​ဖံ​ဖံ​အဲ​မၣ်

ကစၢၢ်ဒိၣ်အိၣ်၀ဲအလီၢ်ဖဲကီၢ်ပယီၤကလံၤထံးကီၢ်တနီသရံၣ်အပူၤဖဲတနီသရံၣ်ထံကျိထၣ်န့ၣ်လီၤ.ဘၣ်ဃးဒီး
ကစၢၢ်ဒိၣ်တၢ်ဂ့ၢ်တၢ်ကျိၤတဖၣ်အါမံၤဘၣ်တၢ်စံးကတိၤ၀ဲလၢတၢ်လီၤဆီလီၤလးအဂ့ၢ်န့ၣ်လီၤ.လၢအပူၤကွံာ်
နံၣ်တကယၤဘျဲၣ်ဒီးဆူညါခီအဆၢကတီၢ်,ကစၢၢ်ဒိၣ်မုၣ်ဃံလၤဖိတဖၣ်ကူသိး၀ဲပှၤကညီဖိဆ့မိၢ်၀ါ,ဒီးလဲၤလီၤ
လုၣ်ထံဖဲပီၣ်လဲၣ်ထံကၢၢ်ခိၣ်ဒီးထံကျိလၢထံလီၤဆူအိၣ်၀ဲတၢ်လီၢ်တဖၣ်န့ၣ်လီၤ.

ကစၢၢ်ဒိၣ်မုၣ်ဃံလၤဖိတဖၣ်ဖဲအလုၢ်ထံအခါတပာ်ဖျါထီၣ်အသးလၢပှၤအါအါဂီၢ်ဂီၢ်အမဲာ်ညါဘၣ်,လီၤဆီဒၣ်
တၢ်ဖဲပှၤအိၣ်တဂၤဖိခံဂၤဖိအဆၢကတီၢ်န့ၣ်,ပာ်ဖျါထီၣ်အသးအဃိဘၣ်တၢ်ထံၣ်အီၤခဲအံၤခဲအံၤစ့ၢ်ကီးလီၤမုၣ်
ဃံလၤဖိတဖၣ်ညီနုၢ်လဲၤလုၢ်ထံဖဲထံကျိအိၣ်၀ဲတယံၤတဘူးဒီးသ၀ီတဖျၢၣ်လၢအမ့ၢ်ပှၤကညီအိၣ်၀ဲဆိး၀ဲသ၀ီ
န့ၣ်လီၤ.မုၢ်အိၣ်၀ဲတနံၤဖဲသ၀ီတဖျၢၣ်အံၤအပူၤဖိၣ်သၣ်ခွါဖိတဂၤလဲၤတုၤ၀ဲဖဲထံကျိတဘိအနံၤဒီး, တၢ်နၢမူဘၣ်အီၤလၢဖီတဖၣ်အတၢ်နၢမူလီၤ.

လၢဖီတၢ်နၢမူအဃိဖိၣ်သၣ်ခွါဖိတဂၤအံၤကမၢကမၣ်၀ဲဒိၣ်မးလီၤ.လဲၤ၀ဲဆူညါကဒီးတစဲးဖိ,ဒီးနၢ်ဟူ၀ဲပှၤကတိၤ
တၢ်အသီၣ်ဖျါဖျါတဖျါဖျါတဖၣ်လီၤ.အ၀ဲကနၣ်ထံကနၣ်ဆး၀ဲတၢ်ကလုၢ်သီၣ်သ့ၣ်တဖၣ်အံၤလီၤဆီလီၤလးဘၣ်
အီၤဒိၣ်မးတုၤဒၣ်လဲာ်တနာ်လီၤက့ၤအကစၢ်အသးဒၣ်၀ဲဘၣ်လီၤ.လဲၤဃီၤ၀ဲဆူပှၤကတိၤတၢ်သီၣ်အလီၢ်တ
ယံၤတဘူးန့ၣ်ဒီး,ထံၣ်စိ၀ဲပိာ်မုၣ်ဃံလၤဖိတဖၣ်ဘ့ၣ်လီၤအဆ့မိၢ်၀ါတဂၤစုာ်စုာ်ပာ်ဖှိၣ်၀ဲဖဲထံကျိကၢၢ်နံၤလၢၢ်
ဘ့ၣ်ဘၣ်အိၣ်၀ဲအဖီခိၣ်န့ၣ်လီၤ.

ဖိၣ်သၣ်ခွါဖိတဂၤအံၤဆိကမိၣ်လီၤအသးထံထံဆးဆးမ့ၢ်တၢ်အံၤကမ့ၢ်တၢ်မံမီၢ်တခီဧါ.ဘၣ်ကမ့ၢ်တၢ်အနီၢ်ကီၢ်
ဧါ,ဘံၣ်လီၤအမဲာ်၀ံၤ,စီၢ်ထီၣ်က့ၤ၀ဲဒီးကွၢ်ကဒီး၀ဲ,ထံၣ်၀ဲတၢ်တမံၤဃီလၢမုၣ်ဃံလၤဖိတဖၣ်အံၤစံၣ်လီၤလုၣ်ထံ
လၢထံကျိပူၤအိၣ်ဒီးတၢ်သူၣ်ခုသးခု,နံၤက၀ဲၢ်ပျီၢ်ကဒီ၀ဲအဃိသတးဒီး,ဖိၣ်သၣ်ခွါဖိထံၣ်၀ဲဒီးအမဲာ်,နၢ်ဟူ၀ဲဒီးအ
နၢ်လီၤတံၢ်လီၤဆဲးလံဒီးသ့ၣ်ညါဘၣ်၀ဲလၢတၢ်အမ့ၢ်အတီစဲဃဲၤန့ၣ်လီၤ.မ့ၢ်၀ဲလီၤ.ပှၤသးပှၢ်တဖၣ်စံးကတိၤ၀ဲခဲ
အံၤ, ခဲအံၤလၢအဘၣ်ဃးဒီးကစၢၢ်ဒိၣ်မုၣ်ဃံလၤဖိတဖၣ်အဂ့ၢ်န့ၣ်, ဖိၣ်သၣ်ခွါဖိအံၤစ့ၢ်ကီးနၢ်ဟူဘၣ်၀ဲလီၤ.
ခဲအံၤထံၣ်ဘၣ်၀ဲလၢအမဲာ်လံ.အ၀ဲထံၣ်ကဒီး၀ဲလၢမုၣ်ဃံလၤဖိတဖၣ်လုၣ်ထံ၀ံၤ၀ဲဒီးကူကၤထီၣ်က့ၤ၀ဲဆ့မိၢ်၀ါ
တဂၤဘၣ်တဂၤစုာ်စုာ်၀ံၤ, ဟါမၢ်ကွံာ်၀ဲသတူၢ်ကလာ်န့ၣ်လီၤ.

တုၤန့ၣ်တစု,ဖိၣ်သၣ်ခွါဖိတဂၤအံၤအိၣ်တ့ၢ်၀ဲထဲတဂၤဧိၤဒီးဆိကမိၣ်မး၀ဲလၢအသးပူၤ.မုၣ်ဃံလၤဖိတဖၣ်အံၤ,
လီၤအဲၣ်လီၤကွံဘၣ်ယၤဂ့ၤဒိၣ်မးလဲၣ်.အ၀ဲသ့ၣ်အကလုၢ်ဖိဒီးအတၢ်နံၤကမှံသ့ၣ်တဖၣ်,မ့ၢ်ယသးပ့ၤနီၣ်ကသ့၀ဲ
တဘျီဘျီဒံးဧါ.မုၣ်ဃံလၤဖိတဂၤဂ့ၤတဂၤဂ့ၤမ့ၢ်တူၢ်လိာ်တ့ၢ်ယတၢ်အဲၣ်န့ၣ်ဒီး,မ့ၢ်ယကဟးဖးဒီးအီၤတစိၤဒၣ်
ယသးအံၤကသ့၀ဲဒ်လဲၣ်

စးထီၣ်ဖဲမုၢ်တနံၤန့ၣ်,ဖိၣ်သၣ်ခွါဖိအံၤလဲၤ၀ဲဆူတၢ်လီၢ်ဖဲထံကျိအိၣ်၀ဲန့ၣ်ကိးမုၢ်နံၤဒဲးလီၤ.မ့ၢ်လၢမုၣ်ဃံလၤဖိတ
ဖၣ်တလီၣ်ဖျါထီၣ်အသးအဃိ,ထံၣ်၀ဲတသ့ဘၣ်န့ၣ်လီၤ.မုၣ်ဃံလၤဖိတဖၣ်ထံၣ်ဘၣ်အီၤကိးနံၤဒဲးဖဲအဟဲလုၣ်
သကိးထံန့ၣ်လီၤ.လၢခံတနံၤ,မုၣ်ဃံလၤတဖၣ်ကူၣ်ထီၣ်၀ဲလၢကလီၣ်ဖျါထီၣ်အသးဒ်သိးဖိၣ်သၣ်ခွါဖိကထံၣ်
အ၀ဲသ့ၣ်ကသ့အဂီၢ်န့ၣ်လီၤ.ဒ်မုၣ်ဃံလၤဖိတဖၣ်ကူၣ်ထီၣ်၀ဲအသိး, လီၣ်ဖျါထီၣ်အသးဖဲလုၣ်သကိးထံ, လၢထံကျိပူၤအဆၢကတီၢ်န့ၣ်လီၤ. ဖိၣ်သၣ်ခွါဖိအံၤတုၤအနၢ်ဟူဘၣ်ပှၤကတိၤတၢ်ဒီးထံၣ်စိဘၣ်ကဒီးမုၣ်ဃံ
လၤဖိတဖၣ်အံၤအဃိသူၣ်ခုသးခု၀ဲဒိၣ်ဒိၣ်ကလဲာ်လီၤ.ဖဲမုၣ်ဃံလၤတဖၣ်လိာ်ကွဲဒီးလုၣ်ထံအခါ,ဖိၣ်သၣ်ခွါလဲၤ
ဘူးထီၣ်၀ဲလၢထံကျိနံၤဒီးဟံးန့ၢ်ခူသူၣ်၀ဲဆ့မိၢ်၀ါတဘ့ၣ်လၢမုၣ်ဃံလၤကွၢ်၀ဲအဂ့ၤကတၢၢ်တဂၤကူသိး၀ဲန့ၣ်လီၤ.

လုၣ်ထံဖဲထံကျိပူၤ၀ံၤ၀ဲဒီး,ဟဲက့ၤထီၣ်၀ဲဆူထံကျိကၢၢ်ခိၣ်,ကူထီၣ်သိးထီၣ်၀ဲဆ့မိၢ်၀ါကူသိးတဖၣ်လီၤ.လီၤဆီ
ဒၣ်တၢ်မုၣ်ဃံလၤဖိတဂၤဃုက့ၤအဆ့မိၢ်၀ါတဘၣ်လၢၤဘၣ်သတးဒီးဖိၣ်သၣ်ခွါဖိတဂၤအံၤကီၤအသးတန့ၢ်
လၢၤ၀ဲဘၣ်အဃိ,လဲၤဃီၤ၀ဲဆူမုၣ်ဃံလၤအအိၣ်ဒီးဖီၣ်ထီၣ်၀ဲအစုဖိခံခီဒီးဟ့ၣ်လီၤက့ၤ၀ဲအဆ့မိၢ်၀ါန့ၣ်လီၤ.
မ့ၢ်လၢတကူသိးထီၣ်၀ဲဒံးဘၣ်ဆ့မိၢ်၀ါအဃိထိၣ်လီၤမၢ်အသးတသ့၀ဲဘၣ်လီၤ.မ့မ့ၢ်မုၣ်ဃံလၤအဂၤတဖၣ်ထိၣ်
လီၤမၢ်အသးခဲလၢာ်လံလီၤ.


ဖိၣ်သၣ်ခွါဖိအံၤထံၣ်ဘၣ်မုၣ်ဃံလၤဖိလၢအလီၤအဲၣ်လီၤကွံဘၣ်အီၤဒိၣ်ဒိၣ်ကလဲာ်အဃိဒီးတမဲာ်ဆှးလၢၤ၀ဲ
ဘၣ်,ဒီးဃ့အဲၣ်၀ဲတကျဲလီၤ.ဒ့မုၣ်ဧၢ.မ့ၢ်လၢနဒိၣ်တၢ်ဂ့ၤလီၤအဲၣ်လီၤကွံဘၣ်ယၤဒိၣ်ဒိၣ်ကလဲာ်အဃိ, ယကီၤယသးတသ့လၢၤ၀ဲဘၣ်ဒီးယဟဲဃီၤဆူနအိၣ်လီၤ.၀ံသးစူၤဘၣ်ယၤတက့ၢ်

မုၣ်ဃံလၤဖိကွၢ်ထီၣ်ဖိၣ်သၣ်ခွါဖိအမဲာ်ဒီးနံၤကမှံထီၣ်၀ဲဖဲအမဲဟဲဖျါထီၣ်တစဲးဖိဒီးစံးဆၢက့ၤ၀ဲဒ်အံၤလီၤ.၀ဲၢ်ဖိ
ဧၢ,အတွးတအိၣ်ဘၣ်မီၣ်.ဒ့မုၣ်သ့ၣ်ညါတ့ၢ်လံ.တၢ်ကကဲထီၣ်ဒ်အံၤအိၣ်ဖျါ၀ဲလၢဒ့မုၣ်တၢ်မံမီၢ်အပူၤလံ.၀ဲၢ်ဖိအ
သးမ့ၢ်အိၣ်သၢပျၢၤလၢဒ့မုၣ်အဖီခိၣ်တီ၀ဲလိၤ၀ဲသတးဒီး၀ဲၢ်ဖိကဘၣ်ဟဲပိာ်ဒ့မုၣ်အခံဆူကစၢၢ်ဒိၣ်အိၣ်၀ဲအလီၢ်
န့ၣ်သၢၣ်.

ဖိၣ်သၣ်ခွါဖိအံၤတုၤအနၢ်ဟူဘၣ်မုၣ်ဃံလၤဖိအတၢ်စံးအတၢ်ကတိၤတဖၣ်အံၤဒီးသူၣ်ခုသးခု၀ဲဒီးအၢၣ်လီၤ၀ဲ
လၢကလဲၤပိာ်၀ဲအခံဆူကစၢၢ်ဒိၣ်န့ၣ်လီၤ.ဖိၣ်သၣ်ခွါဖိစံးတၢ်ဒ်န့ၣ်၀ံၤတဘျီဃီမုၣ်ဃံလၤဖိအဂၤတဖၣ်ဟဲအိၣ်
ဖျါထီၣ်က့ၤ၀ဲခဲလၢာ်လီၤ.မုၣ်ဃံလၤဖိတဖၣ်က့ၤကိးဖိၣ်သၣ်ခွါဖိအံၤဆူကစၢၢ်ဒိၣ်လံ.က့ၤသကိး၀ဲမီကိာ်ဒီးတုၤ
၀ဲတကူၣ်သ့ၣ်ဖဲပှၢ်လၢ်ကျါတၢ်လီၢ်တက၀ီၤန့ၣ်လီၤ.ဖိၣ်သၣ်ခွါဖိဆ့ၣ်နီၤအိၣ်ဘှံး၀ဲဖဲသ့ၣ်တထူၣ်အခီၣ်ထံးလီၤ.

မုၣ်ဃံလၤဖိတဖၣ်ထိၣ်လီၤမၢ်ကွံာ်အသးခဲလၢာ်ဒီးအိၣ်တ့ၢ်ဒၣ်ဖိၣ်သၣ်ခွါဖိတဂၤဧိၤလီၤ.အ၀ဲနၢ်ဟူ၀ဲပှၤကတိၤ
တၢ်တဖၣ်,ဘၣ်ဆၣ်တထံၣ်၀ဲအနီၢ်ကစၢ်စ့ၢ်ကီးဘၣ်ဒီးကမၢကမၣ်ဘၣ်အသးတစဲးညါလီၤ.မုၣ်ဃံလၤတဂၤလၢ
အဟဲက့ၤကိးဖိၣ်သၣ်ခွါဖိအံၤ,က့ၤတဲဖျါထီၣ်တၢ်ဂ့ၢ်တဖၣ်ဆူအမိၢ်အပၢ်အမဲာ်ညါန့ၣ်လီၤ.မိၢ်ဒီးပၢ်ခံဂၤတူၢ်လိာ်
၀ဲဖိၣ်သၣ်ခွါဖိအံၤလၢကဒိးတ့ဒိးဖျီ၀ဲဒီးအဖိမုၣ်အံၤန့ၣ်လီၤ.


ဖိမုၣ်ဧၢ,ပါဒီးမိၢ်ခံဂၤတြတီသုဘၣ်.ကွၢ်ဖဲဒၣ်ဖိမုၣ်အသးလီၤ.ဖိမုၣ်မ့ၢ်ဘၣ်အသးဒီးဟဲကိးထီၣ်နတၢ်ပိာ်ခွါဆူဟံၣ်
ပူၤတက့ၢ်.ပါပါကဒိးတ့ဒိးဖျီသုန့ၣ်လီၤ.ဖိၣ်သၣ်ခွါဖိနၢ်ဟူ၀ဲတၢ်ကတိၤတဖၣ်န့ၣ်၀ံၤဒီးအမဲာ်ဟဲကပီၤထီၣ်ဒီး
ထံၣ်၀ဲလၢအဆ့ၣ်နီၤ၀ဲဖဲဟံၣ်ထူၣ်ဖးဒိၣ်တထူၣ်အခီၣ်ထံးန့ၣ်လီၤ.တၢ်လီၢ်အံၤမ့ၢ်၀ဲဒူသ၀ီဖးဒိၣ်တဖျၢၣ်ဒီးအိၣ်၀ဲ
ဒီးဟံၣ်ဒိၣ်ကျိၤသွါတဖၣ်လီၤ.ကျဲမုၢ်ဖးဒိၣ်တဘိစ့ၢ်ကီးဘၣ်တၢ်တ့ပာ်၀ဲခီဖျိသ၀ီဖးဒိၣ်အံၤခိၣ်ခံန့ၣ်လီၤ.

စှၤသီအတီၢ်ပူၤတၢ်ဒိးတ့ဒိးဖျီအမူးအံၤ၀ံၤ၀ဲဂ့ၤဂ့ၤဘၣ်ဘၣ်န့ၣ်လီၤ.ဒူဖိသ၀ီဖိတဖၣ်ဟဲ၀ဲအါအါဂီၢ်ဂီၢ်,ပှဲၤ၀ဲဒီးတၢ်
မုာ်သူၣ်မုာ်သးဒီးတၢ်သူၣ်ဖှံသးညီတဖၣ်စ့ၢ်ကီးန့ၣ်လီၤ.အိၣ်ဃုာ်ဆိးဃုာ်၀ဲတနံၣ်ဘၣ်တနံၣ်ဒီးထီၣ်ဖိ၀ဲခံဂၤန့ၣ်
လီၤ.မုၣ်ဃံလၤတဂၤအံၤဟ့ၣ်ပလီၢ်အ၀ၤလၢကအိၣ်ကဆိး၀ဲတီတီလိၤလိၤဒီးတဘၣ်လံၣ်တၢ်လီတၢ်နီတစုစု
ဘၣ်န့ၣ်လီၤ.တနံၤတခီၣ်ဖဲမုၣ်ဃံလၤဖိလဲၤဆူပှၢ်ပူၤဒ်သိးကဃုအီၣ်ဃးအီၣ်တၢ်ဒိးတၢ်လၣ်တဖၣ်လီၤ.ပာ်တီၢ်
အဖိခံဂၤဒီးအ၀ၤလီၤ.အဖိအဆံးတဂၤအသးအိၣ်ဒံး၀ဲထဲသၢနံၣ်ဒံးအဃိ,အ၀ၤဘၣ်ကွၢ်၀ဲလီၤ.မ့ၢ်လၢမိၢ်တဂၤ
လဲၤတၢ်,ဟဲက့ၤတတုၤဒံးဘၣ်ဒီးဖိဆံးတဂၤအံၤဟီၣ်၀ဲလီၤ.ဟီၣ်သကုး၀ဲတကတၢၢ်လၢၤနီတစုလၢၤဘၣ်ဒီးတဲ
အဖိဆံးဖိဒ်အံၤလီၤ.

ဖိခွါဧၢ,ဟီၣ်လၢၤတဂ့ၤမီၣ်.မိမိမ့ၢ်ဟဲက့ၤခဲကၢာ်န့ၣ်ကဟဲစိာ်ဒုးအီၣ်နၤတကွံသၣ်မံလီၤ.ဟီၣ်လၢၤတဂ့ၤဖိဒါဧၢ,
ဟီၣ်လၢၤတဂ့ၤ.ဖိဆံးဖိတဂၤအံၤတုၤအပၢ်စံးဘၣ်အီၤလၢမိၢ်တဂၤကဟဲက့ၤစိာ်ဒုးအီၣ်အီၤတကွံသၣ်မံအဃိ
တဟီၣ်လၢၤ၀ဲဘၣ်လီၤ.ဖဲမုၢ်ဟါလီၤတချုးမုၢ်လီၤနုာ်ဒံးဘၣ်ဒီးမိၢ်တဂၤဟဲက့ၤတုၤ၀ဲဒီးတၢ်ဒိးတၢ်လၣ်တဖၣ်ပှဲၤ
ကုဖးဒိၣ်အပူၤလီၤ.

ဖိဆံးတဂၤအံၤတုၤအထံၣ်၀ဲမိၢ်တဂၤဟဲက့ၤလံဒီးဃ့အီၣ်၀ဲတကွံသၣ်မံလီၤ.မ့ၢ်လၢတကွံသၣ်မံတအိၣ်၀ဲဘၣ်အ
ဃိဖိဆံးတဂၤအံၤဟီၣ်ကဒီး၀ဲလီၤ.မိၢ်တဂၤထံၣ်ဘၣ်ဖိဆံးတဂၤအံၤဟီၣ်၀ဲဒီးဃ့အီၣ်တကွံသၣ်မံအဃိ,သံကွၢ်
အ၀ၤမ့ၢ်အတဲဘၣ်ဖိဆံးတဂၤအံၤဒ်လဲၣ်န့ၣ်လီၤ့အ၀ၤစံးဘၣ်အီၤ.ဒ့မုၣ်ဧၢ,နလဲၤတၢ်အခါဖိဆံးတဂၤအံၤဟီၣ်
သကုး၀ဲ,တကတၢၢ်လၢၤနီတစုဘၣ်အဃိ.၀ဲၢ်ဖိတဲဘၣ်အီၤလၢမိကဟဲက့ၤစိာ်တကွံသၣ်မံမးဒီးတဟီၣ်လၢၤ၀ဲ
ဘၣ်လီၤ.တုၤအ၀ဲသ့ၣ်ညါတၢ်မၤအသးဒ်အံၤလံန့ၣ်ဒီးမုၣ်ဃံလၤအံၤတဘျီဃီဆဲးဆှုလီၤအခံဒီးဟီၣ်၀ဲယၢၤ၀ဲ
တကူၣ်သ့ၣ်,ဒီးစံးဘၣ်အ၀ၤ၀ဲၢ်ဖိဧၢ၀ဲၢ်ဖိကမၣ်လံ,ယစံးတ့ၢ်နၤခဲအံၤခဲအံၤလၢနကဘၣ်အိၣ်ဆိး၀ဲတီတီလိၤလိၤ
ဒီးတဘၣ်လံၣ်တၢ်လီတၢ်နီတစုတဂ့ၤန့ၣ်.့ခဲအံၤနလီတ့ၢ်လံဖိဆံးတဂၤအံၤလံ.နအိၣ်ဖဲအံၤတသ့လၢၤဘၣ်.
မုၣ်ဃံလၤစံးတၢ်ဒီးဟီၣ်၀ဲယၢၤ၀ဲနးနးကလဲာ်လီၤ.တၢ်ကလုၢ်သီၣ်ထီၣ်ကဒီး၀ဲဖိမုၣ်ဧၢ.န၀ၤန့ၣ်အိၣ်ဆိး၀ဲဖဲအံၤ
တသ့လၢၤဘၣ်.

မ့ၢ်၀ဲမုၣ်ဃံလၤအပၢ်တဂၤစံးကတိၤတၢ်ဒ်န့ၣ်၀ံၤတဘျီဃီ,သ၀ီတဖျၢၣ်အံၤဟါမၢ်ကွံာ်၀ဲသတူၢ်ကလာ်လီၤ.
၀ၤတဂၤအံၤတထံၣ်လၢၤအမါမုၣ်ဃံလၤတဂၤအံၤလၢၤဘၣ်.တထံၣ်စ့ၢ်ကီး၀ဲသ၀ီတဖျၢၣ်အံၤဘၣ်လီၤ.နၢ်ဟူ
ထွဲက့ၤ၀ဲမုၣ်ဃံလၤဟီၣ်တခီခီ,တဲတၢ်တခီခီ,အကလုၢ်ယံၤထီၣ်ဒီးယံၤထီၣ်၀ဲတုၤတနၢ်ဟူလၢၤ၀ဲဘၣ်တစုလီၤ.
အ၀ဲအိၣ်တ့ၢ်၀ဲထဲတဂၤဧိၤဖဲပှၢ်လၢ်ကျါန့ၣ်ဒီးမၤတသ့မၤတဘၣ်လၢၤ၀ဲဘၣ်.ဟီၣ်၀ဲယၢၤ၀ဲတကူၣ်သ့ၣ်,စံးကတိၤ
တၢ်ထဲတဂၤဧိၤလၢပှဲၤ၀ဲဒီးမဲာ်ထံမဲာ်နိတဖၣ်လီၤ.လၢတၢ်ကတိၤလီတၢ်ဖိတဘီအဃိန့ၣ်အ၀ဲဘၣ်လီၤဖး၀ဲဒီး
အဖိအမါလၢအအဲၣ်ဘၣ်၀ဲတဖၣ်န့ၣ်လံလီၤ. ကူၣ်၀ဲတသ့တဘၣ်လၢၤဘၣ်.

ဘံၣ်လီၤအမဲာ်ကိး၀ဲအမါလၢတၢ်ဆၢထံၣ်က့ၤ၀ဲအပူၤဒီးတလ့ၣ်လီၤအသးယၢ်ခီယၢ်ပၤဖဲပှၢ်မုၢ်ကနၢအပူၤန့ၣ်
လီၤ.တူၢ်ဘၣ်၀ဲတၢ်သူၣ်ဖှီၣ်သးဖှီၣ်အံၤတုၤမးလၢအသးကသ့ၣ်ဖးဃၣ်ဃၣ်န့ၣ်လီၤ.ဘူးထီၣ်မုၢ်ကလီၤနုာ်လံ.
ထိၣ်ဖိလံၣ်ဖိသ့ၣ်တဖၣ်ဟဲက့ၤယူၤ၀့ၤ၀ီၤဖဲအသွံတဖၣ်လၢကမံကဂဲၤ၀ဲအဂီၢ်လံနာ်သက့ဒီးတၢ်ကိၢ်တၢ်ဂီၤလီၤ
ဘၣ်အီၤဒိၣ်ဒိၣ်ကလဲာ်သတးဒီးတနီၣ်သူၣ်နီၣ်သးလၢၤ၀ဲအါအါဘၣ်. ဒီးစံးကတိၤမး၀ဲ.

ဒ့မုၣ်ဧၢ,မ့ၢ်နကပာ်တ့ၢ်ကွံာ်ယၤဒ်အံၤလီၤဧါ.ယသးအံၤကိၢ်အူကိၢ်ဖးနးမးလံ.တၢ်သူၣ်ကညီၤသးကညီၤလၢ၀ဲၢ်
ဖိဖီခိၣ်တအိၣ်လၢၤနီတစဲးဘၣ်ဧါ.ယတၢ်ဟဲ၀ံအၢနးလဲၣ်.ကအုကစွါ၀ဲန့ၣ်အခါတၢ်နၢမူဟဲဘၣ်အီၤဒီးကသါဘၣ်
၀ဲအဃိ,အသးခုၣ်လီၤ၀ဲဒီးတၢ်သူၣ်ကိၢ်သးဂီၤတဖၣ်လီၤစှၤကွံာ်၀ဲချ့သဒံးလီၤ.စီၣ်ထီၣ်အမဲာ်ဒီးထံၣ်ဘၣ်အမါ
သးဘိမုၣ်ဃံလၤဖိအိၣ်ဖျါ၀ဲဖဲအကပၤန့ၣ်လီၤ.အမါသးဘိဖီၣ်ထီၣ်အ၀ၤအစုခံခီ, ကွၢ်ထီၣ်၀ဲအ၀ၤအမဲာ်, ပှဲၤ၀ဲဒီးမဲာ်ထံမဲာ်နိဒီးစံးဘၣ်အ၀ၤဒ်အံၤလီၤ.

၀ဲၢ်ဖိ,ဒ့မုၣ်တအဲၣ်ဒိးအိၣ်လီၤဖးဒီး၀ဲၢ်ဖိနီတစဲးစဲးဘၣ်.ဘၣ်ဆၣ်ဒီးဖဲဒၣ်ပသးပမၤတသ့ကီးဘၣ်.မ့ၢ်လၢပါပါပျဲယၤ
အဃိယဟဲဆူနအိၣ်သ့မီကိာ်လီၤ.ပှၤသးပှၢ်တဖၣ်တပျဲနအိၣ်ဖဲအံၤဘၣ်၀ဲၢ်ဖိကဘၣ်က့ၤလီၤ.ဒ့မုၣ်ဧၢ၀ဲၢ်ဖိတ
အဲၣ်ဒိးက့ၤဘၣ်.သံကွံာ်ဖဲအံၤန့ၣ်ကဂ့ၤတခီလီၤ.ကညီအတၢ်စူၢ်တၢ်နာ်ဘၣ်ဃးတၢ်သူတၢ်အ၀ၤတဲတၢ်ဒ်န့ၣ်အ
ဃိဒီးဖီၣ်ဒီးကးဘၢ၀ဲအ၀ၤထးခိၣ်တဘျီဃီ,ဒီးစံးဘၣ်အ၀ၤ,၀ဲၢ်ဖိတၢ်သံတၢ်ပှၢ်တၢ်ကတိၤပှၤတဘၣ်ကတိၤဖဲတၢ်
လီၢ်အံၤနီတစုဘၣ်.၀ံသးစူၤထၢၣ်နသးတက့ၢ်မီၣ်.ဒီမိၢ်၀ၤခံဂၤဖီၣ်လိာ်သးအစုဒီးဟီၣ်ဒီးယၢၤဒီး၀ၤတဂၤစံးဘၣ်
အမါလၢသါတအဲၣ်ဒိးအိၣ်လီၤဖးဘၣ်သနာ်က့,မါတဂၤအံၤစံးဘၣ်အ၀ၤလၢကက့ၤကဒါက့ၤဆူအသ၀ီန့ၣ်လီၤ.

မ့ၢ်က့ၤတုၤဆူအသ၀ီန့ၣ်ဒီးကဘၣ်အိၣ်တီတီလိၤလိၤလီၤ.အ၀ဲကက့ၤဃ့ကညးပှၤသူၣ်က့သးပှၢ်တဖၣ်ဒ်သိး
ကတူၢ်လိာ်က့ၤအ၀ၤဖဲကစၢၢ်ဒိၣ်သ၀ီအံၤစ့ၢ်ကီးလီၤ.၀ဲၢ်ဖိဧၢ,က့ၤအိၣ်နဲတီတီလိၤလိၤတက့ၢ်.တယံာ်ဘၣ်ဒီး,ဒ့
မုၣ်ကဟဲကိးက့ၤ၀ဲၢ်ဖိဒၣ်ယၢာ်.တၢ်ဆၢကတီၢ်တအိၣ်လၢၤဘၣ်၀ဲၢ်ဖိဧၢ.ဒ့မုၣ်ကက့ၤကဒါက့ၤလီၤ.မုၣ်ဃံလၤစံး
တၢ်န့ၣ်၀ံၤဒီးဟါမၢ်ကွံာ်၀ဲတကူၣ်သ့ၣ်လီၤ.တချုးက့ၤဒံးအခါ,နဲၣ်၀ဲအ၀ၤကက့ၤအကျဲအဃိ,အ၀ၤက့ၤတုၤ၀ဲ
ဆူအသ၀ီလၢတၢ်ဆၢကတီၢ်စှၤကိာ်ဖိအပူၤန့ၣ်လီၤ

က့ၤတုၤ၀ဲဆူသ၀ီပူၤ,အိၣ်၀ဲဆိး၀ဲတီတီလိၤလိၤ,ဒ်အမါမုၣ်ဃံလၤဖိမၤလိာ်တ့ၢ်အီၤအသိးန့ၣ်လီၤ.
တယံာ်တမီၢ်ဘၣ်အဆၢကတီၢ်န့ၣ်ဒီးမုၣ်ဃံလၤဖိအ၀ၤတဂၤအံၤဖဲအဆ့ၣ်နီၤအိၣ်ကသုၣ်အသးဖဲဟါလီၤခီအ
ခါ,တၢ်နၢမူဘၣ်အီၤလၢဖီနၢမူတဖၣ်ဒီးထံၣ်ဘၣ်၀ဲအမါသးဘိမုၣ်ဃံလၤဟဲအိၣ်ဖျါထီၣ်ဖဲအမဲာ်ညါန့ၣ်လီၤ.မုၣ်ဃံ
လၤဖိနံၤကမှံထီၣ်၀ဲတုၤအမဲဖိဖျါထီၣ်တစဲးဒီးစံးဘၣ်အ၀ၤသးဘိဒ်အံၤလီၤ.၀ဲၢ်ဖိဧၢ,ပှၤသးပှၢ်သ့ၣ်တဖၣ်သးက
ညီၤဘၣ်ဒ့မုၣ်ဒိၣ်ဒိၣ်ကလဲာ်,မ့ၢ်လၢဒ့မုၣ်လဲၤဃ့ကညးအ၀ဲသ့ၣ်ဒီးမဲာ်ထံမဲာ်နိအဃိလီၤ.ပါပါစ့ၢ်ကီးကွၢ်၀ဲအလံၤ
ဖိခံဂၤအံၤလီၤအဲၣ်လီၤကွံဘၣ်အီၤအဃိသတးဒီးအဲၣ်ဒိး၀ဲလၢအလံၤဖိခံဂၤအံၤကအိၣ်ဒီးအမိၢ်အပၢ်လၢလၢ
ပှဲၤပှဲၤန့ၣ်လီၤ.ခဲအံၤပါပါပျဲလီၤယၤလၢကဟဲက့ၤကိးက့ၤ၀ဲၢ်ဖိလီၤ.

မ့ၢ်လၢအမါသးဘိမုၣ်ဃံလၤဖိဟဲကိးက့ၤအီၤအဃိ,အ၀ဲသူၣ်ခုသးခု၀ဲတုၤဒၣ်လဲာ်တဲ၀ဲလၢအဂ့ၢ်တသ့လၢၤဘၣ်
စ့ၢ်ကီးန့ၣ်လီၤ.က့ၤတုၤ၀ဲဆူကစၢၢ်ဒိၣ်သ၀ီဃံလၤလၢတၢ်ဆၢကတီၢ်စှၤကိာ်ဖိ,ဒီးထံၣ်ဘၣ်က့ၤအဖိခံဂၤဒီးအိၣ်
ဆိးက့ၤ၀ဲဖဲန့ၣ်တီတီလိၤလိၤလၢပှဲၤ၀ဲဒီးတၢ်သူၣ်ဖှံသးညီန့ၣ်လီၤ.

ဟံးန့ၢ်အီၤလၢကညီတၢ်ဒုၣ်တၢ်ထုဒီးတၢ်စူၢ်တၢ်နာ်တဖၣ်လံာ်ပူၤလၢကျိၣ်တၢ်ရၤလီၤလံာ်လဲၢ်ကရူၢ်ထုးထီၣ်ဝဲ