​ဖံ​ဖံ​အဲ​မၣ်

ပှၤသးပှၢ်လၢပျၢၤစံးပာ်၀ဲဒ်အံၤ,
ပှၤချုးန့ၢ်ထူမ့ၢ်မီၤနၤ
ပှၤချုးန့ၢ်ယွၤမ့ၢ်မီၤနၤ
သ့ၣ်လၣ်ကတိၤနသ့ၣ်ညါ
၀ၣ်လၣ်ကတိၤနသ့ၣ်ညါ
တၢ်လၢဃဲာ်ဒီးဃိခံခါ
လၢလဲၣ်ခီကဲထီၣ်လၢညါ

လၢပျၢၤန့ၣ်ပှၤသးပှၢ်ခံဂၤသံကွၢ်လိာ်အသးဒီးတဲအါလိာ်အသး, အ၀ဲတဂၤတဲ၀ဲလၢဃိကဲထီၣ်လၢညါ,ဒီးအ
ဂၤတဂၤတဲ၀ဲဃဲာ်ကဲထီၣ်လၢညါ, ဃဲာ်န့ၣ်ဘၣ်တ့ဃိ,ဃိန့ၣ်ဘၣ်တ့ဃဲာ်တဲအါလိာ်အသးခံဂၤန့ၣ်လီၤ.
စံးကဒီး၀ဲလၢထါဒ်အံၤ,

ယလဲၤဃ့ၢ်လၢမးခဲဒီ
ယလဲၤဟးလၢမးခဲဒီ
ဒံမုၣ်မံကဘီကဘီ
ဒံခွါမံကဘီကဘီ
ဃဲာ်တအိၣ်လၢပအီၣ်ဆှီ
ဒီတအိၣ်လၢပအီၣ်ဆှီ
မုၢ်ဃါကွံာ်လီၤဃဲာ်ဒီးဒီ
အီၣ်ဆှီအီၣ်ဆှီနီၢ်ဒီးစီ

မးခဲဒီစံးတၢ်န့ၣ်မ့ၢ်၀ဲကစၢၢ်လၢတၢ်ယီၤခါ, လၢမ့ၣ်အူအီၣ်ပျီလ့ၤတဖျၢၣ်န့ၣ်လီၤ.နီၢ်ဒီးစီခံဂၤန့ၣ်လဲၤသူၣ်
လီၤဒံမုၣ်တမုၢ်ဒီးဒံခွါတမုၢ်ဖဲကစၢၢ်အ၀ဲန့ၣ်အဒီခိၣ်န့ၣ်လီၤ.တုၤလၢတၢ်စူၤလီၤတဘျီန့ၣ်မးခဲလၢအမ့ၢ်မးအံး
ဟဲမဲထီၣ်ခဲထီၣ်၀ဲလီၤ.တုၤမ့ၢ်တၢ်ယီၤထီၣ်န့ၣ်နီၢ်ဒီးစီခံဂၤလဲၤဃုအီၣ်က့ၤအဒံသၣ်ဒီးဒ့အီၣ်၀ဲဒံသၣ်လၢကအီၣ်
၀ဲအဂီၢ်ဘၣ်ဆၣ်ဃဲာ်တအိၣ်ဒီတအိၣ်လၢကကိအီၣ်ဆှီအီၣ်၀ဲအဂီၢ်ဘၣ်.မုၢ်ဃါအိၣ်လၢမူကပိာ်လိၤထံၣ်လီၤပှၤ
ခံဂၤအံၤသးကညီၤဘၣ်၀ဲအဃိကွံာ်လီၤန့ၢ်အ၀ဲသ့ၣ်လၢဃဲာ်တဘ့ၣ်ဒီးဒီတဘ့ၣ်န့ၣ်လီၤ.

အန့ၣ်တဘျီအ၀ဲသ့ၣ်ခံဂၤန့ၣ်ကိအီၣ်ဆှီအီၣ်ဘၣ်က့ၤ၀ဲဒံသၣ်ဒီးအီၣ်ဘၣ်က့ၤ၀ဲ၀ံၣ်၀ံၣ်ဘဲဘဲန့ၣ်လီၤ.တဘျီန့ၣ်
ပှၤဒီမါ၀ၤခံဂၤန့ၣ်စိာ်ထီၣ်က့ၤ၀ဲဃဲာ်ဒီးဒီဒီးဟဲက့ၤက့ၤ၀ဲလၢအတၢ်အိၣ်တၢ်ဆိးအလီၢ်န့ၣ်လီၤ.ဖဲန့ၣ်ပိာ်ခွါတ
ဂၤဟံးထီၣ်ဃဲာ်လဲၤကျီန့ၢ်၀ဲ၀ၣ်ကျုၣ်ပီၤ၀ံၤဟဲက့ၤတ့ထီၣ်၀ဲဃိဆီဖၣ်န့ၣ်လီၤ.တၢ်လၢဃိဆီဖၣ်န့ၣ်ပှၤကညီ
တ့န့ၢ်အီၤအဆိကတၢၢ်လၢ၀ၣ်ကျုၣ်ပီၤလီၤ.စးထီၣ်ဖဲန့ၣ်ပှၤကညီပိာ်ခွါသ့ၣ်တဖၣ်ပိာ်အါထီၣ်က့ၤ၀ဲဃဲာ်ကွါ, ဘီကဆု, ဘီဖျးဒီးတၢ်လၢအလိၣ်အကလုာ်ကလုာ်န့ၣ်မၤကဲထီၣ်၀ဲဒၣ်န့ၣ်လီၤ.

ပှၤဖးတၢ်ဖိခဲလၢာ်သ့ၣ်ဧၢ, တၢ်လၢဃိဒီးဃဲာ်ခံခါအံၤန့ၣ်ဃဲာ်ဒီးဒီန့ၣ်ကဲထီၣ်၀ဲလၢဃိအမဲာ်ညါန့ၣ်ပသ့ၣ်ညါ
ဘၣ်ပ၀ဲကိးဂၤဒဲးန့ၣ်လီၤ.

ဟံးန့ၢ်အီၤလၢကျိၣ်တၢ်ရၤလီၤလံာ်လဲၢ်ကရူၢ်ထုးထီၣ်၀ဲလံာ်ပူအပူၤ