​ဖံ​ဖံ​အဲ​မၣ်

တၢ်စံၣ်ဃဲၤအံၤမၤအသးကမ့ၢ်ဖဲခ.န(၇၀၀)အကပိာ်ကပၤဖဲလၢကီၢ်လါတဘ့ၣ်အံၤအပူၤကလုာ်ဒူၣ်အါဖုဂဲာ်
လိာ်သူၣ်ထီၣ်၀့ၢ်ကီၢ်စဲၣ်တဖၣ်လၢကပၢကြပးတၢ်အဂီၢ်လီၤ.ကလုုာ်ဒူၣ်လၢအနီၢ်ဂံၢ်အါအဂံၢ်ဆူၣ်တဖၣ်မၤနၢၤ
ကွံာ်ကလုာ်ဒူၣ်လၢအဂံၢ်စၢ်ဒီးဘှီထီၣ်တိာ်ဧိၤတာ်ဧိၤလၢကဒီသဒၢအ၀့ၢ်,၀ံၤမၤလဲၢ်ထီၣ်အကီၢ်အဃၢၤန့ၢ်လီၤ.
ပှၤလၢအပၢဘၣ်၀့ၢ်န့ၣ်ပှၤကိးလၢအမၤနၢၤတၢ်န့ၢ်လီၤ. ပှၤလၢအပၢတၢ်တဖၣ် အတၢ်ဘျၢမ့ၢ်ဒၣ်ကဟံးန့ၢ်
အီၣ်ကွံာ်ထံကီၢ်အတၢ်ထူးတၢ်တီၤဒီးဖဲအဘၣ်အသး,တၢ်မုၣ်ဘၣ်အသးန့ၣ်မၤတရီတပါမၤဖှီၣ်မၤယာ်ပှၤက
လုာ်ဂၤလၢအပၢဘၣ်၀ဲတဖၣ်န့ၣ်လီၤ.တၢ်ဂ့ၢ်အံၤမ့ၢ်၀ဲတၢ်ဒုးအိၣ်ထီၣ်တၢ်ဒုးတၢ်ယၤအခီၣ်ထံးခီၣ်ဘိန့ၣ်လီၤ.
ဘၣ်တဘျီကီၢ်တဘ့ၣ်အံၤဘၣ်တၢ်ပၢအီၤလၢာ်လၢာ်ဆ့ဆ့လၢပှၤပယီၤဖိဖဲလၢအ၀ဲသ့ၣ်မၤနၢၤကွံာ်အဒုၣ်အဒါ
အခိၣ်သ့ၣ်“တလၢၤ”အခါန့ၣ်လီၤ.ဒ်ပှၤပယီၤတဖၣ်အိၣ်ဒီးအသနူလၢမၤအၢတၢ်ဘူၣ်န့ၣ်မ့ၢ်တၢ်ကဲထီၣ်စီၤပၤအ
သိးအ၀ဲသ့ၣ်ပၢကီၢ်တဘ့ၣ်အံၤလၢတၢ်ဆူၣ်မဲၤကဲၤမဲၤအပူၤဒီးအထံဖိကီၢ်ဖိလၢအမ့ၢ်ပှၤကညီကလုာ်အံၤဘၣ်
တူၢ်ဘၣ်တၢ်အနးကတၢၢ်လီၤ.ပယီၤဃ့တၢ်ခိတၢ်သွဲဒိၣ်ဒိၣ်,မၤတရီတပါပိာ်မုၣ်ပိာ်မၢၤ,ဆီၣ်ဘံၣ်ဆီၣ်ဘၢကညီ
ကလုာ်လၢကျဲအါဘိအဃိကညီတဖၣ်အတၢ်အိၣ်မူနးန့ၢ်ဒံးကုၢ်,အၢန့ၢ်ဒံးလရာ်န့ၣ်လီၤ.ဘၣ်ဆၣ်ကညီတဖၣ်
အနီၢ်ဂံၢ်အါထီၣ်၀ဲကွ့ၢ်ကွ့ၢ်ဒီးမ့ၢ်လၢတူၢ်၀ဲတပှဲၤလၢၤဘၣ်အဃိဃုထၢထီၣ်စီၤတကဲသၣ်လၢအခိၣ်ဒီးဒုးပယီၤ
လီၤ.

စီၤတကဲသၣ်ဒုးတၢ်ဒီးပယီၤစီၤပၤစှၤသီ၀ံၤမၤနၢၤကွံာ်ပယီၤစီၤပၤလီၤ.လၢတၢ်န့ၣ်အဃိအ၀ဲကဲထီၣ်ဘၣ်
စီၤပၤဒီးဖဲအပၢတၢ်အခါကညီတဖၣ်အတၢ်အိၣ်မူကိညၣ်ထီၣ်၀ဲတစိၢ်တလီၢ်န့ၣ်လီၤ.စီၤတကဲသၣ်မ့ၢ်စီၤပၤလၢ
အဒူဒီးအဆူၣ်တဂၤလီၤ.အ၀ဲအနီပူၤန့ၣ်မၢ၀ဲပယီၤမၤတၢ်အခ့အပှၤတၢ်မၤလၢအဂီၢ်န့ၣ်လီၤ.အသကဲးပ၀းတ
ခီအိၣ်ဒီးတၢ်ဂံၢ်စၢ်အါမးန့ၣ်လီၤ.အ၀ဲအီသံးဒီးလူၤပိာ်မုၣ်လၢအဒိၣ်တၢ်ဂ့ၤန့ၣ်လီၤ. ပယီၤကိတိာ်တဖၣ်တိၢ်နီၣ်
ပာ်တၢ်ဂံၢ်စၢ်အံၤလၢအသးကံၢ်ပူၤဃဲးဃဲးန့ၣ်လီၤ.တနံၤတခီၣ်စီၤပၤစီၤတကဲသၣ်ဆ့ၣ်နီၤလၢနီပူၤစံၣ်ညီၣ်ကွီၢ်
အလီၢ်၀ံၤမၢ၀ဲပယီၤကိတိာ်တဖၣ်ဒ်အံၤ,ဖဲသုပၢတၢ်အခါသုမၤနးမၤဖှီၣ်ယပှၤကလုာ်,တၢ်လၢမၤအသးတသ့
ဘၣ်တဖၣ်သုမၢအ၀ဲသ့ၣ်မၤ၀ဲလီၤ.လၢတၢ်န့ၣ်အဃိအခဲအံၤသုကဘၣ်လိးက့ၤတၢ်အ၀ဲန့ၣ်လီၤ.

အ၀ဲအဲၣ်ဒိးမၤကၣ်တၢ်တကးဒံးဘၣ်ဒ်အမ့ၢ်စီၤပၤတဂၤအသိးပာ်ဒိၣ်ပာ်ထီအသး၀ံၤဟ့ၣ်လီၤတၢ်ကလုၢ်လၢပ
ယီၤကိတိာ်တဖၣ်ကဃုဒီးဟဲစိာ်န့ၢ်အီၤတၢ်လၢတအိၣ်လၢထံကီၢ်တဘ့ၣ်အံၤအပူၤသ့ၣ်တဖၣ်န့ၣ်လီၤ.စီၤတကဲ
သၣ်တအိၣ်ဒီးတၢ်ပလီၢ်သူၣ်ပလီၢ်သးဘၣ်.အ၀ဲဆိကမိၣ်လၢမၤနၢၤပယီၤအဃိကမၢကဲကုၢ်က့ၤပယီၤတဖၣ်တုၤ
ဒၣ်လဲာ်ဟ့ၣ်စိဟ့ၣ်ကမီၤဒံး၀ဲတၢ်လီၢ်အထီတဖၣ်၀ံၤမၢအမၤန့ၢ်တၢ်ထဲအ၀ဲတဂၤအဂီၢ်န့ၢ်လီၤ. တၢ်သ့ၣ်တဖၣ်
အံၤကဲထီၣ်တၢ်ခွဲးတၢ်ယာ်ဂ့ၤလၢပယီၤတဖၣ်အဂီၢ်ဒ်သိးကမၤန့ၢ်က့ၤအလီၢ်အလၤန့ၢ်လီၤ.တဘျီစီၤပၤစီၤတ
ကဲသၣ်မၤမူးဖးဒိၣ်ဒီးကွဲမုာ်ပယီၤကိတိာ်ပှၤခိၣ်ပှၤနၢ်လၢထံကီၢ်ပူၤလၢကဟဲမၤလၤကပီၤအီၤအဂီၢ်န့ၢ်လီၤ.
ပယီၤကိတိာ်တဖၣ်မၤလီၤအဲၣ်သးအဂ့ၤကတၢၢ်ဒ်သိးကဖျါလၢအ၀ဲသ့ၣ်ကမ့ၢ်ပှၤလၢတီဒီးထံကီၢ်အစီၤပၤန့ၣ်
လီၤ.အ၀ဲမၢအပယီၤမုၣ်လၢအဒိၣ်တၢ်ဂ့ၤတဖၣ်အိၣ်လၢစီၤပၤအကပၤဒီးဒုးအီမူၤစီၤပၤလၢသံးန့ၣ်လီၤ.

စီၤတကဲသၣ်လူၤဘၣ်အသးဒီးမၤမုာ်အသးလၢတၢ်မုာ်ဖံးမုာ်ညၣ်အဃိတနီၣ်သူၣ်နီၣ်သး,မံဘၣ်အသးဖဲအလီၢ်
န့ၣ်လီၤ.ဖဲန့ၣ်ပှၤတမှံၤတဖၣ်ထံၣ်ဘၣ်၀ဲလၢပယီၤကိတိာ်တဖၣ်စိာ်ထီၣ်စီၤပၤစီၤတကဲသၣ်၀ံၤက့ၤပာ်မံ၀ဲလၢစီၤ
ပၤအလီၢ်မံန့ၣ်လီၤ.တုၤမ့ၢ်မူး၀ံၤဒီးပှၤက့ၤလၢာ်လံန့ၣ်ပယီၤကိတိာ်တဖၣ်လဲၤနုာ်ဆူစီၤပၤစီၤတကဲသၣ်အလီၢ်
မံဒီးဟံးန့ၢ်နးဖးထီ၀ံၤကျီ၀ဲအကိာ်ဘိန့ၣ်လီၤ.စီၤပၤတကဲသၣ်အကိာ်ဘိတဲာ်၀ံၤအခိၣ်သၣ်ဃံလီၤတဲာ်လၢတၢ်
ဖီလာ်အခါအမိၢ်ပှၢ်တခီဖုထီၣ်၀ဲဒီးစံၣ်ဖိးဟုဃာ်နီအထူၣ်ဖးဒိၣ်န့ၣ်လီၤ.ပယီၤကိတိာ်တဖၣ်နံၤဃီနံၤဃဲးသူၣ်
ကျၢၤသးကျၢၤ၀ံၤမၤကဆှီကွံာ်ဒၢး,ထွါကွံာ်တၢ်သွံၣ်တဖၣ်,မၤဘၢကွံာ်စီၤတကဲသၣ်အခိၣ်၀ံၤလဲၤထုးလီၤ၀ဲစီၤ
ပၤစီၤတကဲသၣ်အစိၣ်လၢနီအထူၣ်လိၤတန့ၣ်ဘၣ်.အ၀ဲသ့ၣ်ကိးန့ၢ်ပှၤသ့ပှၤဘၣ်လၢထံကီၢ်ဒီဘ့ၣ်အပူၤ,ဒ်သိး
ကထုးလီၤကွံာ်စီၤတကဲသၣ်အမိၢ်ပှၢ်သနာ်က့မၤ၀ဲတန့ၢ်ဘၣ်.ပယီၤကိတိာ်တဂၤလၢ်လၢ်ကဲထီၣ်စီၤပၤဒီးပၢတၢ်
သနာ်က့စီၤပၤစီၤတကဲသၣ်အမိၢ်ပှၢ်တခီဖိးဟုဃာ်ဒၣ်နီထူၣ်တုၤအခဲအံၤလီၤ.တၢ်တဲတခီတ၀ံၤဖဲန့ၣ်ဘၣ်.တၢ်
စံၣ်စိၤတဲစိၤ၀ဲလၢတၢ်စံးပာ်အိၣ်တခါဒီးတၢ်စံးပာ်အံၤထံကီၢ်ဒီတဘ့ၣ်အပူၤရၤလီၤအသးဒီးပှၤကိးဂၤဒဲးတူၢ်လိာ်
၀ဲလီၤ.တၢ်စံးပာ်တခီဟဲသးဒ်အံၤ-

မုၢ်တနံၤန့ၣ်စီီၤတကဲသၣ်အခိၣ်သၣ်ဃံအံၤကဟဲက့ၤဆီလီၤအသးလၢစီၤတကဲသၣ်အလိၤဒီးကပၢက့ၤထံကီၢ်
လၢတၢ်မုာ်တၢ်ခုၣ်တၢ်ဒိၣ်ထီၣ်ထီထီၣ်လၢပှၤထံဖိကီၢ်ဖိကိးဂၤဒဲးအဂီၢ်န့ၣ်လီၤ. တချုးလၢအခိၣ်သၣ်ဃံအံၤဟဲ
က့ၤဆီလီၤဒံးဘၣ်န့ၣ်ကညီကလုာ်တခီဘၣ်ကံၢ်တူာ်အယီၢ်ဒ့ဃံးဃံး,ကတီၤပာ်ဖံဘၣ်ခိၣ်ကျၢၤကျၢၤလၢကတူၢ်
ဘၣ်ဒံးကလုာ်ဂၤအတၢ်မၤအၢမၤနးဒိၣ်ဒိၣ်မုၢ်မုၢ်တဖၣ်န့ၣ်လီၤ.