​ဖံ​ဖံ​အဲ​မၣ်

ခံကထိဃီးဖ့ၤြဘူၤအါရံၤ, လာထီၣ်(၁၄) သီအနံၤ
ဘၣ်ဖဲမုၢ်ဃ့ၢ်လီၤကဒု, ဟါလွံၢ်နၣ်ရံၣ်လွံၢ်ဆံဃု
လၢတၢ်တမုာ်လၢ်တိာ်ပာ်, ကျိပိၢ်သီၣ်သတူၢ်ကလာ်
ဖဲန့ၣ်မၤထူရၤသိၣ်ဒူ, ဘၣ်လုၢ်ထီၣ်ကွံာ်သးသမူ
မံၤအိၣ်တ့ၢ်လၢကညီကျါ, “မၤထူရၤမါရှၣ်လါဖါ”

ခ့ၣ်အဲၣ်ယူၣ်နဲၣ်ရွဲၢ်ခိၣ်ကျၢၢ်, မူဒါပူၤနဆၢထၢၣ်ဂၢၢ်
တုၤနသးသမူကတၢၢ်, တီဒီးကလုာ်ဂၢၢ်တပၢၢ်
တၢ်မၤဂ့ၤနမၤတ့ၢ်နဲ, တၢ်စံၣ်စိၤကအိၣ်တ့ၢ်ဝဲ

တၢ်အိၣ်မူနလဲၤခီဖျိ, ပကွၢ်ကဒါတစဲးဖိ
တၢခွံလွံၢ်သၢတၢ်စူၤခါ, လါယူၤလံထီၣ် (၅)သီဟါ
အိၣ်ဖျဲၣ်လၢတီကီၠသဝီ, ဖဲအ့ၣ်ယၣ်ဝတံၣ်ကီၢ်ခီ
မိၢ်ပၢ်မ့ၢ်ဝဲပှၤမိၢ်ထံး, မါဘးသီၢ်ဒီးဂါနးတ့ၣ်
စးထီၣ်အိၣ်ကၠိယ့တဲၣ်ကိ, တုၤဖျိထီၣ်တီၤခၢၣ်သးကၠိ
ဖျိဃိးတီၤလၢပါတနီၣ်, တကူၣ်ဖၠၣ်စိမိၤလဲၤထီၣ်
ဖျိထီၣ်ဝဲဒၣ်ဖၠၣ်စိမိၤ, တၢခွံဃုဃုန့ၣ်ဝ့စိၤ

ပကွၢ်ကဒီးတစဲးဖိ, တၢ်ပၢၢ်ဆၢအတၢ်ခီဖျိ
တၢခွံဃုခံလါယူၤလံ, ပှၤကမျၢၢ်န့ၢ်ဝ့ခးသံ
ကမျၢၢ်ထီဒါပဒိၣ်ခါ, အဝဲနုာ်လီၤဃုာ်ပှၤကျါ

ဖဲတၢခွံခွံယဲၢ်နံၣ်လါ, ခီကရဲး (၁၁) ဝီအခါ
ကဲထီၣ်ဝဲပၢဆှၢရဲၣ်ကျဲၤ, ခ့ၣ်အဲၣ်န်ယူၣ်နဲၢ်ရွဲၢ်သဃဲၤ
ခရံာ်နံၣ် ၂၀၀၀ တဘျီ, တၢ်မၤခီကရဲး (၁၂)ဝီ
လၢတၢ်ဃုထၢပှၤပာ်ဂၢၢ်, ကဲထီၣ်ဝဲနဲၢ်ရွဲၢ်ခိၣ်ကျၢၢ်
ခီကရဲး (၁၃) ဝီတဝီ, ပှၤပာ်ထီၣ်ကဒီးတဘျီ
နွံနံၣ်ဘျဲၣ်မုၢ်နံၤမုၢ်နၤ, နဲၣ်ရွဲၢ်ခိၣ်ကျၢၢ်အတၢ်မၤ
ဘၣ်ခီဖျိတၢ်ကီတၢ်ခဲ, ဘၣ်ဆၣ်နတတ့ၢ်စၢ်နဲ

ဒုၣ်ဒါတၢ်ဟဲထီၣ်ဒုးပှၤ, လ့ၤတက့ၤတတူၢ်ဃၣ်သး
ဒုၣ်ဒါအတၢ်ကွဲတၢ်လွဲ, လ့ၤတက့ၤတလူၤပိာ်ထွဲ
ဒုၣ်ဒါအတၢ်ကူၣ်အၢသီ, ပာ်ဖျါဝဲတပယူာ်ဃီ
အထံရူၢ်ကီၢ်သဲးပတီၢ်, ထီန့ၢ်ဒုၣ်ဒါသၢခီၣ်ယီၢ်

မၤထူရၤနဲဒၣ်နၤဧၢ....
နသးသမူတၢ်စံၣ်စိၤ, ကအိၣ်တ့ၢ်လၢတၢ်ကွဲးလိၤ
ဖိလံၤလၢခံကမၤလိ, ကဲထီၣ်တၢ်ကွၢ်လိမၤဒိး
နနီၢ်ကစၢ်သ့ဘၣ်ဆၣ်, နမံၤတသံဝဲဒၣ်ဘၣ်
တၢ်မၤလၢနမၤတဝံၤ, နပာ်တ့ၢ်ကွံာ်တဖၣ်အံၤ
ပအၢၣ်လီၤနၤတၢ်တမံၤ, ပကမၤက့ၤတုၤအဝံၤ
မၤထူရၤက့ၤပာ်နဝဲ, မံၤသၣ်ဂ့ၤနပာ်တ့ၢ်နဲ...
ကညီဒီကလုာ်ကိးဂၤ, တစိၤသးကသ့ၣ်နီၣ်နၤ.

လၢတံနိ (သဝီတါ)
၁၈.၂.၂၀၀၈
 
(ဟံးန့ၢ်အီၤလၢထိၣ်ဃူဘၣ်က့ၤသပၢၤခီဒီးထါယီၤလဲထီရီၤတဖၣ်)