​ဖံ​ဖံ​အဲ​မၣ်

တံနိ(သဝီတါ)

“လါသလ့ၤ”,ဆၣ်ပှဲၤမူဒီ, ကညီဖိမၤနံၣ်ထီၣ်သီ
ကဖဲးခုးကဖဲးသံၣ်ဂီၢ်, ဟးဃုသံၣ်လီၢ်ဆၢကတီၢ်

“ထ့ကူာ်”မ့ၢ်ပှၤဖဲးဃုးလါ, ကျ့ထီၣ်ဃဲာ်လဲၤဆူပှၢ်ကျါ
ဖီထ့ကူာ်ဖးလၢသ့ၣ်ခံ, လါမံၤပှၤယုၢ်ထွဲအခံ

“သွ့ကီ”မ့ၢ်ဝဲတၢ်ကိၢ်ခါ, ပှၤလိဃ့လီၤ“ကီ” အလါ

“လါချံ” တုၤခီၤပှၤဒွဲၣ်“ကီ”, မ့ၣ်အူအီၣ်လဲးကစၢၢ်ဒီ
မုၢ်ဆါခါသဝံသဝါ, မ့ၢ်ဝဲထံသံးနိသံးလါ

“ဒ့ၣ်ညါ” အလါမ့ၢ်တုၤဃီၤ, ဘူးထီၣ်လၢတၢ်ကစူၤလီၤ
ဖီဒ့ၣ်ညါဖးထီၣ်အလါ, အိၣ်ခိးသဂၢၢ်တၢ်စူၤခါ

“လါနွံ” မ့ၢ်တၢ်စူၤလီၤသီ, ဒ့ၣ်ဖိညၣ်ဖိစံၣ်ခွ့ခီ
လီဝၢ်အဒံးကလံၤဟဲ, ပိၢ်သြထုးလီသီၣ်ခီသဲ

“လါဃီး”မူခိၣ်ထံအကျါ, ဘုမာ်ဖိမဲထီၣ်လါလါ
ဖီထိၣ်ကံၣ်ဒီးဖီဒီယၢ်, ဘိၣ်ထီၣ်ဖးထီၣ်သကုၤပှၢ်

“လါခူး”ပူၤထံဒိၣ်ဃိၣ်ယွၤ, လဲၤက့ၤတၢ်တမုာ်တလၤ
ဖီလါခူးဖးလၢပှၢ်ကျါ, မ့ၢ်ကညီဖိကံၢ်စုလါ

“ဆံးမုၢ်” တၢ်စူၤလီၤသကွ့ၤ, မုၢ်မဲာ်လါမဲာ်ဖျါထီၣ်က့ၤ
သံဂိၢ်ခါွပှ့ၤလၢပှၢ်ကျါ, ဘၣ်ဖဲဘုဒၢထီၣ်အခါ

“ဆံးဆၣ်” တၢ်ယီၤထီၣ်က့ၤလံ, မူဒီဆၣ်လါဖျါဝါဆှံ
တကီဖီ,ဂီၤ,လုး,ဝါ,ဘီ, ကွဲကနဲယူၤအီၣ်အစီ

“လါနီ” နံၣ်သိဃ့ထီလံ, ပှၤဂံာ်အီၣ်နံၣ်သိအထံ
ကူးဘုပုာ်ဘုပျၢဘုခါ, ဘၣ်ဖဲြခဲၢ်ပူၤတၢ်မၤအါ

“လါပျုၤ” မ့ၢ်ဝဲတၢ်ဂိၢ်ခါ, ဘှ့ၣ်မုၢ်ပစီၤလီၤအလါ
ဖီသ့ၣ်ြတၢ်ဒီးဖီမုၢ်ဃါ, ဖးထီၣ်လၢပစီၤထံကျါ

တနံၣ်အိၣ်တဆံခံလါ, နံၣ်ဒိၣ်အိၣ်တဆံသၢလါ
လါပျုၤနံၣ်ကတၢၢ်တဘျီ, ခီဆူသလ့ၤနံၣ်ထီၣ်သီ

လွံၢ်တီၤကညီလံာ်ဖး (၂၀၀၅)
(ဟံးန့ၢ်အီၤလၢထိၣ်ဃူဘၣ်က့ၤသပၢၤခီဒီးထါယီၤလဲထီရီၤတဖၣ်)