဘုဆုဟု, ဖီအီၣ်ဖီအီလၢဟံၣ်ပူၤဃီပူၤန့ၣ်လီၤ.တုၤတၢ်ဖံးတၢ်မၤအဂုၤအဂၤတအိၣ်လၢၤဘၣ်ဒီးအ၀ဲဒ့ထီၣ်တနၢ်သီတူၢ်,
အူထီၣ်တဃ့ၤဒီးမ့ၢ်တၢ်လၢအမၤမုာ်ထီၣ်ဟံၣ်ဖိဃီဖိတဖၣ်အသူၣ်အသးဒိၣ်မးန့ၣ်လီၤ

ဟံး​န့ၢ်​အီၤ​လၢ​က​ညီ​တၢ်​စံၣ်​ဃဲၤ​တဲ​ဃဲၤ​တ​ဖၣ်​လၢ​ကျိၣ်​တၢ်​ရၤ​လီၤ​လံာ်​လဲၢ်​က​ရူၢ်​ထုး​ထီၣ်​ဝဲ