​ဖံ​ဖံ​အဲ​မၣ်

တံနိ(သဝီတါ)
 
တဘျီလဲၤတုၤဘၣ်ယဲဒၣ်, ဆူကီၢ်ကညီဝ့ၢ်ဖၣ်အၣ်
ဆၢတုၤဘၣ်ယုယံာ်တ့ၢ်လံ, ခဲအံၤပှဲၤယဲဒီးသးမံ
ဖၣ်အၣ်ကညီဝ့ၢ်ခိၣ်စိ, ပာ်ကဖၢသးလၢနဃိ
ဘၣ်ဆၣ်တၢ်မၤဖှီၣ်ယသး, လၢနဃိမ့ၢ်အိၣ်အါမး
တၢ်လၢမၤဖှီၣ်ယသးဖိ, နမံၤလၢပယီၤကျိာ်ဃိ
ဆူမံၤကညီမ့ၢ်ခီလဲ, ကသးခုတပျုာ်ထုးယဲ (နဲဒၣ်မီၤ)

လၢဖၠါပူၤဟးထီၣ်ဟးလီၤ, ထံၣ်ယဲပှၤကတိၤပယီၤ
ကညီဖိကဒဲကဒဲ, ကတိၤပယီၤလီၤလဲကဲ
ကညီကျိာ်ယဆၢနာ်ဟူ, စံးဆၢယၤ “ပီၠမတးဘူ”
တံနိကတိၤပှၤကညီ, ကဲထီၣ်ပှၤအီပံၢ်အီပီ

ကွဲမုာ်သုလၢသးကဆှီ, ဟဲဟးဘၣ်ဆူကီၢ်ကညီ
ဘၣ်ဆၣ်တချူးသုဟဲဟး, ပယီၤကျိာ်မၤလိဆိသး
ကညီဖိလၢဝ့ၢ်ဖၣ်အၣ်, တကတိၤကညီကျိာ်ဘၣ်
တချုးနဟဲ၀့ၢ်ဖၣ်အၣ်, ကတိၤလိပယီၤမ့ၢ်ဘၣ်
နကတိၤကညီကျိာ်ဃိနကအီပီဒ်တံနိ (လီၤတံၢ်ဒါခီ)

ဆိမိၣ်ဟဲတုၤကညီဝ့ၢ်, ကဖးဘၣ်လံာ်ကညီစ့ၢ် (ဆိမိၣ်ဒိၣ်ပာ်စၢၤညါ)
ဟဲတုၤကညီဝ့ၢ်တဘျီ, တၢ်ဆိမိၣ်ခိၣ်ခံအီထီ
ကျဲမုၢ်ကျဲဘိအကပၤ, ပှၤကွဲးလီၤလံာ်လဲၢ်အိၣ်ရး
အိၣ်ထဲပယီၤကျိာ်တဘျီ, ဖးတဘၣ်ယဘၣ်ကွၢ်ကီ (သးဘၣ်ဖှီၣ်)

သ့ၣ်နီၣ်ထီၣ်တဘျီ
ယလဲၤဆူကီၢ်ပယီၤထးခီ, ထံၣ်ဘၣ်တရူးလံာ်ဝးဝး
တၢ်အီၣ်ကျးတမှံၤဟံၣ်ဒွဲ, အိၣ်ထဲတရူးလံာ်လဲလဲ
သးဒ့ဒီတစိၢ်တလီၢ်, ဆိမိၣ်လဲၤတုၤတရူးကီၢ်
ကညီဖိဧၢဆိမိၣ်ထီၣ်, ဝ့ၢ်ဖၣ်အၣ်မ့ၢ်ကညီကီၢ်
ဟးကွၢ်ကီကညီဝ့ၢ်ခိၣ်, ကညီလံာ်တထံၣ်နီတိၣ်
ဆိမိၣ်က့ၤတၢ်လဲၤခီဖျိ, ယမဲာ်ဆှးဒီးတရူးဖိ
နဃိဆၢပာ်ကဖၢသး, ဘၣ်ဆၣ်မဲာ်ဆှးလီၤက့ၤသး

ဘၣ်တဘျီယလဲၤဆူဖၠါ
လၢတံၤဖိသကိးဖိကျါ, တံနိဟ့ၣ်ကူၣ်တၢ်တခါ
“ဒ်မံၤကညီကအိၣ်ဖျါ, ကတိၤကညီကျိာ်အါအါ”
သးစၢ်တဂၤတဲဆၢယၤ, “ဖုပှၢ်တဘိခ့းနီးကၠး” (တံနိမဲာ်ထံ)
လၢတၢ်အဲၣ်ပှၤကလုာ်ဃိ, ဟ့ၣ်ကူၣ်ကဒီးသီတမၠိ
“မ့ၢ်ကတိၤကညီကျိာ်န့ၣ်, ကျီၣ်ကျဲဒီးကျိာ်ဂၤတဂ့ၤ
နမ့ၢ်ကျီၣ်ကျဲကတိၤတၢ်, ကညီအကျိာ်ကလီၤမၢ်
ဖဲန့ၣ်ပှၤတဲဆၢက့ၤယၤ, တံနိနကးကီာ်ဘၣ်ဒး
ပယီၤကျိာ်နမ့ၢ်တသ့, တအီၣ်ဘၣ်မ့ၤသူတဃ့ (တၢ်ဆိမိၣ်လၢကဆှၢပှၤဆူကုၢ်အလီၢ်)

တဘျီအံၤ
တံနိကွၢ်ပှၤလံတကံ, အပနၢ်မဲၢ်ဖုၣ်လီၤလံ
ဆၢထၢၣ်ကူဘၣ်ထီၣ်ထဲကူ, ကိးဃါထီၣ်လၢကလုၢ်ဒူ (ကမွၤတထံၣ်)
“ဟ့း, ဘၣ်မၣ်စကါမၠါမၠါပီၠ, ကဲအကုၢ်နခံတချီ
ထံၣ်ဆံးက့ၤနကလုာ်ဃိ, ကဲပှၤထံွၣ်နၢကုၢ်အစိ
တၢ်အံၤမးနထံၣ်တတုာ်, ကဲကညီနနးတချူး
လဲၤဖၣ်အၣ်ခါပှဲၤသးဖှံ, ဟဲက့ၤအ့ၣ်လီၤဘၣ်သဒံံ
ယမ့တမ့ၢ်ကညီဖိ, တမ့ၢ်ယသးကဘၣ်ဒိ
ထံၣ်ဘၣ်ကညီဖိဒ်အံၤ, အ့ၣ်ဘၣ်တၢ်ဆံၣ်မဲတဃံၤ
ကညီဂ့ၢ်ဆိမိၣ်ဒံးအါ, တံနိကန့ၢ်သးတၢ်ဆါ

၅.၁၁.၂၀၀၃
(ဟံးန့ၢ််အီၤလၢထိၣ်ဃူဘၣ်က့ၤသပၢၤခီဒီးထါယီၤလဲထီရီၤတဖၣ်)