ပူၤကွံာ်အနံၣ်တကယၤဘျဲၣ်လံ လၢပှၤမၤအၢမၤနး ပှၤကညီဖိတဖၣ်အဃိ ပှၤတဒူၣ်က့ၤအိၣ်ဝဲဖဲ ကစၢၢ်ဒိၣ် အဂုာ်လာ် တယံၤတဘူးဘၣ်န့ၣ်လီၤ. ဖဲသဝီတဖျၢၣ်အပူၤန့ၣ်မုၣ်ကနီၤလိၣ်ဘိထီၣ်သီသီ အိၣ်ဝဲတဂၤ ဒိၣ်တၢ်ဃံလၤဂ့ၤမးဒီးလၢပှဲၤမးဒီးတၢ်ဆဲးတၢ်လၤကဒုလီၤတံၢ်သပှၢ်လီၤဆဲးလၢမုၣ်နီၤဖိတဖၣ်အကျါတီလိၤဒီး သူၣ်ဂ့ၤသးဝါဒ်သိးအီၤတအိၣ်နီတဂၤဘၣ်. ဘၣ်ဆၣ်ဒီး အဝဲမ့ၢ်ဖိၣ်ဃဲမုၣ်ဖိလၢ အလီၤသးကညီၤတဂၤ အမိၢ်အပၢ်သံသဒၣ်ကွံာ်အီၤဖဲအသးအိၣ် အနံၣ်တဆံအခါ ဒိး အိၣ်တ့ၢ်လၢ အဖါတံၢ် အသကိးဒီး ဘၣ်တၢ်အံးက့ၤကွၢ်က့ၤအီၤ ဂ့ၤဂ့ၤန့ၣ်လီၤ.
မုၣ်လိၣ်ဘိတဂၤအံၤ အိၣ်ဖျဲၣ်ဝဲဖဲဘုဂီၤထီၣ် ဖီဂီၤ ဖီဘီတဖၣ် ဖးထီၣ်လၢ ခုးပူၤအဆၢကတီၢ်အဃိသတးဒီး အမံၤဘၣ်တၢ်ကိးအီၤလၢ “ နီၢ်ဖီဂီၤဘီ” န့ၣ်လီၤ. အဝဲဘၣ်လဲၤမၤတၢ်လၢအဖါတံၢ်ခုးပူၤထဲတဂၤဧိၤလီၤ. အ၀ဲလဲၤမ့ၢ်တကဲသနာ်က့ အဖါတံၢ်တဒူအီၤ တကလာ်အီၤနီတစုစုဘၣ်.ဘၣ်ဆၣ်အဝဲသ့ၣ်ညါလီၤအသးလၢ တၢ်မၤအိၣ်လၢ အစုပူၤသတးဒိးမၤဝဲ လၢာ်သူၣ်လၢာ်သးန့ၣ်လီၤ. အဖါတံၢ်အဲၣ်အီၤဒီး ပာ်အီၤဒ်အဖိမုၣ် အသိးတဒူအီၤတကလာ်အီၤနီတဘျီဘၣ်သနာ်က့သ့ၣ်နီၣ်ထီၣ်က့ၤဒၣ်အမိၢ်အပၢ်ထီဘိဒီးဆိကမိၣ်လီၤဒၣ်အ
သးထီဘိလၢတၢ်ဟဲဝံအၢဒိၣ်မးန့ၣ်လီၤ. ဖဲအဝဲလဲၤမၤတၢ်ထဲတဂၤဧိၤ အခါသ့ၣ်နီၣ်ထီၣ် က့ၤအမိၢ်အပၢ်ဒီး အမဲာ်ထံလီၤထီဘိန့ၣ်လီၤ.ဘၣ်မုၢ်တနံၤလၢခုးပူၤ ဖဲအဝဲအိၣ်ဘှံးလၢသ့ၣ်ကဒုခုၣ်ယုၢ်ကလာ်အဖီလာ်ဖဲ ကလံၤသမှံၤဟဲအူထီၣ်တၢ် ကဖီကဖီအခါ အံၣ်အုထီၣ်ထါတယုၢ်စံးဝဲ-
မိၢ်ပၢ်ပာ်တ့ၢ်ဖိၣ်ဃဲယၤ
မိၢ်ပၢ်ပာ်တ့ၢ်ဆဲဃဲယၤ
အိၣ်ဖှီၣ်ယဲလၢပှၤအကျါ
ဆိးဖှီၣ်ယဲလၢပှၤအကျါ
တစိၤယၤဘၣ်အိၣ်ဖိၣ်ဃဲ
တၢ်ဟဲဝံအံၤအၢနးလဲၣ်.
မိၢ်ပၢ်ပာ်တ့ၢ်ဆဲဃဲယၤ
အိၣ်ဖှီၣ်ယဲလၢပှၤအကျါ
ဆိးဖှီၣ်ယဲလၢပှၤအကျါ
တစိၤယၤဘၣ်အိၣ်ဖိၣ်ဃဲ
တၢ်ဟဲဝံအံၤအၢနးလဲၣ်.
အံၣ်အုထါဝံၤဒီးတၢ်နၢမူဘၣ်အီၤလီၤသယုၢ်သညိမးတုၤဒၣ်လဲၣ်အမဲာ်ထံလီၤဆှူးမး ြပူၤြပူၤလၢတၢ်သ့ၣ်နီၣ်
သးသယုၢ်ဘၣ်က့ၤမိၢ်ပၢ်သးဘိ ခံဂၤအဃိန့ၣ်လီၤ. မၤအသးဒ်ပှၤတဂၤပုာ်ဘၣ်အမဲာ်လၢ သ့ၣ်လၣ်အသိးဝံၤ အဝဲအမဲာ်ကပီၤထီၣ်ဒီးထံၣ်ဘၣ်ဖိၣ်သၣ်ခွါဖိလၢ အဒိၣ်တၢ်ဂ့ၤကဆှီဂ့ၤမးတဂၤ အိၣ်ဖျါထီၣ်လၢအမဲာ်ညါန့ၣ်လီၤ.
“ ခွါမုၣ်ဃံလၤဧၢ…မ့ၢ်နဟီၣ်ထဲထဲအံၤ ဘၣ်မနုၤလဲၣ်…နတဘၣ်သးဆံးတဂ့ၤ. ထွါစီကွံာ်နမဲာ်ထံမီၣ်…” နီၢ်ဖီဂီၤဘီတခီ ထဲဟီၣ်သါတကုးဝဲန့ၣ်ဒီး တဲဆၢက့ၤ ဖိၣ်သၣ်ခွါဖိအံၤတထီၣ်ဖျဲးနီတဘျီဘၣ်. တၢ်သံကွၢ်အီၤ တဘျုးဘျီညါဘၣ်ဆၣ် ကတိၤဆၢက့ၤဝဲတထီၣ်ဘးနီတဘီဘၣ်. လၢခံကတၢၢ်ဖိၣ်သၣ်ခွါဖိအံၤ ဃၣ်တရံးအသးဒီး အတၢ်ဟါမၢ်သဒၣ်ကွံာ်အီၤလီၤ. နီၢ်ဖီဂီၤဘီ က့ၤဆူဟံၣ်သနာ်က့ တတဲဘၣ်ပှၤလၢ တၢ်နီတမံၤဘၣ်. ပာ်ဃာ်ဒၣ်ဝဲလၢအသးပူၤလီၤ. တုၤဘုသၣ်မံထီၣ်ဂီၤထီၣ် အဆၢကတီၢ် ဖဲဖီဂီၤ ဖီဘီ လၢ ခုးတဖၣ်ဖးထီၣ်အဆၢကတီၢ်န့ၣ် နီၢ်ဖီဂီၤဘီ ကူးဘုထဲတဂၤဧိၤလီၤ.
ဘၣ်မုၢ်တနံၤ အဝဲဒဲးန့ၢ်ဖီဂီၤ ဖီဘီတဖၣ်ဒီး က့ၤစိာ်ဝဲ ဒီး က့ၤအိၣ်ဘှံး ဝဲထဲတဂၤဧိၤဖဲ မုၢ်ထူၣ်အခါ သ့ၣ်နီၣ်ထီၣ်ဘၣ်က့ၤ ဖိၣ်သၣ်ခွါဖိလၢ အထံၣ်တ့ၢ်ဝဲ တဘျီတဂၤန့ၣ်လီၤ.တၢ်နၢမူဘၣ်အီၤလီၤသယုၢ်လီၤသညိ နးမးအဃိ အဝဲသ့ၣ်ညါ လၢဖိၣ်သၣ်ခွါဖိအံၤကဟဲပၢၢ်ထီၣ်သတးဒီး ကျၢ်လီၤအမဲာ်ဒီးဆုးလီၤအခိၣ်လီၤ. ဖဲအဝဲမိာ်ထီၣ်က့ၤအခိၣ်အခါထံၣ်ဘၣ်ဝဲဖိၣ်သၣ်ခွါဖိလၢအဒိၣ်တၢ်ကဆှဲကဆှီဂ့ၤမးတဂၤဆၢထၢၣ်လၢအမဲာ်ညါ ဘူးဘူးနံၤကမှံထီၣ် ဝဲဒီး ဟဲဆ့ၣ်နီၤလၢအဝဲအဃၢၤလီၤ. သံကွၢ်ဝဲ နီၢ်ဖီဂီၤဘီ…“မုၣ်ဃံလၤဧၢ…နဒိၣ်တၢ်ဃံလၤဘၣ်ယၤဂ့ၤမးလီၤ…စးထီၣ်လၢယဟဲထံၣ်လိာ်နၤတဘျီဝံၤအလီၢ်
ခံ ယဟဲဟးဆူနအိၣ်ကိးနံၤဒဲးဃၣ်ဃၣ်လီၤ…ယသးကညီၤဘၣ်နၤမ့ၢ်လၢနသးဘၣ်ဖှီၣ်အဃိ ယထံၣ်ဘၣ်နၤဒီး တၢ်မဲာ်ထံမဲာ်နိ ထီဘိန့ၣ်လီၤ. …သးဆံးတဂ့ၤနီၤ… ယကမ့ၢ်ပှၤလၢ အကမၤစၢၤနၤတဂၤလီၤ…”
“ ခွါဧၢ…ယထံၣ်နၤလၢညါတဘျီ နသံကွၢ်လၢယၤ သနာ်က့ဒီး တဲဆၢက့ၤနၤတထီၣ်ဖျဲးနီတဘီဘၣ်. ယမ့ၢ်ဖိၣ်ဃဲမုၣ်ဖိတဂၤ ဒီးတၢ်ဟီၣ်သါသကုးတဖၣ် ဟဲထီၣ်ခဲအံၤခဲအံၤလၢယသ့ၣ်နီၣ်က့ၤ ယမိၢ်ယပၢ် အဃိလီၤ…”
“ မုၣ်ဃံလၤဧၢ…သးဆံးလၢၤတဂ့ၤ ကိၢ်ဂီၤတၢ်နီတမံၤတဂ့ၤ…ဒ်သိးနကအိၣ်မုာ်အိၣ်ခုၣ်တစိၤဒၣ်နသးဒီး ယကမၤစၢၤနၤလီၤ…”
“ ခွါဧၢ…ယတထံၣ်တ့ၢ်နၤလၢညါခီနီတဘျီမးလဲၣ်… နအိၣ်နဲဖဲလဲၣ် ဒီးနမံၤဒ်လဲၣ်…”
“ ယမံၤမ့ၢ် စီၤဖီဂ့ၤခွါ ယအိၣ်ဒၣ်ဖဲ တယံၤတဘူးဒီး ကစၢၢ်အံၤလီၤ ဒီးနဲတခီနမံၤဒ်လဲၣ်”
“ ကွၢ်လၢယစိာ်အံၤဘီၣ်…ယအိၣ်ဖျဲၣ်အဆၢကတီၢ် မ့ၢ်ဝဲဖဲကူးဘုခါ ဖီဂီၤ ဖီဘီဖးထီၣ်အကတီၢ် သတးဒီး ယမိၢ်ယုၢ်န့ၢ်ယမံၤလၢ “ နီၢ်ဖီဂီၤဘီ ” န့ၣ်လီၤ. ခွါဧၢ…နဒိၣ်တၢ်ဖိဂ့ၤ နနၢမူဒီဂၤညါ တချုးနဟဲဖျါထီၣ်ဒံးဘၣ် ဟဲဆိနတၢ်နၢမူ လၢညါဒ်လဲၣ် တယၤတဘီမီၣ်…”
“မုၣ်ဃံလၤဧၢ… နမ့ၢ်တီဒီးယၤန့ၣ် ယကဟ့ၣ်နၤလၢ တၢ်နၢမူအဂ့ၤကတၢၢ်လီၤ. ကယဲၢ်ပှၤအတီအလိၤ လၢ အဟဲနုာ်ဆူ တၢ်လီၢ်အံၤန့ၣ် ကဒိးန့ၢ်ဘၣ်တၢ်နၢမူ အဂ့ၤကတၢၢ်ကိးဂၤဒဲးန့ၣ်လီၤ…”
“ ခွါဧၢ…တချုးနလီၣ်ဖျါ နသးလၢယၤဘၣ် ဒီး မၤသးဒ် နပုာ်ဘၣ် ယမဲာ်လၢ တၢ်တမံၤမံၤ အသိးန့ၣ် အခီပညီဒ်လဲၣ်…”
ဖီဂ့ၤခွါကွၢ်နီၢ်ဖီဂီၤဘီ အမဲာ်ထံထံ ဆးဆးဒီး နံၤကမှံထီၣ်ဝဲတစဲး ဖိ ဒီး ဒုးနဲၣ်အီၤလၢသ့ၣ်လၣ်ဝါတဒ့ဒီး စံးဆၢက့ၤဝဲ…
“ မုၣ်ဃံလၤဧၢ.. တၢ်အဝဲအံၤ မ့ၢ်တၢ်တီတၢ်လိၤ အသ့ၣ်လၣ်ဝါတဒ့လီၤ….နအိၣ်နဲလၢပှၤတတီတလိၤ ဘၣ် အကျါအဃိ တၢ်ဒဲးဘး ကးဘၢနမဲာ်သတး ဒီး နထံၣ်ဖျိယၤတသ့ဘၣ် အဃိ ယဘၣ်ပုာ်နမဲာ်လၢ တၢ်တီတၢ်လိၤ အသ့ၣ်လၣ်ဝါ တကလုာ် အံၤမး ဒီး နထံၣ်ဖျိယၤ လၢမဲာ်သကိးမဲာ် သ့ဝဲလီၤ…အိၣ်နဲ တီတီလိၤလိၤ တက့ၢ်…”
“ ခွါဧၢ…ယကကျဲးစၢးတီဒီးနၤ တုၤယဒိးန့ၢ်ဘၣ်ယဲ တၢ်နၢမူအဂ့ၤကတၢၢ်လၢ နအိၣ်တစုလီၤ…တဘၣ်သး ပ့ၤနီၣ်ယၤတဂ့ၤနီၤ….”
“ မုၣ်ဃံလၤဧၢ တဘၣ် ကိၢ်တဘၣ်ဂီၤတၢ်နီတမံၤတဂ့ၤ အိၣ် နဲတီတီလိၤလိၤ ဂ့ၤဂ့ၤဝါဝါ တုၤလၢ ပထံၣ်လိာ်က့ၤ ကဒီး ပသးတစုတက့ၢ်…”
စီၤဖီဂ့ၤခွါ စံးကတိၤတၢ် ဒ်အံၤဝံၤ ထွဲ ထီၣ်အခီၣ်တခါဘၣ်တခါဒီး ဃၣ်ဒူချၢ ကွံာ်အသးဒီး နီၢ်ဖီဂီၤဘီဒီး ဟါမၢ် ကွံာ်ဝဲလီၤ. နီၢ်ဖီဂီၤဘီ တခီအိၣ် တ့ၢ်က့ၤထဲတဂၤဧိၤ ကွၢ်တၢ်ဆူ အံၤဆူဘး သနာ်က့ တထံၣ်လၢၤဝဲ စီၤဖီဂ့ၤ ခွါဘၣ်န့ၣ်လီၤ.
အခါ ဖဲပှၤယီၢ်ဘုဝံၤ ဝံထီၣ်ဘုလၢ တလီပူၤဆူ ဘုဖီပူၤဝံၤလံအခါ ဘၣ်မုၢ်တနၤ လါကပီၤလီၤ ဂ့ၤမးလီၤ. နီၢ်ဖီဂီၤဘီ မံတန့ၢ်နီတရ့ဘၣ်. အဂ့ၢ်ဒ်အံၤ တၢ်နၢမူဘၣ်အီၤ လီၤသယုၢ်လီၤသညိ နးမးဒီး အဝဲသ့ၣ်နီၣ် ဘၣ်က့ၤ အခွါဃံလၤ တုၤဒၣ်လဲာ် ဘၣ်ဟးထီၣ် လၢ ဒၢးပူၤ ဒီး လဲၤဟးဆူပျီပူၤန့ၣ်လီၤ.နီၢ်ဖီဂီၤဘီ အိၣ်ဒီး အတနၢ်ဖိတခါလၢ အဒ့ညီနုၢ်ဝဲလီၤ. လါကပီၤလီၤဂ့ၤမး ဒီး အ၀ဲဆ့ၣ်နီၤထဲတဂၤဧိၤဒီး အံၣ်အုထီၣ်အတၢ် သံကျံလၢ အဒ့ညီနုၢ်တ့ၢ်ဝဲဒီး ဒ့ဃုာ်ဝဲ တခီတခီဒ်အံၤလီၤ.
ြကုၢ်နၢ်, ြကုၢ်နၢ်, တူၤလ့လ့ဧီၢ်, တူၤလ့လ့, တူၤလ့လ့ဧီၢ် တူၤလ့လ့ယဖီအံၤ, ယဖီအံၤအမဲာ်ဆှးသ့ ယဖီအံၤ ယဖီအံၤ ယဖီအံၤ အမဲာ်ဆှးသ့ဒ့တနၢ်တချုးကတၢၢ် မၤအသးဒ်တၢ်ပုာ်အမဲာ်လၢ သ့ၣ်လၢအသိး တဘျီဃီ ခွါဃံလၤအိၣ်ဖျါထီၣ်လၢ အမဲာ်ညါ ကွၢ်ဝဲနီၢ်ဖီဂီၤဘီ အမဲာ်ဃံလၤဖိဒီး နံၤကမှံထီၣ်ဝဲဝံၤ ဟဲဆ့ၣ်နီၤ ကဒီးဖဲ အ၀ဲကပၤန့ၣ်လီၤ. စီၤဖီဂ့ၤဝါတဲဘၣ်နီၢ်ဖီဂီၤဘီလၢ တၢ်ကတိၤကဖီလီ…
“မုၣ်ဃံလၤဧၢ…ယတဲယမိၢ်ယပၢ်လၢယတၢ်အဲၣ်ဘၣ်နၤအဂ့ၢ်…ဒီးနတၢ်တီတၢ်လိၤအဂ့ၢ်ဒီးအဝဲသ့ၣ်ဘၣ်အသး
ဒီးတူၢ် လိာ်ဝဲကစီဒီလီၤ. နဆိကမိၣ်နဲဒ်လဲၣ်… ယနာ်သပှၢ်တၢၢ်လၢဖဲယအိၣ်အလီၢ်န့ၣ်နကအိၣ် ဘၣ်နဲဒီး တလီၤဖးဒီးယၤ နီတစုလၢၤဘၣ်န့ၣ်လီၤ…နဘၣ်တဲစ့ၢ်ကီး နမုၢ်ဂၢ်ဖါတံၢ်လၢ တၢ်ဂ့ၢ်အံၤ ဒီး တၢ်တ့တၢ်ဖျီတခီ ယကဘၣ်သုးကျဲၤလၢ ယအိၣ်တခီလီၤ…မုၣ်ဃံလၤဧၢ နဲတခီနအၢၣ်လီၤ စ့ၢ်ကီး ဧါ..
“ ခွါဧၢ ယကမၤလၢပှဲၤနတၢ်အဲၣ်ဒိး ဒီးယကမၤမုာ်နၤထီဘိ တစိၤယသးလီၤ…
ယကတဲယမုၢ်ဂၢ် ဖါတံၢ် လၢတၢ်ဂ့ၢ်အအံၤ ခဲလၢာ်လီၤ…”
စီၤဖီဂ့ၤ ဒီးနီၢ်ဖီဂီၤဘီခံဂၤ ဖးနံၤဖးသီ တၢ်ဆၢကတီၢ်လၢ တၢ်ကဟဲဟံးန့ၢ် အီၤဝံၤ စီၤဖီဂ့ၤခွါမၤလိာ်ထွဲ က့ၤအတၢ်အဲၣ်ဃံလၤဖိ ဒ်အံၤလီၤ.
“ မုၣ်ဃံလၤဧၢ အိၣ်နဲတီတီလိၤလိၤတက့ၢ် ယကက့ၤလီၤ”
လၢတဆၢလီၤဖးဘၣ်အပူၤ ယုာ်အသးဃၢဃၢ စီၤဖီဂ့ၤခွါ ခါထီၣ်အခီၣ် တခါဘၣ်တခါ လၢတၢ်ကွၢ်ကဒါက့ၤ အမုၣ်ဃံလၤ ယံၤထီၣ် တစဲးဘၣ်တစဲးဒီး ဟါမၢ်ကွံာ်သတူၢ်ကလာ်လီၤ.
နီၢ်ဖီဂီၤဘီ အိၣ်တ့ၢ်လၢ တၢ်သယုၢ်သညိအပူၤလံ မုၢ်ဆ့ၣ်ထီၣ် အဝဲတဲဘၣ်အဖါတံၢ်တၢ်ဂ့ၢ်တၢ်ကျိၤတဖၣ်လၢ စီၤဖီဂ့ၤခွါ တဂၤအတၢ်ဟဲအခီၣ်ထံးတဘျီဒီး တုၤလၢအကတၢၢ်န့ၣ်လီၤ. နီၢ်ဖီဂီၤဘီ အဖါတံၢ် သ့ၣ်ညါ ၀ဲစ့ၢ်ကီးတၢ်မၤတ့ၢ်လံအသးဒ်အံၤတဖၣ်အိၣ်ဝဲအဃိအဝဲတတဲအါတၢ်နီတမံၤဘၣ်.အၢၣ်လီၤဝဲလၢတၢ်သူၣ်မံ
သးမံအပူၤလီၤ. တၢ်သ့ၣ်နံၤဖးသီ ဘၣ်ဃး တၢ်တ့တၢ်ဖျီစ့ၢ်ကီး ပာ်ဂၢၢ်ပာ်ကျၢၤဝဲန့ၣ်လီၤ.
ဒ်တၢ်သ့ၣ်ဆၢဖးကတီၢ်အမုၢ်နံၤဟဲဝဲအသိးမုၢ်အိၣ်ဝဲတနံၤလၢနီၢ်ဖီဂီၤဘီအဖါတံၢ်အဟံၣ်ပူၤတၢ်နၢမူနၢဆှီဒီ
ဟံၣ်ညါ ဒီး တၤသွီၣ်တဖၣ် ဟဲစံၣ်အါအါဂီၢ်ဂီၢ် လၢသ့ၣ်ခံလီၤ. ပှၤထံၣ်ဒၣ်ထဲအမ့ၢ် တၤသွီၣ် လီၤ. ဘၣ်ဆၣ် နီၢ်ဖီဂီၤဘီ အတၢ်ထံၣ်တခီ မ့ၢ်ဒၣ်ပှၤဟဲအီၣ်မူး တဖၣ်ဟဲအါအါဂီၢ်ဂီၢ် ဒီး နီၢ်ဖီဂီၤဘီ ဟါမၢ်လၢ ပှၤကွၢ်ကီတၢ်သ့ၣ်တဖၣ်အကျါလီၤ.
နီၢ်ဖီဂီၤဘီ အဖါတံၢ်ဒီး ပှၤသဝီဖိခဲလၢာ် နၢ်ပၢၢ်ဝဲလၢ အဝဲလဲၤဖျီအသးလံလၢ ပှၤတီပှၤလိၤ သ့ၣ်တဖၣ် အိၣ်ဝဲဆိးဝဲ အလီၢ်န့ၣ်လီၤ. စီၤဖီဂ့ၤခွါ ဒီး နီၢ်ဖီဂီၤဘီ ခံဂၤအံၤ ကအိၣ်ဝဲ ဒီး တၢ်နံၤကမှံ ဒီးတၢ်သူၣ်ဖှံသးညီ ဖဲ တၢ်တ့တၢ်ဖျီ အမူးန့ၣ်စ့ၣ်ကီးလီၤ. သးစၢ်ဖိခံဂၤ အတၢ်အဲၣ်တၢ်ကွံဒီး အတၢ်ဆၢမုၢ်လၢ်တဖၣ် လၢပှဲၤဝဲလံလီၤစိၤန့ၣ်လီၤ.
(ဟံးန့ၢ်အီၤလၢ “ပှၤကညီအပူတဖၣ်” အဘ့ၣ် တၢ အပူၤလၢ ပီၢ်ရီမါမၢလ့မၠးကၠီၣ်ထၢဖှိၣ်ဒီးကွဲးဝဲန့ၣ်လီၤ.)
