​ဖံ​ဖံ​အဲ​မၣ်

တံနိ (သဝီတါ)
ခံနွံလွံၢ်ယဲၢ်တၢ်ယီၤခါ, လါပျုၤထီၣ်(၁၄)သီဟါ
ကွၢ်ထီၣ်ယဲလၢမူခိၣ်ဒီ, ထံၣ်စိတၢ်အၢၣ်ဒံကဖီ
ကွၢ်ထီၣ်လၢမူဆၣ်လီၤဆှု, ထံၣ်စိတၢ်အၢၣ်ဖျါကဒု
အီၤ...တၢ်ပၢၢ်ဆၢဆၣ်လၢမူခိၣ်, လီၤဆှုကဒီးသီတဖျၢၣ်

အဝဲမ့ၢ်--
သုးခိၣ်ကျၢၢ်ဖုဖုတၢ်အၢၣ်, မ့ၢ်တၢ်ပၢၢ်ဆၢဆၣ်တဖျၢၣ်
နလီၤဆှုတ့ၢ်သနာ်က့, ပသးပူၤဟါမၢ်တသ့
ပကကွၢ်က့ၤတစိၤဖိ, ဖုတၢ်အၢၣ်တၢ်လဲၤခီဖျိ
အပၢ်မ့ၢ်သးပှၢ်ဖိည့, မိၢ်သးဘိမ့ၢ်နီၢ်ပါမၠ့ၢ်
အိၣ်ဖျဲၣ်ထီၣ်လၢ “တလဲခၠီ”, ထံထၣ်စွ့ကညီသဝီ
မိၢ်သံသဒၣ်နီၢ်ဆံးခါ, ဆံးစၢ်ဝံၤဖဲအိၣ်လါံၢ်လါ

စးထီၣ်လၢတၢခွံလွံၢ်နွံ, မၤတၢ်လၢကလုာ်ဂီၢ်လံ
တၢခွံလွံၢ်ခွံထီၣ်သုးခိၣ်, ခ့ၣ်အဲၣ်ဒံၢ်အိၣ်သုးဒ့ခိၣ်
နိၣ်တၢ်မျၢၢ်တၢ်ဒုးအခါ, ရဲၣ်ကျဲၤတၢ်လၢတၢ်မဲာ်ညါ
စံၣ်ဝ့ၤဝီၤလၢကျိချံကျါ, ထီၣ်တၢ်မဲာ်ညါခးဒုၣ်ဒါ
ထီၣ်သုးရ့ၣ်ခိၣ်မံၤဖျိးစိ, မံၤဟူလၢဒုးတၢ်သ့ဃိ

တုၤဃီၤတၢခွံဃုလွံၢ်လံ, ကဲထီၣ်ဝဲသုးခိၣ်ကျၢၢ်ခံ
ထံရူၢ်ကီၢ်သဲးတၢ်သ့ၣ်ညါ, ဟ့ၣ်နီၤလီၤဆူသိၣ်ဒူကျါ
လၢတၢ်အိၣ်သးအတၢ်လိၣ်, ကဲဒူပျာ်ယၢ်ကီၢ်ရ့ၣ်ခိၣ်
လၢတၢ်မဲာ်ညါတၢ်မၤအါ, ဒုးယၤဒီးပၢြပးမူဒါ

ခံကထိလွံၢ်တၢ်အိၣ်ဖှိၣ်, KNU ခီကရဲးဖးဒိၣ်
ဆံသၢဘျီခီကရဲးအခါ, အိၣ်ဘှံးက့ၤလၢအမူဒါ
မ့ၢ်လၢမှံၤတုာ်ပှၢ်တီၤဃိ, ကဲက့ၤပှၤဟ့ၣ်ကူၣ်တၢ်ဖိ

စးထီၣ်လၢတၢခွံလွံၢ်နွံ, တုၤဆူခံကထိခံလံ
ယဲၢ်ဆံခွံယံာ်ယံာ်ထၢထၢ, နတီနဲဒီးတၢ်ပၢၢ်ဆၢ
နတၢ်အိၣ်မူဒုးနဲၣ်ဖျါ, တၢ်အဲၣ်ကလုာ်အိၣ်ဆံးအါ
နတၢ်သံကဒုးဆူၣ်ထီၣ်, တၢ်ပၢၢ်ဆၢအသးသဟီၣ်
“ကညီတၢ်ပၢၢ်ဆၢပျိၢ်ဃံ”, ဖုဧၢ,နမံၤအိၣ်တ့ၢ်လံ


ဖုဖုဧၢ...တဘျီန့ၣ်မီၣ်,
နမ့ၢ်တဲဒၣ်ဆၣ်စိရိၤ, လၢတၢ်ပၢၢ်ဆၢမူဒီလိၤ
တၢ်သဘျ့ကန့ၢ်အဂီၢ်, တၢ်ကပီၤဆှံနဟ့ၣ်ထီၣ်
နလီၤဆှုတ့ၢ်သနာ်က့, ပသးပူၤဟါမၢ်တသ့
ကွၢ်ထီၣ်လၢမူဆၣ်လီၤဆှု, ထံၣ်စိတၢ်အၢၣ်ဖျါကဒု
ကွၢ်ထွဲ “တၢ်အၢၣ်” ဆၣ်လီၤဆှု, ဟ့ၣ်တၢ်ယူးယီၣ်ကစုဒု
အီၤ...တၢ်ပၢၢ်ဆၢဆၣ်လၢမူခိၣ်, လီၤဆှုကဒီးသီတတိၣ်.

(ဟံးန့ၢ်အီၤလၢထိၣ်ဃူဘၣ်က့ၤသပၢၤခီဒီးထါယီၤလဲထီရီၤတဖၣ်)