​ဖံ​ဖံ​အဲ​မၣ်

ဘၣ်တၢ်ကွဲးအီၤလၢ တံတၢ်မျၢ်ဒွဲ

တၢ်ကတိၤလၢညါ

တၢ်ဂ့ၢ်လၢ တၢ်ကွဲးအံၤ အပူၤတဖၣ် ပှၤကွဲးတၢ် အနီၢ်ကစၢ် ဒ်အနၢ် ဟူဘၣ်, ဒီးဖးဘၣ် ကညီဖိ အတၢ်စံၣ်စိၤ တဲစိၤ တၢ်လဲၤခီဖျိတဖၣ်, ဒီးထိၣ် သြတီၤ တၢ်အိၣ်သး လၢကညီဖိ ဘၣ်လဲၤခီဖျိ တ့ၢ်၀ဲ, ဒီးခါခဲအံၤ တၢ်အိၣ်သး တဖၣ် ဒီးလၢ တၢ်ကွဲးအပူၤ ဟံးန့ၢ် ထိၣသြတီၤ ကၢၤဖှိၣ်အီၤ လၢတၢ်ဂ့ၢ်လွံၢ်မံၤ န့ၣ်လီၤ. တၢတမံၤ မ့ၢ်တၢ်စံၣ်စိၤတဲစိၤ လၢတၢ်ကွဲးအီၤ, ခံမံၤတမံၤ ပသးပှၢ် အတၢ် စံၣ်စိၤ တဲစိၤ, သၢတမံၤ ခရံာ်ဖိလံာ်စီဆှံ ဒီးလွံၢ်မံၤတမံၤ မ့ၢ်တၢ်လၢ အဘၣ် မၤ အသးဖဲ ပစိၤအံၤ အဖၢမုၢ်န့ၣ် လီၤ. လံာ်တဘ့ၣ်အံၤ နဲၣ်ဖျါထီၣ် တၢ်မၤအသး လၢပကညီဖိ ဘၣ်လဲၤခီဖျိ တ့ၢ်၀ဲ တဆံးတက့ၢ်ဧိၤ ဘၣ်ဆၣ် ယမုၢ်လၢ် လၢ ကဒုးထိၣ်ဟူး ထိၣ်ဂဲၤပှၤလၢ အဖးဘၣ်၀ဲတဖၣ် အသးဒီး ဒုးဖုး သံနီၣ် ထီၣ် ပှၤလၢ ပကညီဖိဘူၣ် တီၢ်အံၤ အိၣ်လၢ ပကညီဖိ အစုပူၤဒီး သးလၢ အလီၤဖှံၣ် တဖၣ် တမ့ၢ်တၢ်ဂံၢ်ဆူၣ်ဘါဆူၣ် တမံၤလၢ ပကညီဖိ ဘူၣ်တီၢ်ကဂ့ၤ ထီၣ် အဂီၢ်ဘၣ်. အခိၣ်တလိၣ် မ့ၢ်အိၣ်ဘၣ်လၢ တၢ်လီၢ်အါပူၤ မ့ၢ်ဂ့ၤ တၢ်အဖု အကရၢ လီၤဆီလိာ်သး အါမံၤမ့ၢ်ဂ့ၤ ကထိၣ်ဃဲၣ်လီၤ သကိးတၢ်ဂ့ၢ်ကီ လၢ အြတီ ပတၢ်ပညိၣ် တဖၣ်ဒီး ပကအိၣ်က့ၤဒီး တၢ်ပညိၣ်တမံၤ ဃီလိၤလိၤဆူ ပဘူၣ် တီၢ်ဂ့ၤ လၢပှဲၤအဂီၢ် န့ၣ်မ့ၢ်ပှၤကွဲးတၢ် အတၢ်မုၢ်လၢ် ကွၢ်စိ န့ၣ် လီၤ. ကညီတၢ်ပၢၢ်ဆၢ အိၣ်ထီၣ်လၢ မနုၤ ဃိ, ပသူၣ်က့သးပှၢ် အတၢ်စံၣ်စိၤ တဲစိၤမ့ၢ်ဂ့ၤ, စီၤအီၣ်လး အတၢ်ကွဲး ကညီ အတၢ်စံၣ်စိၤ တဲစိၤမ့ၢ်ဂ့ၤ, ဖျါလၢ ပ၀ဲ ကညီဖိ ကလုာ် တကလုာ်အံၤ အိၣ်တ့ၢ်လံလၢ ဟီၣ်ခိၣ်ချၢ အံၤဖးယံာ်လံ, အိၣ်ဒီး လုၢ်လၢ်ထူသနူ ဆဲးလၤလၢ ပှဲၤဒ် ကလုာ်တကလုာ် အက့ၢ်အဂီၤ အသိးဘၣ်ဆၣ် ထံကီၢ်လီၤတံၢ်လီၤဆဲး ဒီးအီၤ တအိၣ်ဘၣ်, ဒီးဘၣ်သုးအိၣ်ဆိး လီၢ်တဆီ ဘၣ်တဆီ, တတီၤဘၣ်တတီၤ ဒီးဟဲခီဖျိ စ့ၢ်ကီး ထံကီၢ် တဘျုး ဘ့ၣ်ညါ န့ၣ်လီၤ.

ပမ့ၢ်ကွၢ်လၢ စီၤအီၣ်လး အတၢ်ကွဲး ဖဲကဘျံးပၤ ၈၂ န့ၣ် အိၣ်ဆိးဖဲ ကီၢ်မိၣ်ကိလံယၣ် အနံၣ် ၁၈၀ ဒီးအိၣ်ကဒီးဖဲ မုၢ်ထီၣ်ကီၢ် ထၢကံစတၣ် အနံၣ် ၁၄၇ နံၣ် အိၣ်ကဒီးဖဲ ကီၢ်တံဘဲး ၄၇၆ နံၣ် ဒီးဖဲ ကီၢ်ယူၤနါန့ၣ် ၂၅၇ နံၣ်ညါ, ပှၤ ကညီလၢ အဟးထီၣ်လၢ ယူၤနါ ခံဒူၣ်တဒူၣ်န့ၣ် အိၣ်လၢကီၢ်ယူၤနါ ၆၄၄ နံၣ်န့ၣ်လီၤ. ပမ့ၢ်ကွၢ်လၢ တၢ်အိၣ်တၢ်ဆိး လီၢ်ဒီး တၢ်ဘၣ်သုးလီၢ် သုးကျဲ တဖၣ် န့ၣ် တမ့ၢ်ဘၣ် တၢ်ဟးကလိၤ ဒီးဟးအိၣ်လၢ အံၤတပူၤ လၢန့ၣ် တပူၤ လၢတၢ်မုာ် တၢ်လၤ လၢအဂီၢ်ဘၣ်. လီၤဂာ်လၢ အမ့ၢ်စဲဃဲး လၢအဘၣ်တၢ်မၤ နၢၤမၤ ဃၣ်အီၤ ဒီးအိၣ်တကဲ ဆိးတမုာ် နးနးမး ဒီးသုးကွံာ်အသး တဆီဆူ တၢ်လီၢ်အယံၤ မးတတီၤ၀ံၤ တတီၤန့ၣ် လီၤ. ပမ့ၢ်ကွၢ်လၢ စီၤအီၣ်လး အတၢ်ကွဲးလၢ ပပှၤကညီ အတၢ်သုး အသးတတီၤဒီး တတီၤန့ၣ် ယံာ်၀ဲ ခံနံၣ်သၢနံၣ်ကျဲ တုၤလၢ လွံၢ်နံၣ်ဒီး သၢဆံနွံ နံၣ် ကျဲဒၣ်လဲာ်န့ၣ် လီၤ. လၢတၢ်န့ၣ် အဃိ ဖျါလၢ ကညီကလုာ်အံၤ ကသူၣ်လီၤ အသးလၢ ကီၢ်တဘ့ၣ်အပူၤဒီး ဟ့ၣ်သါ ဖိလံၤ တဖၣ်လီၤစိၤလီၤထီ န့ၣ် တသ့ တညီဘၣ် ခီဖျိထံကီၢ် လၢအ ဟဲအိၣ် ဘၣ်၀ဲတဖၣ် ကလုာ်တဖၣ် အိၣ်တ့ၢ်လံ ဒီးတအဲၣ်ဒိးဟ့ၣ် အခွဲးလၢ မိၢ်ပၢ်ဖံဖုတဖၣ် ကသူၣ်လီၤဆီလီၤ အသးန့ၣ် ဘၣ်, အခိၣ်တလိၣ် ကမၤအၢမၤနး မၤတရီတပါ အီၤတုၤ အအိၣ်၀ဲ တကဲလၢၤဘၣ် အဃိ, မိၢ်ပၢ်ဖံဖု တဖၣ်သုး ကဒီး အသး ဃုထံကီၢ် လၢ အကအိၣ်ဆိး၀ဲ ဒီးကဟ့ၣ် သါဖိလံၤတဖၣ် အဂီၢ်န့ၣ်လီၤ. ပမ့ၢ်ကွၢ် ကီၢ်လၢ ပမိၢ်ပၢ်ဖံဖု ဃုထၢ၀ဲ တဘ့ၣ်လၢ အစံး၀ဲလၢ ပကီၢ်န့ၣ် ကမ့ၢ်စဲဃဲး ကီၢ်လၢ အအိၣ်သဘျ့ ဒီးပှၤကလုာ်ဂၤ တအိၣ်ဒံး နီတက လုာ်ဘၣ် အဃိ အ၀ဲသ့ၣ် သူၣ်လီၤဆီလီၤ အသးဒီး ကမ့ၢ်ကီၢ် တဘ့ၣ်လၢ ဖိလံၤ လၢခံအစိၤ တဖၣ်အစိၤ အတၢ်န့ၢ် သါဒီး ကအိၣ်ဘၣ်၀ဲ အစိၤစိၤဃၣ်ဃၣ် အဂီၢ်န့ၣ် လီၤ.

http://akoqld.blogspot.se/2012/09/blog-post_19.html