​ဖံ​ဖံ​အဲ​မၣ်

လၢသ၀ီပူၤတခီဖိၣ်သၣ်ခွါသၢဆံအခိၣ်ထီပျီၤဖီကမၢကမၣ်ဘၣ်အီၤဒိၣ်မးဒီးဆိကမိၣ်၀ဲ, တၢ်အံၤမ့ၢ်တၢ်ဒ်လဲၣ်, တၢ်တဘၣ်အခ့အခါလီသီၣ်လီဖျးတၢ်,ထိၣ်ကံၣ်ကိး,ထိၣ်ကံၣ်ြတးတဘၢးဘၢးအံၤမ့ၢ်အဘၣ်မနုၤလဲၣ်.ယက
သံကွၢ်ကွၢ်ယဂိၤမီၣ်ခွါတဘီနဲာ်,ယမ့ၢ်တသံကွၢ်ဘၣ်ဒီးယတသ့ၣ်ညါတၢ်မၤအသးအံၤအဂ့ၢ်ဘၣ်ဒီးသံကွၢ်၀ဲ
လၢထါတနၢ်အပူၤလီၤ.

ြကူၤနၤ, ြကူၤနၤ, ြကူၤနၤ
အခ့အခါတဘၣ်မး,
လီမိၢ်ဖျးသူထိၣ်ကံၣ်ြတး,
အခ့အခါတဘၣ်ဧီၢ်,
လီမိၢ်ဖျးသူထိၣ်ကံၣ်ကီး,
လီမိၢ်ဖျးသူထိၣ်ကံၣ်ြတး,
လီမိၢ်ဖျးသူဘၣ်မတၤ,

လီမိၢ်ဖျးသူထိၣ်ကံၣ်ကီး,
လီမိၢ်ဖျးသူဘၣ်မုၤလီၣ်,
လီမိၢ်ဖျးသူထိၣ်ကံၣ်ြတး,
ဂိၤမီၣ်ခွါစံးဘၣ်က့ၤယၤ,
လီမိၢ်ဖျးသူထိၣ်ကံၣ်ကီး,
ဂိၤမီၣ်ခွါစံးဘၣ်ယၤမီၣ်
ဂိၤမီၣ်ခွါဧီၢ်ခွါဧီၢ်ခွါ

ထီပျီၤဖီသံကွၢ်အဂိၤမီၣ်ခွါအတၢ်န့ၣ်အဂိၤမီၣ်ခွါစံးဘၣ်က့ၤအီၤတသ့တဘၣ်ဘၣ်.ဒီးနီၢ်သိမုၣ်ဖီဆိကမိၣ်လၢ
အသးကံၢ်ပူၤ, တၢ်အံၤယမ့ၢ်တစံးဘၣ်အီၤဘၣ်ဒီးတသ့ၣ်ညါဘၣ်တၢ်ဂ့ၢ်န့ၣ်ဘၣ်. ထီပျီၤဖီမ့ၢ်၀ဲဖိၣ်သၣ်ခွါ သၢဆံအခိၣ်ဒီတဂၤညါပပာ်လီၤတဲာ်အသ့ၣ်တြကၢးတဘၣ်ဘၣ်, ဒီးယဲယမ့ၢ်မုၣ်ကနီၤသၢဆံအခိၣ်ဒီတဂၤ
ညါယသ့ၣ်ညါတၢ်အဂ့ၢ်န့ၣ်လီၤတံၢ်လီၤဆဲးအဃိယကဘၣ်စံးဘၣ်အီၤသပှၢ်ကတၢၢ်လီၤ. စံးဘၣ်၀ဲလၢထါတဃ့ၤဒ်အံၤ,-

ြခဲၤငဲၤ, ြခဲၤငဲၤ, ြခဲၤငဲၤ
အခ့အခါတဘၣ်မး,
လီမိၢ်ဖျးသူထိၣ်ကံၣ်ြတး,
လီမိၢ်ဖျးသူထိၣ်ကံၣ်ြတး,
နီၢ်အံၣ်မၢၤလဲၤကပီၤကျါ,
လီမိၢ်ဖျးသူထိၣ်ကံၣ်ကီး,
နီၢ်အံၣ်မၢၤလဲၤဆူကပီၤ.
စီတခွါဧီၢ်ခွါဧီၢ်ခွါ

ထီပျီၤဖီမၤဆၢလၢတနၢ်,-
ြကူၤနၤ, ြကူၤနၤ, ြကူၤနၤ
နီၢ်အံၣ်မၢၤလဲၤဆူကပီၤ,
နီၢ်အံၣ်မၢၤဆံးဒိၣ်ဆံးထီ,
အံၣ်မၢၤလဲၤဆူကပီၤကျါ,
နီၢ်အံၣ်မၢၤဆံးဂ့ၤတဂၤ.
နီၢ်တခွါဧီၢ်ခွါဧီၢ်ခွါ

နီၢ်သိမုၣ်ဖီမၤဆၢလၢထါတဃ့ၤ,-
ြခဲၤငဲၤ, ြခဲၤငဲၤ, ြခဲၤငဲၤ
နီၢ်အံၣ်မၢၤဒိၣ်တၢ်ဂ့ၤဧီၢ်,
ဟးထီၣ်ဟးလီၤထိၣ်ကံၣ်ကီး,
နီၢ်အံၣ်မၢၤဒိၣ်တၢ်ဃံလၤ,
ဟးထီၣ်ဟးလီၤထိၣ်ကံၣ်ြတး.
စီတခွါဧီၢ်ခွါဧီၢ်ခွါ

ထီပျီၤဖီအိၣ်ထွဲဘၣ်ထွဲဘၣ်နၢ်ဟူကဒီးထိၣ်ကံၣ်ြတး, လီပိၢ်လီသဲကဒီးလံ.ဆိကမိၣ်၀ဲလၢအသး, တၢ်အံၤမ့ၢ်ဒ်နီၢ်သိမုၣ်ဖီတဲအသိးန့ၣ်ဧါ.ယကသံကွၢ်ကဒီးနီၢ်သိ

မုၣ်ဖီလီၤ. မၤထီၣ်၀ဲလၢထါတနၢ်ဒ်အံၤ,-
ြကူၤနၤ, ြကူၤနၤ, ြကူၤနၤ
အခ့အခါတဘၣ်မး,
လီမိၢ်ဖျးသူထိၣ်ကံၣ်ြတး,
အခ့အခါတဘၣ်ဧီၢ်,
လီမိၢ်ဖျးသူထိၣ်ကံၣ်ကီး,
လီမိၢ်ဖျးသူထိၣ်ကံၣ်ကီး,
လီမိၢ်ဖျးသူဘၣ်မုၤလီၣ်,

နီၢ်သိမုၣ်ဖီစံးဆၢလၢထါ-တဃ့ၤ,- ြခဲၤငဲၤ, ြခဲၤငဲၤ, ြခဲၤငဲၤ
လီမိၢ်ဖျးသူထိၣ်ကံၣ်ြတး,
အံၣ်မၢၤဟဲက့ၤကပီၤကျါ,
လီမိၢ်ဖျးသူထိၣ်ကံၣ်ကီး,
အံၣ်မၢၤဟဲက့ၤလၢကပီၤ,

ထီပျီၤဖီဆိကမိၣ်လၢအသး,ပိာ်မုၣ်တဂၤဟးထီၣ်ဟးလီၤဒီးထိၣ်ကံၣ်ကွၢ်လီၤထိၣ်ကံၣ်ကီး,လီလၢမူခိၣ်ကွၢ်လီၤ
ထံၣ်လီသဲလီဖျးတၢ်ဒုမ့ၢ်ကဂ့ၤဆံးဒိၣ်လဲၣ်. မ့ၢ်အမၤအသးတဘၢးလဲၣ်, မိၣ်ထံၣ်ဘၣ်ယသးတဘီကီးလီၤ. ယကမၢနီၢ်သိမုၣ်ဖီလဲၤကိးန့ၢ်ယၤတဘီလီၤ.ယကဒုးနဲၣ်ယဂံၢ်ယဘါယတၢ်သးဒူဒီးကကွၢ်၀ဲဒီးကဘၣ်ကီး၀ဲအ
သးလီၤ. အဃိအ၀ဲမၤအိၣ်နီၢ်သိမုၣ်ဖီလၢထါတနၢ်ဒ်အံၤလီၤ.
အခ့အခါကဘၣ်မး,
အခါဘၣ်ပှၤကထိၣ်မး,
အခ့အခါဘၣ်တ့ၢ်မီၣ်,
အခါဘၣ်ပှၤကထိၣ်လီၤ,
အခါဘၣ်ပှၤကထိၣ်မး,
နီၢ်အံၣ်မၢၤလဲၤကိးန့ၢ်ယၤ,
အခါဘၣ်ပှၤကထိၣ်လီၤ,
နီၢ်အံၣ်မၢၤလဲၤကိးန့ၢ်အီၤ,
နီၢ်အံၣ်မၢၤလဲၤကိးန့ၢ်ယၤ,
ထီပျီၤသးတံးကပၠးမး,
နီၢ်အံၣ်မၢၤလဲၤကိးန့ၢ်အီၤ,
ထီပျီၤသးတံးကပၠးလီၤ.

သိမုၣ်ဖီဧီၢ်ဖီဧီၢ်ဖီ
နီၢ်အံၣ်မၢၤဒိၣ်တၢ်ဂ့ၤမး,
ဟးထီၣ်ဟးလီၤထိၣ်ကံၣ်ြတး,
နီၢ်အံၣ်မၢၤဒိၣ်တၢ်ဂ့ၤဧီၢ်,
ဟးထီၣ်ဟးလီၤထိၣ်ကံၣ်ကီး
စီတခွါဧီၢ်ခွါဧီၢ်ခွါ

လီမိၢ်ဖျးသူထိၣ်ကံၣ်ြတး,
လီမိၢ်ဖျးသူဘၣ်မတၤ,
လီမိၢ်ဖျးသူဘၣ်မတၤ,
သိမုၣ်ဖီစံးဘၣ်က့ၤယၤ,
လီမိၢ်ဖျးသူဘၣ်မုၤလီၣ်,
သိမုၣ်ဖီစံးဘၣ်ယၤမီၣ်.
နီၢ်တခွါဧီၢ်ခွါဧီၢ်ခွါ


နီၢ်သိမုၣ်ဖီတခီဒ်ထီပျီၤဖီမၢအီၤအသိးမုၢ်ဆ့ၣ်ထီၣ်လဲၤ၀ဲဆူနီၢ်အံၣ်မၢၤအဟံၣ်လီၤ.လဲၤ၀ဲတုၤဖဲအဟံၣ်ကိာ်ဒ့
ကိးစိ၀ဲ,အိ,ခွါမုၣ်,မဆါအံၤပကထိၣ်ခုး,မ့ၢ်နကလဲၤဃ့ၢ်လဲၤဟးကွၢ်ကီကွၢ်ဒိးတၢ်စ့ၢ်ဧါ.နီၢ်အံၣ်မၢၤစံးဆၢက့ၤနီၢ်
သိမုၣ်ဖီ,ခွါမုၣ်ဧၢ,ယလဲၤဒီးနသိးတသ့ဘၣ်,ယဲယရံးတိၢ်ပီၤလံ.ယလဲၤလၢမုၣ်ကနီၤဖိၣ်သၣ်ခွါအဆူးအကျါတ
သ့လၢၤဘၣ်.နဲနမုၣ်သဘျ့လဲၤဒၣ်နဲလီၤ,ခွါမုၣ်ဧၢ.ဒီးနီၢ်သိမုၣ်ဖီက့ၤက့ၤ၀ဲဆူအဟံၣ်ကတဲာ်ကတီၤထီၣ်အသး
ဒီးအသကိးမုၣ်သၢဆံဂၤ, တဆ့ထီၣ်အကုဖှဲၣ်ဂၤဒုဂၤဒု၀ံၤလဲၤဆူခုးလၢအကဘှဲၣ်ဘုအဂီၢ်လီၤ. မ့မ့ၢ်ပိာ်
ခွါတဖၣ်လဲၤပာ်လၢညါဒ်သိးကထိၣ်ခုးလဲၤကျီပာ်မှါဘိလီၤ.အ၀ဲသ့ၣ်ကျီမှါဘိ၀ံၤဒီးအိၣ်ခိးပိာ်မုၣ်လၢအကဘှဲၣ်
ဘုဆူမှါပူၤအဂီၢ်လီၤ.အ၀ဲသ့ၣ်စူးရိအိၣ်၀ဲလၢတၢ်လူၢ်ခိၣ်ထဲပိာ်ခွါဒီးကွၢ်လီၤတၢ်ဆူတၢ်လူၢ်အကပၤလိၤဒီးကွၢ်
လီၤပိာ်မုၣ်တဖၣ်ဟဲထီၣ်ဒ်သိးအကထံၣ်ဘၣ်နီၢ်အံၣ်မၢၤအဂီၢ်လီၤ.ထီပျီၤဖီကွၢ်ဃုနီၢ်အံၣ်မၢၤလၢပိာ်မုၣ်သၢဆံ
ဂၤအဆူးအကျါန့ၣ်တထံၣ်န့ၢ်ဘၣ်၀ဲဘၣ်.ဒီးထီပျီၤဖီဆိကမိၣ်၀ဲလၢအသး,တၢ်လၢနီၢ်အံၣ်မၢၤအံၤအနီၢ်ဆံးအ
ဃိပလံာ်အသးလၢအဂိၤမီၣ်အကျါ,အဂိၤဒံဂိၤမီၣ်အကဆူးကတ့ၤသ့ဒီးယတထံၣ်ဘၣ်.မ့မ့ၢ်တုၤယဒုးနဲၣ်ယ
တၢ်သးဒူတဘျီဒုကနံၤထီၣ်၀ဲဟံဟံဒီးယကထံၣ်အီၤအခါဖဲန့ၣ်လီၤ.ခဲအံၤယကဘၣ်ထိၣ်ခုးလီၤ.ယကဒုးနဲၣ်
ယတၢ်သးဒူလီၤ.ထီပျီၤဖီကဒုးနဲၣ်အတၢ်သးဒူအဂီၢ်မၤ၀ဲလၢထါတနၢ်အပူၤဒ်အံၤ,-

ြကူၤနၤ, ြကူၤနၤ, ြကူၤနၤ
ခွါသၢဆံအခိၣ်မ့ၢ်ယၤ,
စုနွံဃံၤယခီၣ်နွံထါ,
ခွါသၢဆံအခိၣ်ယၤဧီၢ်,
နွံဃံၤနွံထါစုဒီးခီၣ်,
စုနွံဃံၤယခီၣ်နွံထါ,
ဆူၣ်ဒ်ကဆီတံၢ်အဖါ,
ဆူၣ်ဒ်ကဆီတံၢ်အဖါ,
ဖျဲၣ်ဒ်ခ့ဖါမ့ၢ်မီၤယၤ,

မုၣ်ကနီၤသၢဆံအခိၣ်နီၢ်သိမုၣ်ဖီတခီတတ့ၢ်စၢ်အသးဘၣ်, ဟံးထီၣ်အဖျဲၣ်ဒ်ခ့ဖါမ့ၢ်မီၤယၤ,
မှါဘိသၢဆံယထိၣ်မး,
စုခံခီမှါဘိခံဘိ,
ကိာ်ပူၤဧီၢ်မှါဘိတဘိ,
စုဒီးခီၣ်ဆဲးခွဲးဆဲးခွဲး,
မတၤမုၣ်ကဘှဲၣ်ယၤလဲၣ်, ကဘှဲၣ်ယၤလဲၣ်
ဆဲးခွဲးဆဲးခွဲးစုဒီးခီၣ်,
မတၤမုၣ်ကဘှဲၣ်ယၤလီၣ်, ကဘှဲၣ်ယၤလီၣ်.



ကုဖှဲၣ်၀ံၤဘျးတဆ့လီၤ၀ဲယၢ်ခီဘှဲၣ်ထီပျီၤဖီလီၤ.မၤဆၢ၀ဲလၢထါတဃ့ၤန့ၣ်လီၤ.
ြခဲၤငဲၤ, ြခဲၤငဲၤ, ြခဲၤငဲၤ
မုၣ်သၢဆံအခိၣ်မ့ၢ်ယၤ,
လၢၣ်လီၤဆၢၣ်လၢသ့ၣ်ခၣ်လာ်,
ဆုဘုတြတုးသ့ၣ်ခၣ်လာ်,
ဆုဘုတြတုးသ့ၣ်လၣ်၀း,
ဆုဘုတြတုးသ့ၣ်လၣ်၀း,
ဘု၀ါဆဲးဖျိဆၢၣ်ချၢမး,
ဆုဘုတြတုးသ့ၣ်လၣ်လီၤ,
ဘု၀ါဆဲးဖျိဆၢၣ်ချၢဧီၢ်,

တုၤနုၤတဘျီထီပျီၤဖီဒီးနီၢ်သိမုၣ်ဖီဒီးအသကိးမုၣ်မုၣ်ခွါခွါထိၣ်အခုးဘှဲၣ်ခုး၀ံၤ၀ဲဒၣ်လီၤ.ထီပျီၤဖီမ့ၢ်ပိာ်ခွါတဂၤ
လၢအမိၢ်အပၢ်အဲၣ်တီန့ၢ်အီၤဒီးနီၢ်သိမုၣ်ဖီလီၤ.အ၀ဲသ့ၣ်အီၣ်ဃံးအီၣ်ဃီၣ်၀ံၤလံဒီးမၢနီၢ်သိမုၣ်ဖီအိၣ်လၢ်အီၤဒီး
အိၣ်လၢ်၀ဲလီၤ.ထီပျီၤဖီန့ၣ်အမိၢ်အပၢ်မၢအလဲၤမၤလိတၢ်ကူၣ်ဘၣ်ကူၣ်သ့လၢကဆီတံၢ်ဒီးအဂံၢ်အဘါဆူၣ်ထဲ
ကဆီတံၢ်တဒုလီၤ.နီၢ်သိမုၣ်ဖီစ့ၢ်ကီးအမိၢ်အပၢ်မၢအလဲၤမၤလိအသးလၢတၢ်အူလီၤ. သ့မးစ့ၢ်ကီးလီၤ. 

တုၤအ၀ဲခံဂၤဟဲက့ၤတုၤဒီးဒ်အမိၢ်အပၢ်ခံခီအၢၣ်လီၤလိာ်အသး,အီၣ်ဃံးအီၣ်ဃီၣ်ဒီးသ့ၣ်မုၢ်နံၤဖးမုၢ်သီအသိး
ကတ့ကဖျီ၀ဲလီၤ.ဘၣ်ဆၣ်ဒီးတုၤနီၢ်အံၣ်မၢၤလဲၤမၤလိတၢ်ဟဲက့ၤတုၤဟံၣ်သတးဒီးထီပျီၤဖီနၢ်ဟူနီၢ်အံၣ်မၢၤ
န့ၣ်ဒိၣ်တၢ်ဂ့ၤမးဒီးအသးအိၣ်န့ၢ်၀ဲနီၢ်အံၣ်မၢၤလီၤ.အမိၢ်အပၢ်ကအီၣ်က့ၤအမူးဒီးနီၢ်သိမုၣ်ဖီန့ၣ်တဘၣ်လၢၤအ
သးဘၣ်.မုၢ်ဆ့ၣ်ထီၣ်ကဒီးတနံၤလဲၤလီၤညီ၀ဲဆူနီၢ်အံၣ်မၢၤအအိၣ်ဒီးတနၢ်တဆိလီၤ.လဲၤ၀ဲတုၤဒီးနီၢ်အံၣ်မၢၤ
အပၢ်န့ၣ်ဘၣ်လၢအဘျၣ်ဆှါထံၣ်ဃီၤထီပျီၤဖီဒီးကိးထီၣ်အီၤဆူဟံၣ်ပူၤဒီးသံကွၢ်အီၤ,ဖိဒိၣ်ဧၢ,မ့ၢ်နကလဲၤဆူ
လဲၣ်ခီလဲၣ်. အတၢ်စံးဆၢအီၤ, ဖါတံၢ်ဧၢ, ဟဲအိၣ်သကိးမုၣ်ကနီၤသၢၣ်. ဖါတံၢ်တခီစံးဆၢ,မုၣ်ကနီၤအိၣ်၀ဲသၢၣ်, ဟဲအိၣ်သကိးမီၣ်.တုၤနုၤတစုထီပျီၤဖီလဲၤထီၣ်ဆူဟံၣ်ပူၤတဲတၢ်ဒီးနီၢ်အံၣ်မၢၤအပၢ်အဖၢမုၢ်ကွၢ်ထီၣ်တၢ်ဆူတ
ကံၤခိၣ်ထံၣ်နီၢ်အံၣ်မၢၤအတနၢ်န့ၣ်ဒီး,သံကွၢ်၀ဲလီၤ.အံၣ်မၢၤပၢ်တဲဆၢအီၤလၢ,တနၢ်န့ၣ်မ့ၢ်နီၢ်အံၣ်မၢၤအတနၢ်
လီၤ.

ထီပျီၤဖီသံကွၢ်ကဒီးအီၤ,

ဘု၀ါဆဲးဖျိဆၢၣ်ချၢမး,
ဖီမ့ၤနၢမူဟီၣ်သံၣ်နါ,
ဘု၀ါဆဲးဖျိဆၢၣ်ချၢဧီၢ်,
ဖီမ့ၤနၢမူဟီၣ်က၀ီၤ,
မှါဘိသၢဘိထိၣ်ဆဲးခွဲး,
ယၤသိမုၣ်ဖီဘှဲၣ်ြဖဲးြဖဲး,
မှါဘိသၢဘိထိၣ်လီၤစှီး,
ယၤသိမုၣ်ဖီဘှဲၣ်စှီးစှီး

နဒ့တနၢ်သ့စ့ၢ်ကီးဧါ.အံၣ်မၢၤပၢ်စံးဆၢ,ယဒ့တသ့ဘၣ်,ပှၤဖိဒံဖိသၣ်လၢအဟဲအိၣ်သကိးယၤတဖၣ်လၢအဒ့သ့
န့ၣ်ယမၢအဒ့န့ၢ်ယၤလီၤ.နဲနဒ့သ့စ့ၢ်ကီးဧါ.နဒ့မ့ၢ်သ့ဒီးဒ့ကွၢ်ကွၢ်မီၣ်.ထီပျီၤဖီထုးလီၤတနၢ်န့ၣ်ဒီး၀ံာ်ထီၣ်ဒီးသုး
ကွၢ်၀ဲအပျံၤ၀ံၤဆိကမိၣ်၀ဲလၢအဘၣ်လံဒီးဒ့ကွၢ်၀ဲတနၢ်န့ၣ်သီၣ်,-
 
ြကူၤနၤ, ြကူၤနၤ, ြကူၢ်တံတူး, ြကူၣ်နံၣ်ြကူၣ်တံတူး.

အတၢ်တဘၣ်ဒံးဘၣ်, ၀ံာ်ထီၣ်သုးလီၤကဒီး၀ဲ၀ံၤဒီးဒ့ထီၣ်ကဒီး၀ဲအတၢ်သီၣ်-
ြကူၢ်နၤ, ြကူၢ်တံ, ြကူၢ်တူး.

တနၢ်န့ၣ်၀ံာ်ထီၣ်၀ံာ်လီၤသုးထီၣ်သုးလီၤ၀ဲတပူၤဘၣ်တပူၤတသ့လၢၤဘၣ်ဒီးအမဲာ်ဆှးပာ်ထီၣ်က့ၤ၀ဲလၢအလီၢ်
ကစုဒု၀ံၤဒီးဟံးထီၣ်ဒ့က့ၤ၀ဲအတနၢ်လၢအဟဲစိာ်၀ဲန့ၣ်လီၤ. အ၀ဲအုၣ်ထီၣ်ထါဒီးဒ့၀ဲဒၣ်,-

ြကူၤနၤ, ြကူၤနၤ, ြကူၤနၤ
တနၢ်ကံၣ်လၢထိၣ်ဘှၢၣ်ဘှဲ,
တနၢ်မတၤအ၀ဲလဲၣ်,
တနၢ်ကံၣ်လၢထိၣ်ဘှၢၣ်ဂီၤ,
တနၢ်မတၤအ၀ဲလီၣ်.
ြကူၤနၤနၤဧီၢ်နၤဧီၢ်နၤ

နီၢ်အံၣ်မၢၤအိၣ်လၢဒၢးပူၤဟံးထီၣ်တဃ့ၤဒီးဒ့၀ဲ,-

ြခဲၤငဲၤ, ြခဲၤငဲၤ, ြခဲၤငဲၤ
တနၢ်ကံၣ်လၢထိၣ်ဘှၢၣ်ဘှဲ,
တနၢ်အံၣ်မီလ့အ၀ဲ,
တနၢ်ကံၣ်လၢထိၣ်ဘှၢၣ်ဂီၤ,
တနၢ်အံၣ်မီလ့၀ဲလီၤ.
စီတခွါဧီၢ်ခွါဧီၢ်ခွါ

ထီပျီၤဖီဟံးထီၣ်တနၢ်ဒီးဒ့ကဒီး၀ဲ,-
ြကူၤနၤ, ြကူၤနၤ, ြကူၤနၤ
တနၢ်ကံၣ်လၢထိၣ်ဂံာ်ဂီၤ,
တနၢ်ထီပျီၤဖီ၀ဲလီၤ,
တနၢ်ကံၣ်လၢထိၣ်ဂံာ်ဘှဲ,
တနၢ်ထီပျီၤဖီအ၀ဲ
နီၢ်တခွါဧီၢ်ခွါဧီၢ်ခွါ

နီၢ်အံၣ်မၢၤမၤထီၣ်ထါ-တဃ့ၤ,-
ြခဲၤငဲၤ, ြခဲၤငဲၤ, ြခဲၤငဲၤ
တနၢ်နစံးလၢနတၢ်,
နသုးတဘၣ်ဒ့တဘၣ်,
တနၢ်နစံးလၢန၀ဲ,
နဒ့နသုးတဘၣ်လဲၣ်
စီတခွါဧီၢ်ခွါဧီၢ်ခွါ

ထီပျီၤဖီဟံးထီၣ်တနၢ်ဒီးဒ့ထီၣ်၀ဲ,-
ြကူၤနၤ, ြကူၤနၤ, ြကူၤနၤ
ဟဲတုၤဟဲအိၣ်သကိးနၤ,
ဟဲထီၣ်နဲၣ်နမဲာ်နသး,
ဟဲတုၤဟဲအိၣ်သကိးဖီ,
ဟဲထီၣ်လီၣ်ဖျါနသးမီၣ်.
နီၢ်တခွါဧီၢ်ခွါဧီၢ်ခွါ

နီၢ်အံၣ်မၢၤမၤထီၣ်ထါ-တဃ့ၤ,-
ြခဲၤငဲၤ, ြခဲၤငဲၤ, ြခဲၤငဲၤ
နီၢ်အံၣ်မၢၤရံးတိၢ်ပီၤမး,
တဟဲထီၣ်နဲၣ်အသးဘၣ်,
နီၢ်အံၣ်မၢၤနီၢ်ရံးတိၢ်ပီၤ,
ဟဲထီၣ်နဲၣ်သးတသ့ဧီၢ်.
စီတခွါဧီၢ်ခွါဧီၢ်ခွါ

ထီပျီၤဖီမၤထီၣ်ထါ-တနၢ်,-
ြကူၤနၤ, ြကူၤနၤ, ြကူၤနၤ
သဘျုၣ်ဒီးသဲးသၣ်အိၣ်ဂီၤ,
နီၢ်အံၣ်မၢၤဟဲထီၣ်အိၣ်စီ,
သဘျုၣ်ဒီးသဲးသၣ်အိၣ်အါ,
နီၢ်အံၣ်မၢၤဟဲထီၣ်အိၣ်ယၤ.
နီၢ်တခွါဧီၢ်ခွါဧီၢ်ခွါ

နီၢ်အံၣ်မၢၤမၤထီၣ်ထါ-တဃ့ၤ,-
ြခဲၤငဲၤ, ြခဲၤငဲၤ, ြခဲၤငဲၤ
သဘျုၣ်ဒီးသဲးသၣ်အိၣ်ဂီၤ,

အံၣ်မီလ့တမ့ၢ်မီၤစီ,
သဘျုၣ်ဒီးသဲးသၣ်အိၣ်အါ,
အံၣ်မီလ့တမ့ၢ်မီၤနၤ
စီတခွါဧီၢ်ခွါဧီၢ်ခွါ

ထီပျီၤဖီမၤထီၣ်ကဒီးထါ-တနၢ်
ြကူၤနၤ, ြကူၤနၤ, ြကူၤနၤ
မုၣ်အံၣ်မၢၤတနဲၣ်အသး,
အဲၣ်ကွၢ်ယၤထဲလုၢ်ထဲထါ,
အံၣ်မၢၤတနဲၣ်အသးဧီၢ်,
ထဲလုၢ်ထဲထါအဲၣ်ယၤမီၣ်.
နီၢ်တခွါဧီၢ်ခွါဧီၢ်ခွါ

နီၢ်အံၣ်မၢၤမၤဆၢလၢထါ-တဃ့ၤ,-
ြခဲၤငဲၤ, ြခဲၤငဲၤ, ြခဲၤငဲၤ
နီၢ်အံၣ်မၢၤရံးတိၢ်ပီၤမး,
ထဲလုၢ်ထဲထါတအဲၣ်နၤ,
နီၢ်အံၣ်မၢၤနီၢ်ရံးတိၢ်ပီၤ,
ထဲလုၢ်ထဲထါတအဲၣ်စီ.
စီတခွါဧီၢ်ခွါဧီၢ်ခွါ

ထီပျီၤဖီမၤထီၣ်ကဒီးလၢထါ-တနၢ်,-
ြကူၤနၤ, ြကူၤနၤ, ြကူၤနၤ
ထိးခိးညၣ်လၢထံလီၤသံး,
ယခိးမီၤနၤတၢ်လီၤဃံး,
ထံလီၤသံးထိးခိးညၣ်မး,
တၢ်လီၤဃံးယခိးပီၤနၤ
နီၢ်တခွါဧီၢ်ခွါဧီၢ်ခွါ

ထီပျီၤဖီလဲၤအိၣ်သကိးနီၢ်အံၣ်မၢၤဒီးတထံၣ်ဘၣ်နီၢ်အံၣ်မၢၤအမဲာ်ဘၣ်.နီၢ်အံၣ်မၢၤတဟဲထီၣ်နဲၣ်အသးလၢအီၤ
ဘၣ်.နီၢ်အံၣ်မၢၤအိၣ်လၢဒၢးပူၤအမိၢ်တပာ်ဖျါလၢခိနီတစုနီတဘျီဘၣ်.မ့ၢ်လၢအအိၣ်ဒီးအတၢ်အဲၣ်တီဒီးအံၣ်မီ
လ့အဃိလီၤ.ထီပျီၤဖီအမဲာ်ဆှးအသးဒိၣ်ထီၣ်ဒီးက့ၤယူၤလီၤဃီြကီၤြကီၤဒီးအသးတမုာ်ဘၣ်.အ၀ဲက့ၤတုၤ
လဲၤပှ့ၤန့ၢ်ထးမၢဒီးမၢပှၤပိာ်န့ၢ်အီၤဘီဒီးနးလၢအကကူၣ်သံအံၣ်မီလ့အဂီၢ်န့ၣ်လီၤ.အဘီကနၣ်တခီခီနီယာ်
လၣ်ဒီးအဘိတခီထဲတကွံဖူလီၤ.

တုၤနုၤတဘျီနီၢ်သိမုၣ်ဖီသံကွၢ်အတၢ်လၢထါတဃ့ၤဒ်အံၤ,-
ြခဲၤငဲၤ, ြခဲၤငဲၤ, ြခဲၤငဲၤ
လဲၤအိၣ်သကိးအံၣ်မၢၤမး,
နီၢ်အံၣ်မၢၤမ့ၢ်အဲၣ်နၤဧါ,
နီၢ်အံၣ်မၢၤလဲၤအိၣ်သကီး,
နီၢ်အံၣ်မၢၤဘၣ်အဲၣ်နၤကီး.
စီတခွါဧီၢ်ခွါဧီၢ်ခွါ


ထီပျီၤဖီတုၤအနၢ်ဟူနီၢ်သိမုၣ်ဖီအတၢ်သံကွၢ်ဒီးကတိၤထီၣ်ဖျဲးတၢ်လၢအထးခိၣ်စံး၀ဲ,ဃဲသဲမုၣ်န့ၣ်ဆိကမိၣ်၀ဲ
လၢယကအဲၣ်အီၤလီၤကါနဲာ်.ဘၣ်ဆၣ်တၢ်တုၤမုၣ်ကနီၤသၢဆံအခိၣ်သံကွၢ်တၢ်ဒီးယတစံးဆၢဘၣ်ဒီးယအိၣ်
တသ့ဘၣ်တပၢဘၣ်.ယပာ်လီၤတဲာ်အသ့ၣ်တဂ့ၤဘၣ်. ယကဘၣ်စံးဘၣ်ကဒါက့ၤအီၤလီၤ.မၤ၀ဲလၢ

ထါတနၢ်,-
ြကူၤနၤ, ြကူၤနၤ, ြကူၤနၤ
လဲၤအိၣ်သကိးအံၣ်မၢၤမး,
ဘူးလၢအံၣ်မၢၤကအဲၣ်ယၤ,
နီၢ်အံၣ်မၢၤလဲၤအိၣ်သကိး,
ဘူးလၢအံၣ်မၢၤကအဲၣ်စီ
နီၢ်တခွါဧီၢ်ခွါဧီၢ်ခွါ

နီၢ်သိမုၣ်ဖီသံကွၢ်ကဒီးလၢထါ-တဃ့ၤ,-
ြခဲၤငဲၤ, ြခဲၤငဲၤ, ြခဲၤငဲၤ
နီၢ်အံၣ်မၢၤအကလုၢ်တီ,
ညီကၣ်ညီကံးအဲၣ်ြပၣ်လီၣ်,
နီၢ်အံၣ်မၢၤအကလုၢ်ရၤ,
ညီကၣ်ညီကံးအဲၣ်ြပၣ်နၤ.
စီတခွါဧီၢ်ခွါဧီၢ်ခွါ

ထီပျီၤဖီအသးအ့န့ကတိၤထီၣ်တၢ်ဒီးစံး၀ဲ,ဃဲသဲမုၣ်တဂၤန့ၣ်ကတိၤမဲာ်ဆှးယၤတလီၢ်လီၢ်တလီၢ်လီၢ်ဆိက
မိၣ်၀ဲလၢယကအဲၣ်အီၤလီၤကါနဲာ်.ဒီးထီပျီၤဖီစံးဆၢက့ၤအီၤလၢထါတနၢ်,-
 
ြကူၤနၤ, ြကူၤနၤ, ြကူၤနၤ
ထိၣ်ခိးညၣ်လၢထံလီၤသံး,
ယကခိးအီၤတၢ်လီၤဃံး,
ထံလီၤသံးထိၣ်ခိးညၣ်မး,
တၢ်လီၤဃံးယခိးအီၤမး.
နီၢ်တခွါဧီၢ်ခွါဧီၢ်ခွါ

ထီပျီၤဖီအသးတမံအသးတမုာ်ဘၣ်လၢနီၢ်အံၣ်မၢၤတအဲၣ်အီၤဘၣ်အဃိမၢကဒီးတလိၢ်လဲၤတလိၢ်န့ၢ်အီၤဒီး
ပျဲလီၤတလိၢ်ဃီကၢ်နွံဘိဘၣ်ဆၣ်နီၢ်အံၣ်မၢၤတအဲၣ်အီၤဘၣ်.ဒီးနီၢ်သိမုၣ်ဖီသံကွၢ်ကဒီးအီၤလၢထါတဃ့ၤဒ်အ
ဖီလာ်အသိးလီၤ.

ြခဲၤငဲၤ, ြခဲၤငဲၤ, ြခဲၤငဲၤ
ထီပျီၤပျဲလီၤတလိၢ်ပၢ်,
နီၢ်အံၣ်မၢၤအဲၣ်နၤစ့ၢ်ဧါ,
ထီပျီၤပျဲလီၤတလိၢ်ဧီၢ်,
နီၢ်အံၣ်မၢၤဘၣ်အဲၣ်နၤကီး.
ထီပျီၤဖီဧီၢ်ဖီဧီၢ်ဖီ

နီၢ်အံၣ်မၢၤတဂၤအံၤမီၣ်,ယကူၣ်တမံၤဧီၢ်တန့ၢ်,ယကူၣ်တဂၤဧီၢ်ယတထံၣ်ဘၣ်.ဒီးနီၢ်သိမုၣ်ဖီတခီခိးသံကွၢ်စး
ယၤခဲအံၤခဲအံၤမၢယတဲဘၣ်စံးဘၣ်အီၤလၢမ့ၢ်နီၢ်အံၣ်မၢၤအဲၣ်ယၤဧါ,တအဲၣ်ယၤအဂ့ၢ်ကဒီး,မ့ၢ်ယကစံးဆၢ
ဘၣ်အီၤဒ်လဲၣ်.ယမ့ၢ်စံးလၢအအဲၣ်ယၤဒီးတအဲၣ်ယၤ, ယမ့ၢ်စံးလၢအတအဲၣ်ယၤဘၣ်, ယမ့ၢ်ကဒီးလၢဖိၣ်
သၣ်ခွါသၢဆံအခိၣ်,ယမဲာ်ဆှးလီၤ.ယမ့ၢ်တစံးဘၣ်က့ၤအီၤဘၣ်ဒီးအ၀ဲမ့ၢ်လၢမုၣ်ကနီၤသၢဆံအခိၣ်ယပာ်လီၤ
တဲာ်အသ့ၣ်တဂ့ၤတြကၢးဘၣ်.ဘၣ်ဆၣ်ဒီးယကဘၣ်စံးဘၣ်အီၤသပှၢ်ကတၢၢ်လီၤ.

ြကူၤနၤ, ြကူၤနၤ, ြကူၤနၤ
ထီပျီၤပျဲလီၤစီတလိၢ်,
ဘူးလၢအံၣ်မၢၤကအဲၣ်စီ,
ထီပျီၤပျဲလီၤတလိၢ်ပၢ်,
ဘူးလၢအံၣ်မၢၤကဘၣ်သး.
သိမုၣ်ဖီဧီၢ်ဖီဧီၢ်ဖီ

နီၢ်သိမုၣ်ဖီသံကွၢ်ကဒီးလၢထါ-တဃ့ၤ,-
ြခဲၤငဲၤ, ြခဲၤငဲၤ, ြခဲၤငဲၤ
နီၢ်အံၣ်မၢၤအကလုၢ်တီ,
ညီကၣ်ညီကံးအဲၣ်ြပၣ်စီ,

နီၢ်အံၣ်မၢၤအကလုၢ်ရၤ,
ညီကၣ်ညီကံးအဲၣ်ြပၣ်နၤ,
နီၢ်အံၣ်မၢၤမ့ၢ်တအဲၣ်နၤ,
ဟဲလၢအံၤမၤက့ၤဒီးယၤ,
နီၢ်အံၣ်မၢၤမ့ၢ်တအဲၣ်စီ,
ဟဲက့ၤလၢအံၤအဲၣ်ယၤမီၣ်.
စီတခွါဧီၢ်ခွါဧီၢ်ခွါ

ဟံးန့ၢ်အီၤလၢကညီတၢ်စံၣ်ဃဲၤတဲဃဲၤတဖၣ်လၢကျိၣ်တၢ်ရၤလီၤလံာ်လဲၢ်ကရူၢ်ထုးထီၣ်ဝဲ