တၢ်တီတၢ်လိၤလၢ ကညီဖိတဖၣ်အဘၢၣ်စၢၤအိၣ်လံဧါ

ပှၤတီၣ်ထီၣ်တၢ်ကွဲး : သူလ့ၤမဲာ်ထံ

လၢ - ဖုဂ့ၢ်သူ၀ၣ်မ့ (ကီၢ်သူလ့ၤ)

မုၢ်ဂီၤခီ မုၢ်ဟဲထီၣ်အဆၢကတီၢ် ဒီးတြကၢးလၢတၢ်တဘၣ်အၢၣ်၀ဲဘၣ်ဒီးမူခိၣ်တြကၢးစူၤအဆၢက တီၢ် မူခိၣ်အၢၣ်ခံးသူဒီးတၢ်စူၤတဘျီ တၢၢ်ကွဲၤအီပၠးထံလၢ မုၢ်နုာ်တၢ်ကပၤန့ၣ် ပမှံၤပပှၢ်စံး၀ဲလၢ တၢ်မၤအသးဒီးပှၤတခါခါလံ တၢ်ပနီၣ်ဒ်အံၤမ့ၢ်ဖျါန့ၣ် ပထံၣ်ဘၣ်တၢ်လၢအတဂ့ၤဒီး တၢ်အၢတၢ် သီတဖၣ်လီၤ. အဃိသတးန့ၣ် တၢၢ်ကွဲၤမ့ၢ်အီထံလၢ မုၢ်နုာ်တကပၤန့ၣ် ပမှံၤပပှၢ်စူၢ်အီၣ်နာ်အီၣ် ၀ဲလၢ တဂ့ၤဘၣ်လီၤ.

တစိၢ်ဖိ ကျိသီၣ်ထီၣ်၀ဲ ဒီဒီ ဒဲဒဲ ဒံၢ်ယံာ်၀ဲ ယဲၢ်မံးနံး၀ံၤအလီၢ်ခံ ပထံၣ်ဘၣ်လၢ ၀ါဃံတဖၣ် ဟဲက့ၤ စိာ်၀ဲ ခိၣ်ဖၢၣ်သူ သုးဖိ ခံဂၤလၢအခးသံ၀ဲဒီးန့ၢ်၀ဲဃုာ်ဒီးတၢ်စုက၀ဲၤခဲလၢာ်န့ၣ်လီၤ. တချုးလၢ တၢ်သ့ၣ်တဖၣ်အံၤ ဟဲကဲထီၣ်အသးဒံးဘၣ်န့ၣ် ခိၣ်ဖၢၣ်သူ တဖုဃီလၢ ပယီၤဟဲက့ၤစိာ်အစိၣ်အံၤ ပှၤသးပှၢ်စံးအီၤလၢ ဖိသ့ၣ်ဧၢ တၢၢ်ကွဲၤအီထံလၢမုၢ်နုာ်တကပၤအဃိ သုးကွံာ်သုသးလၢ အယံၤ တစဲးဖိကသ့ဧါ. အတဲဆၢ၀ဲ ဟဲၣ် ဟဲၣ် ဟဲၣ် ဖုဧၢ တဘၣ်ကိၢ်လၢပဂီၢ်တဂ့ၤ သုတၢ်စူၢ်တၢ်နာ်တဖၣ် ကဲထီၣ်လိၣ်ထီၣ်တသ့ဘၣ် စံး၀ဲဒ်န့ၣ်လီၤ.

ဘၣ်မနုၤအဃိ တၢ်သံကွၢ်ဘၣ်အိၣ်ထီၣ်လၢ တၢ်တီတၢ်လိၤအိၣ်လံလၢ ကညီဖိတဖၣ်အဘၢၣ်စၢၤ လံဧါန့ၣ်လဲၣ်. အါဂၤကိာ်ပူၤအါဆူဒၢးကစံး၀ဲဂၤမံၤဂၤမၠိလီၤ. ဘၣ်ဆၣ်သနာ်က့ လၢယတၢ်ကွဲး အ၀ဲအံၤအပူၤ ယအဲၣ်ဒိးစံး၀ဲဒ်လဲၣ်န့ၣ် ကကွဲးတဲပၠးသုးဒ်အံၤလီၤ.

ကညီအသ၀ီလၢအဟဲအိၣ်လၢ သိၣ်မှံၤအထံကီၢ် ပကိးအီၤလၢ ကီၢ်ကၠီၣ်တဲၣ်အိၣ်၀ဲတဖျၢၣ်လီၤ. ဒီးလၢသ၀ီတဖျၢၣ်န့ၣ် ပှၤအိၣ်၀ဲ အိၣ်အါကလုာ်အါမၠိလီၤ. ကလုာ်ဒူၣ်အိၣ်၀ဲဒ်အမ့ၢ်၀ဲ “ကညီပှိၢ် “ကညီစှီၤ“ ကညီဘှဲမုၢ်နုာ်ဒီးဘှဲမုၢ်ထီၣ်“ ကညီပကူ“ ကညီမီၤန့ၢ်ပှၤ“ကညီကဲၢ်ခၢၢ်ကဲၢ်ဘါ“ ဒီးကလုာ်ဒူၣ်အဂၤတဖၣ်မ့ၢ်၀ဲ ဒီပုၢ်၀ဲၢ် ကခၠ့ၢ်“ ဒီပုၢ်၀ဲၢ်တရူး၀ါ“ ဒီးပဒီပုၢ်၀ဲၢ်လၢ အကိးလီၤအသးလၢ ကညီသူ လအမ့ၢ် မူၣ်စလ့ၣ် တဖၣ်အိၣ်၀ဲလီၤ.

ယအဲၣ်ဒိးတဲဘၣ်သးတချုးလၢ ကလုာ်ဒူၣ်အဂၤတဖၣ် ဟဲအိၣ်ဒံးဘၣ်န့ၣ် ကညီသ၀ီ၀ဲအံၤ ပစံး သ့လၢ တၢ်မုာ်တၢ်ခုၣ်ဘၣ်အီၤလၢ သိၣ်မှံၤအထံအကီၢ်အံၤန့ၣ်လီၤ. လၢအဂီၢ် ဆိကမိၣ်၀ဲလၢ အမ့ၢ် ကီၢ်ဖ့ရ့လၢ ပကိးအီၤလၢ ကီၢ်သူလ့ၤအံၤန့ၣ်လီၤ. တၢ်မၤအသးဒ်အံၤ ကလုာ်အဂၤတဖၣ် ဟဲအါထီၣ်တဘျီ တၢ်သဘံၣ်သဘုၣ်အိၣ်ထီၣ်စ့ၢ်ကီး၀ဲလီၤ. ဒ်န့ၣ်အသိးစ့ၢ်ကီး တၢ်သဘံၣ်သဘုၣ် အိၣ်ထီၣ်၀ဲဒ်အံၤအဃိ လၢသ၀ီတဖျၢၣ်အံၤအပူၤ ပှၤလၢ အဂဲၤလိာ်တၢ်လၢ ပှၤတ၀ၢအဂီၢ်ဒီးပိာ် မုၣ်ပိာ်မၢၤဒီးပိာ်ခွါ
အဂီၢ်အိၣ်စ့ၢ်ကီး၀ဲလီၤ.

တၢ်မၤအသးဒ်အံၤ တနံၤန့ၣ် ဒ့မုၣ်ဖိ ၁၆ နံၣ်တဂၤ အ၀ဲလဲၤလီၤဒၢၣ်ထံလၢ ထံကျိပူၤဒီး ပှၤအါဂၤ တထံၣ်စိအီၤအဆၢကတီၢ် ပဒီပုၢ်၀ဲၢ်ခွါ ကညီသူလၢအမ့ၢ် မူၣ်စလ့ၣ် ခွါ သၢဂၤ ဖီၣ်ဆူၣ်အီၤဒီး မံးနံး ၃၀ ၀ံၤအလီၢ်ခံ ဒ့မုၣ်ဖိအံၤ ဘၣ်တၢ်ဆှၢအီၤတဘျီဃီဆူတၢ်ဆါဟံၣ်န့ၣ်လီၤ. ကဲ တဘျီအံၤ ပှၤဂဲၤလိာ်တၢ်လၢ ပိာ်မုၣ်ပိာ်မၢၤအဂီၢ် တဖၣ်လဲၤကွၢ်၀ဲ ဒ့မုၣ်ဖိလၢအတူၢ်ဘၣ်တၢ် တဂၤအံၤလီၤ. နဆိကမိၣ်လၢ ကညီဖိကစံၣ်ညီၣ်၀ဲ မူၣ်စလ့ၣ်ခွါသၢဂၤအံၤဧါ. တမ့ၢ်ဘၣ် မူၣ်စလ့ၣ် ခွါသၢဂၤ ဟ့ၣ်လီၤ၀ဲ ပှၤဂဲၤလိာ်တၢ်လၢ ပိာ်မုၣ်အဂီၢ် တဂၤလၢ စ့ယိၤ ၅၀၀၀ဘး ဒီးပှၤဘၣ်မူဘၣ်ဒါလၢ ပိာ်မုၣ်ခွဲးယာ်အိၣ် ၂ ဂၤဒီး ခဲလၢာ် ၁၀၀၀၀ ဘးန့ၣ်လီၤ. ၀ံၤတဘျီ ပျဲကွံာ်၀ဲ ပှၤဘၣ်ကွၢ်မ့ၣ် သၢဂၤအံၤလီၤ.

တုၤမ့ၢ်အဟဲက့ၤတဘျီ ဖိသၣ်မုၣ်တဂၤအမိၢ်စံး၀ဲ “ သရၣ်မုၣ်ဧၢ ယဖိမုၣ်မၤသးဒ်လဲၣ်ဒီး မူၣ်စလ့ၣ် ခွါသၢဂၤ ပှၤစံၣ်ညီၣ်အီၤလၢ သံ မ့တမ့ၢ် ပှၤဒုးလီၤအီၤလၢ ဃိာ်ပူၤ တစိၤသးဧါ. အ၀ဲသ့ၣ်ခံဂၤ တဲ၀ဲ “ အါတလိၣ်ကိၢ်ဘၣ် ပှၤဘၣ်ကွၢ်မ့ၣ် သၢဂၤန့ၣ် ပအးလီၤလၢ ကၠီၣ်တဲၣ်ပၢၤကီၢ် အစုပူၤလံ ပဆိကမိၣ်လၢ ကလီၤဘၣ်လၢ ဃိာ်ပူၤ တစိၤသးမ့တမ့ၢ် သံလီၤ. ၀ံၤတဘျီ ဖိသၣ်မုၣ်တဂၤ အမိၢ် အမဲာ်သၣ်ဖျါလၢ အနံၤကမှံမး၀ဲလီၤ. ဖျါစ့ၢ်ကီးလၢ အသးမံထွဲ၀ဲလီၤ. ကလုာ်ဂၤ မ့ၢ်မၤဆါ ပှၤန့ၣ် တဒ်သိးဒီး ကညီဖိကဒဲကဒဲ မၤဆါပှၤဘၣ်.

ပခီၣ်မ့ၣ်ဒီးပကစၢ်ပမ့ၢ်ကုၣ်လီၤအီၤန့ၣ် ဆါဒိၣ်န့ၢ်ဒံးပကုၣ်ပှၤဂၤအခီၣ်မ့ၣ်လီၤ. အဃိ ကလုာ်ဂၤ မၤအၢပှၤန့ၣ် တလီၤလီာ်ဒီး ပပှၤကလုာ်မၤအၢပှၤဘၣ်. ပစံးလၢပဒုးမီၤစိရိၤဒီး မီၤစိရိၤမ့ၢ်အိၣ် လၢပကျါန့ၣ် တလိၣ်ပဒုးဒီးမီၤစိၤရိၤဘၣ်. ပဃုတၢ်တီတၢ်လိၤဒီး လၢပ၀ဲကညီဖိတဖၣ်အကျါ တၢ်တီတၢ်လိၤမ့ၢ်တအိၣ်န့ၣ် အခီပညီတအိၣ်ဘၣ်လီၤ. ပမ့ၢ်စံးဒ်အံၤဒီး လီၤဂာ်လၢ ပခီၣ်လိၤဃံ ဒီးပကစၢ် ပဒိလီၤက့ၤအီၤလီၤ.

ကဲပကဆဲးလဲၤကဒီးဆူညါတခါ သ၀ီတဖျၢၣ်လၢထးအံၤန့ၣ် ဘၣ်ထွဲဒီးမုၣ်ခွါတၢ်ဂ့ၢ်ဒီး တၢ်မၤဆူၣ် မၤစိးတဖၣ် ဟဲအိၣ်ထီၣ်၀ဲတလီၢ်လီၢ်လီၤ. ပှၤလၢအဂဲၤလိာ်တၢ်လၢ မုၣ်ခွါတၢ်ဂ့ၢ်တဖၣ် ထီဘိဂဲၤ လိာ်၀ဲသနာ်က့ တၢ်ဆီတလဲတအိၣ်ထီၣ်နီတမံၤဘၣ်. တယံာ်တမီၢ်ဘၣ်ဒီး တၢ်မၤကမၣ်မုၣ်ကမၣ် ခွါဟဲအိၣ်ထီၣ်ကဒီးအသီတခၠိလီၤ. အ၀ဲအံၤ မ့ၢ်၀ဲ ကညီစှီၤဒီး ကညီပှိၢ်မုၣ်ခွါတၢ်ဂ့ၢ်လီၤ. အန့ၣ်တဘျီ ဘၣ်လၢ တၢ်ပိာ်မုၣ်တဂၤအံၤ မ့ၢ်၀ဲ ပှၤဂဲၤလိာ်တၢ်လၢ ပိာ်မုၣ်ခံဂၤအကျါအဖိဒိၣ်မုၣ် တဘျီတၢ်မၤအသးဒ်လဲၣ်.

အန့ၣ်တဘျီကိးထီၣ်၀ဲ အဆွ့ၢ်အမၠိအဒူၣ်အထၢတဖၣ် ဒီး ကိးထံၣ်၀ဲ တၢ်ပိာ်ခွါတဂၤလၢ တၢ်ချၢ တချုးတၢ်လဲၤဒံးဆူ စံၣ်ညီၣ်ပီတ့အရူဒံးဘၣ်န့ၣ်လီၤ. အ၀ဲသံကွၢ်၀ဲ တၢ်ပိာ်ခွါတဂၤဒီး ပိာ်ခွါတဂၤ စံးဆၢတၢ် မ့ၢ်ဘၣ်န့ၣ် ပှၢ် အ၀ဲသးပှံၢ်ထီၣ်တၢ်ဘျီဃီလီၤ. ပိာ်ခွါတဂၤ စံးဆၢတၢ်မ့ၢ်ဘၣ်ဒိဆါပိာ်မုၣ် တဂၤ တဘျီဃီ အ၀ဲကးတံာ်ဃး၀ဲ တၢ်ပိာ်ခွါတဂၤ အနိးဖံးတဘျီဃီလီၤ. အန့ၣ်တဘျီ ပိာ်ခွါဖိ တဂၤ တဲတၢ်တသ့နီတမံၤလၢၤဘၣ် အ၀ဲသ့ၣ်ခံဂၤ လၢအမၤတၢ်လၢ ပိာ်မုၣ်ပိာ်မၢၤတၢ်ဂ့ၢ် ဟံးထီၣ် ၀ဲ လံာ်တၢ်သံကွၢ်စံးဆၢဒီး လဲၤတီၣ်ထီၣ်၀ဲလၢ စံၣ်ညီၣ်ပီတ့အရူလီၤ.

တချုးမုၢ်စ့ၣ်၀ါဒံးအကတီၢ် မုၢ်ဟါလီၤ ၇ နၣ်ရံၣ်ဒီး ၈ နၣ်ရံၣ် အဆၢကတီၢ် စံၣ်ညီၣ်ကွီၢ်ခိၣ်တဂၤ လဲၤဘၣ်၀ဲလၢ မုၣ်ကမဲအဖိမုၣ်တဂၤအဟံၣ်ဒီး မုၣ်ကမဲအဖိတဂၤသံကွၢ်အီၤ တ့ဧၢ ယကသံ ကွၢ်နၤတၢ်တမံၤနၤ“ အ၀ဲတဲဆၢ၀ဲ သံကွၢ်သၢၣ်ဖိဒိၣ်မုၣ်“ အန့ၣ်တဘျီ ဖိဒိၣ်မုၣ်တဂၤ သံကွၢ်၀ဲ တံဧၢ တၢ်လၢ ပိာ်မုၣ်ဒီးပိာ်ခွါခံဂၤ ဘၣ်သူၣ်ဘၣ်သးလိာ်အသးဒီး အဲၣ်လိာ်ကွံာ်လိာ်အသး ဒီး လီၤကမၣ် ပကစံးလၢ ပှၤပယီၤဖိစံး၀ဲ နှစ်ဦးသေဘာတူ ဒ်န့ၣ်တကလုာ်န့ၣ်မီၤ မ့ၢ်၀ံၤ အ၀ဲသ့ၣ် ခံဂၤ တအဲၣ်လိာ်အသးဒီး တၢ်ဂ့ၢ် နီးစဲးတွဲ ဟဲကဲထီၣ်အသးလၢ ပိာ်မုၣ်တဂၤ ဟံးတၢ်ဂ့ၢ်န့ၣ် မ့ၢ်ပကစံးလၢ တၢ်လီတၢ်၀့ၤ ဂ့ၢ်၀ီအံၤသ့ဧါ .

ဘၣ်မနုၤအဃိသးလဲၣ်န့ၣ် အ၀ဲသ့ၣ်ခံဂၤအဲၣ်လိာ်အသးလၢ အမုၣ်ကနီၤဖိၣ်သၣ်ခွါလီၤမီၤ. မ့ၢ်၀ံၤဒီး ပိာ်ခွါန့ၣ် အဲၣ်ပှၤလၢ အသီအဃိ တၢ်လၢ မုၣ်သဘျ့ခွါသဘျ့ တၢ်ဂ့ၢ်န့ၣ် မ့ၢ်ပစံးလၢ တၢ်လီတၢ်၀့ၤ ဂ့ၢ်၀ီကသ့ဧါ.

အန့ၣ်တဘျီဖါအမဲာ်တမုာ်ဘၣ်ဒီး ခီဖျိအ၀ဲမ့ၢ် စံၣ်ညီၣ်ကွၢ်ခိၣ်အဃိ ကစံးဆၢ၀ဲ တၢ်ကီလၢအဂီၢ်ဒီး တဲ၀ဲလၢ ဖိဒိၣ်မုၣ်ဧၢ မ့ၣ်ဒၣ်ခီ နတၢ်သံကွၢ်ဒီး တၢ်ကတိၤတဖၣ် န့ၣ် ဘၣ်ဒၣ်ခီကယၢာ် နာ်က့ ခီဖျိ ပအိၣ်လၢ ပှၤထံပှၤကီၢ် ဒီး ပဟဲအိၣ်ကဒုလၢ ပှၤပဟံၣ်အဖီလာ်အ ဃိ ပဘၣ်မၤ၀ံၤဒ်အံၤလီၤ.

လၢဖါတံၢ်တဂၤ အတၢ်စံးဆၢ၀ဲ ဖိဒိၣ်မုၣ်တဂၤအံၤ အဖီခိၣ် ယထံၣ်လၢ တၢ်အံၤ ပထံပကီၢ်မးတအိၣ်ဒံးဘၣ် ဒီး ပဘၣ်မၤ၀ံၤတၢ်မံၤဒ် ပှၤတဂၤအ တၢ်လိၣ်ဘၣ်ဒီးအတၢ်သးမံအံၤ မ့မ့ၢ်နၤနဆိကမိၣ်နဲဒ်လဲၣ်. ပထံပကီၢ် တအိၣ်ဒံးဘၣ်ဒီး ပကဲလၢစံၣ်ညီၣ်ကွၢ်တဂၤ ပကဘၣ်စံၣ်ညီၣ်ဆိတၢ်လၢ အတီအလိၤအလိၤလီၤ. ပမ့ၢ်မၤညီ နုၢ်ပသးလၢ ပှၤထံပှၤကီၢ်ဒ်အံၤ မုၢ်တနံၤပထံပကီၢ်မ့ၢ်အိၣ် ပကဘှီဘၣ်က့ၤအီၤကီဒိၣ်မးလီၤ. လုၢ်လၢ်တဖၣ် အံၤဟဲခီဖျိအသးလၢ ပှၤပယီၤဖိအအိၣ်လီၤ.

တ၀ံၤဒံးဘၣ်တကတီၢ်ဃီ ဖါတံၢ်သးပှၢ်တဂၤ အဖိခွါ အ၀ဲမ့ၢ် ပှၤလၢ အအိၣ်ဒီး ဟံၣ်ဖိဃီဖိလီၤ. အ၀ဲညီနုၢ်နီ၀ဲ သိလ့ၣ်ပကိးညီနုၢ်အီၤလၢအမ့ၢ် Tiger သူသူတခိၣ် ဒီး တီ၀ဲပှၤလဲၤတၢ်ဖိကီးနံၤဒဲး ဒီးတၢ်တနံၤန့ၣ် ဒ့မုၣ်ဖိတဂၤ ကက့ၤလၢသ၀ီပူၤ ခီဖျိ သိလ့ၣ်ဒိးလဲတဖၣ် က့ၤတလၢအီၤလၢာ် အဃိ ကဘၣ်ဖဲ ၇ နၣ်ရံၣ်အဆၢကတီၢ် အ၀ဲဃ့တၢ်မၤစၢၤလၢ စံၣ်ညီၣ်ကွၢ်အဖိခွါတဂၤအအိၣ် လၢကဟဲက့ၤပိာ်၀ဲအခံလီၤ.

အန့ၣ်တဘျီ အ၀ဲသ့ၣ်ဟဲက့ၤဒီး သတူၢ်ကလာ် စံၣ်ညီၣ်ကွၢ်အဖိခွါ တဂၤ ပတုာ်ကွံာ်သလိလ့ၣ်ဒီး ဒ့မုၣ်ဖိတဂၤ စံးအီၤ ဘၣ်မနုၤလဲၣ်. အ၀ဲစံး၀ဲတသ့ၣ်ညါဘၣ်ဒီး ဒ့မုၣ်ဖိန့ၣ် ကစံၣ်လီၤလၢ သိလ့ၣ်ပူၤတဘျီအ၀ဲယူတံၢ်ဃာ်၀ဲဒီး ဖီၣ်ဆူၣ်၀ဲလီၤ. ၀ံၤဒီး ပှၤနီသိလ့ၣ် တဂၤတဲအီၤလၢ တၢ်ဂ့ၢ်အံၤ နတဘၣ်တဲဘၣ်ပှၤနီတဂၤတဂ့ၤ နမ့ၢ်တဲဒု နၤဒုယကမၤသံနၤ လီၤ. တုၤလၢအဟဲတုၤလၢ သ၀ီတဘျီ ဒ့မုၣ်ဖိန့ၣ် ဟီၣ်ဖၣ်ညါ အ၀ဲပျံၤတၢ်ဒီး ပှၤလဲၤသံကွၢ်အီၤ သနာ်က့တစံးဆၢပှၤနီတဂၤဘၣ်. အ၀ဲပျံၤ၀ဲလၢ ပှၤကမၤသံအီၤလီၤ.

တၢ်ဂ့ၢ်အံၤ ထီၣ်ဘးလၢ တသီခံသီ၀ံၤ ဒ့မုၣ်ဖိအံၤ စံး၀ဲတၢ်ဂ့ၢ်တၢ်ကျိၤခဲလၢာ်ကယဲၢ်မ့ၢ်တၢ်ကဲထီၣ် အသးဒီးအီၤတဖၣ်လီၤ. အန့ၣ်တဘျီ ပှၤနီသိလ့ၣ်အံၤ မ့ၢ်၀ဲ စံၣ်ညီၣ်ကွၢ်အဖိခွါဒီး ပှၤဂဲၤလိာ်လၢ ပိာ်မုၣ်ပိာ်မၢၤ အခိၣ်ဒိၣ်ကတၢၢ်လၢသ၀ီတဖျၢၣ်အံၤအပူၤ အဖိခွါလီၤ. ပှၤကထီၣ်တၢ်ဂ့ၢ်လီၤန့ၣ် ပှၤပိာ်မုၣ်ခံဂၤလၢ အမၤတၢ်လၢ အမၤတၢ်လၢ ပိာ်မုၣ်ပိာ်မၢၤအဂီၢ်ခံဂၤအံၤ စံး၀ဲလၢ တၢ်ဖိသၣ် မုၣ်တဂၤ နဖးလိၣ်ညါနဟးမၤဒၢးပှၤ၀ၤ ဒ်န့ၣ်လီၤ. နမ့ၢ်က့ၤဆိကမိၣ်ထံထံ ပှၤမၤဆူၣ်နၤ နမ့ၢ်ပိာ်မုၣ်နဂံၢ်နဘါတထဲသိးဒီးပိာ်ခွါဘၣ် နစံးလၢ နဟးမၤဒီးပှၤ၀ၤကသ့လၢကျဲဒ်လဲၣ်. ပှၤဂဲၤလိာ်လၢ ပိာ်မုၣ်ပိာ်မၢၤခံဂၤအံၤ ဘၣ်မနုၤအဃိ အ၀ဲ ဘၣ်အိၣ်ဃူ၀ဲပိာ်ခွအံၤလဲၣ်န့ၣ် ခီဖျိလၢ ပိာ်ခွါအံၤ မ့ၢ်၀ဲ အဖိဒိၣ်ခွါအဃိလီၤ.

၀ံၤဒီးတၢ်ဂ့ၢ်အံၤ ပှၤမၤလီၤမၢ်ကွံာ်အီၤလီၤ. ဘၣ်မနုၤအဃိ ပှၤဘၣ်မၤလီၤမၢ်အီၤလဲၣ်န့ၣ် ခီဖျိ ပိာ်ခွါအံၤ မ့ၢ်၀ဲ စံၣ်ညီၣ်ကွၢ်ဖိခွါဒီး ပှၤဂဲၤလိာ်လၢ ပိာ်မုၣ်ပိာ်မၢၤအခိၣ်ဒိၣ်ကတၢၢ်တဂၤအဃိ လီၤ. အါတက့ၢ် ပှၤစံးဝဲလၢ တၢ်သိၣ်တၢ်သီတကွၢ်မဲာ်တၢ်ဘၣ်သနာ်က့ တၢ်ဂ့ၢ်သ့ၣ်တဖၣ်အံၤ ကွၢ်မဲာ် တၢ်ခီဖိျ တၢ်ဒွးထူထံးဒီး အီၣ်ကျိၣ်အီၣ်စ့တဖၣ် အဖီခိၣ် ကဲထီၣ်အသးတစိၢ်လီၢ်လီၢ်လၢ သ၀ီ၀ဲအံၤ အပူၤလီၤ.

တၢ်ဂ့ၢ်အံၤ မ့ၢ်တၢ်ကဲထီၣ်အသးလၢ အမ့ၢ်အတီအိၣ်၀ဲ ဒီဒူၣ်လၢ တၢ်လီၢ်အဂၤတဖၣ်အပူၤလီၤ. နမ့ၢ်က့ၤ ထိၣ်သြတီၤက့ၤ ကီၢ်ယီၤပူၤနွံက့ၣ်ထံန့ၣ် တၢ်သ့ၣ်တဖၣ်အံၤ ကဲထီၣ်အသးအိၣ်၀ဲ လီၤ. ဒီးကီၢ်ဆၢ တၢ်လီၢ်တဖၣ်အပူၤ န့ၣ် ကဲထီၣ်အသးအိၣ်၀ဲ အဘူးကတၢၢ် ဒဲက၀ီၤအပူၤန့ၣ် ကဲထီၣ်အသးဒ်အံၤအိၣ်၀ဲသ့သ့လီၤ. တမ့ၢ်ထဲလၢ ဒဲက၀ီီၤပူၤဘၣ် လၢဟီၣ်ခိၣ်ချၢဒီဘ့ၣ် ထံကီၢ်ကိး ဘ့ၣ်ဒဲးန့ၣ် ကဲထီၣ်အသးအိၣ်၀ဲလီၤ. ဘၣ်ဆၣ်သနာ်က့ အခဲအံၤ တၢ်လၢယအဲၣ်ဒိးစံးတခီတမ့ၢ်လၢ ဟီၣ်ခိၣ်ဒီဘ့ၣ်ဘၣ် ယအဲၣ်ဒိးစံးဘၣ်သးထဲ ပ၀ဲကညီတ၀ၢအပူၤဒံးလီၤ.

အဃိ ယတၢ်ကွဲးအံၤ ယအဲၣ်ဒိးစံးယဲလၢ ပဒုး၀ဲ ၀ါဃံကရူၢ် ပှၤပယီၤဖိ သုးမီၤစိရိၤ တစိၤဘၣ်တ စိၤမ့ၢ်ဒ်သိးဒီး ပကအိၣ်ဒီးနီၢ်ကစၢ်တၢ်ပၢလီၤသးဒီး တၢ်တီတၢ်လိၤဒီးတၢ်မုာ်တၢ်ခုၣ်လၢ အမ့ၢ်အတီ လီၤ. ဘၣ်ဆၣ်သနာ်က့ တချုးပဒုးဒီးသုးမီၤစိရိၤဒံးဘၣ်န့ၣ် ပကဘၣ်ဒုးဆိက့ၤ လၢပပှၤကညီဖိ အကျါလၢ အလီၤဂာ်ဒီးသုးမီၤစိရိၤအိၣ်ဒံး၀ဲအါမးလီၤ. ဒ်မီၤစိရိၤမၤ၀ဲအသိး ပပှၤကညီဖိအကျါ မၤ၀ဲဒ်န့ၣ်အသိးလီၤ.

မီၤစိရိၤအံၤ ပဒုးအီၤတစိၤဘၣ်တစိၤ လၢမိၢ်ပၢ်ဖံဖုဒီးတုၤလၢခဲအံၤန့ၣ် ပတတုၤဒံးလၢ တၢ်မၤနၢၤ ဒီးတၢ်တီတၢ်လိၤနီတဘျီဒံးဘၣ်န့ၣ် ခီဖျိလၢ ကညီဖိတနီၤအကျါ လၢအလီၤဂာ်ဒီးမီၤ စိရိၤအံၤ အိၣ်၀ဲအဃိ ပဒုးတန့ၢ်န့ၣ်ကမ့ၢ်၀ဲတၢ်ဂ့ၢ်တဖၣ်အကျါတၢ်တခါအံၤ ပၣ်ဃုာ်၀ဲလီၤ. ပစံးလၢ မီၤစိၤရိၤ တတီတလိၤအဃိ ပဒုးအီၤလၢပကဒိးန့ၢ်ဘၣ်တၢ်တီတၢ်လိၤ ဘၣ်ဆၣ် ပ၀ဲတခီ ပမ့ၢ်တတီတလိၤဒု လၢယၤတဂၤယတၢ်ဆိကမိၣ် ကညီဖိမ့ၢ်န့ၢ်ထံန့ၢ်ကီၢ်သနာ်က့ တမ့ၢ်လၢကဒိးန့ၢ်ဘၣ်၀ဲလၢ အတီအြတၢ်ဒီးအတီအလိၤဘၣ်.

ယတၢ်ကွဲးအတၢ်ပညိၣ်အံၤ မ့ၢ်ဒ်သိးပကဘှီက့ၤပပှၤကလုာ်တဖၣ်လီၤ. တမ့ၢ်လၢပကမၤအၢ ထီၣ်သီထီၣ်ပပှၤကလုာ်ဘၣ်. တၢ်လၢြကၢးဘှီးဒီးပကဘှီက့ၤအီၤလၢ တတီဒီးပကမၤတီက့ၤ အီၤဒီးတၢ်လၢ အကမၣ်ဒီးပကမၤဘၣ်က့ၤအီၤအဂီၢ်လီၤ.

ကတၢၢ်လံ……………………….

http://www.freekarennews.info/2012/06/blog-post_5939.html