​ဖံ​ဖံ​အဲ​မၣ်

ဖိၣ်ဃဲန့ၣ်တၢ်ဒိလီၤအီၤလၢကညီကလုာ်ဒီးအခီပညီလိၤလိၤမ့ၢ်၀ဲပှၤလၢအမိၢ်တအိၣ်ပၢ်တအိၣ်,အခိၣ်အနၢ်လီၤ
တံၢ်လီၤဆဲးတအိၣ်ဘၣ်န့ၣ်လီၤ. ဖိၣ်ဃဲပူအံၤဘၣ်တၢ်တဲအီၤခဲအံၤခဲအံၤဒီးနကနၣ်အီၤမုာ်ဒိၣ်မးလီၤ.အိၣ်၀ဲဒီး
အခီပညီခူသူၣ်လၢတၢ်တမၤဖျါအီၤဒံးဘၣ်န့ၣ်လီၤ.တၢ်တဲဃဲၤ၀ဲလၢဖိၣ်ဃဲအိၣ်တဂၤ့့့အ၀ဲအိၣ်ဒီးအဖံန့ၣ်လီၤ.
အ၀ဲသ့ၣ်ဒီဖံလံၤခံဂၤဘၣ်အိၣ်မူဖှီၣ်ဖှီၣ်ယာ်ယာ်,ဘၣ်မၤတၢ်နးနးကလဲာ်ဒီးကအိၣ်ကဆိးလၢပှၤအါဂၤအကျါဒၣ်
လဲာ်တၢ်တတူၢ်လိာ်အီၤအဃိဟးအိၣ်ဒၣ်လၢအခုးအသံၣ်ပှၢ်လၢ်ကျါလၢဒဲဖိအပူၤန့ၣ်လီၤ. တၢ်ဖဲးခုးဖဲးသံၣ်မ့ၢ်
တၢ်မၤတခါလၢနအိၣ်ဘှံးတချုးဘၣ်ဒီနံၣ်ညါ,နဘၣ်မၤတၢ်လၢာ်ဆၢလၢာ်ကတီၢ်အဃိ,တၢ်ဆၢကတီၢ်သဘျ့
လၢတၢ်သူၣ်ဖှံသးညီအဂီၢ်တအိၣ်ဘၣ်.ဖိၣ်ဃဲအံၤဖဲအသးလိၣ်ထီၣ်န့ၣ်မၤတၢ်ဆူၣ်မး,မၤ၀ဲတဂၤဃီဒီးပျဲအိၣ်ဘှံး
၀ဲအဖံလီၤ.ဘၣ်ဆၣ်တုၤဖိၣ်ဃဲအသးမ့ၢ်တလိၣ်ထီၣ်တခီအ၀ဲကွၢ်ဃု၀ဲတၢ်လီၢ်ကဒုလၢသ့ၣ်ခီၣ်ထံး၀ံၤအိၣ်ဘှံး
အိၣ်သါမံ၀ဲဒီတနံၤလီၤ.အဖံဘၣ်မၤတၢ်ထဲတဂၤဧိၤန့ၣ်တကဲထီၣ်တၢ်ကိၢ်တၢ်ဂီၤတၢ်သူၣ်ကညီၤသးကညီၤလၢ
အဂီၢ်ဘၣ်.အဖံတခီအဲၣ်ဘၣ်အလံၤခွါဒိၣ်မးအဃိတအိၣ်ဒိး၀ဲလၢအလံၤကဘၣ်မၤတၢ်လၢတၢ်ကိၢ်ကျါကိၢ်ကိၢ်
ဂီၤဂီၤဘၣ်.လၢတၢ်န့ၣ်အဃိအ၀ဲတမၤကိၢ်မၤဂီၤဖိၣ်ဃဲနီတဘျီလၢကဟဲမၤစၢၤအီၤဘၣ်.ကစၢ်ဒၣ်၀ဲဆူးလီၤအ
ခိၣ်ဒီးမၤ၀ဲလၢတၢ်ဘှံးတၢ်တီၤအသးအပူၤလီၤ.

ဖံအံၤအဲၣ်ဘၣ်အလံၤခွါဒိၣ်မးအဃိ,လၢတၢ်ဖှိၣ်တၢ်ယာ်အပူၤပာ်ဃာ်အစ့တဘျီတစဲးတဘျီတစဲး၀ံၤတုၤအန့ၢ်
၀ဲအါထီၣ်တခီစံးဘၣ်ဖိၣ်ဃဲလၢကလဲၤမၤလိတၢ်န့ၣ်လီၤ.ဖိၣ်ဃဲတခီမ့ၢ်အသးအိၣ်မၤလိတၢ်ဧါ,တသးအိၣ်မၤလိ
တၢ်ဧါန့ၣ်,နတဲတဘၣ်ဘၣ်.တုၤမ့အနၢ်ဟူအဖံအတၢ်ကတိၤဒီးအ၀ဲအသးခုဒီးပာ်လီၤအသးလၢကလဲၤမၤလိ
တၢ်လီၤ.ဘၣ်သ့ၣ်သ့ၣ်ဖိၣ်ခဲအံၤမ့ၢ်အဲၣ်ဒိးဟးပူၤအသးလၢတၢ်မၢကိၢ်ကိၢ်ဂီၤဂီၤလီၤကၢၣ်လီၤကျူအံၤအကျါယံာ်
တ့ၢ်လံဒီးအခဲအံၤတၢ်ခွဲးတၢ်ယာ်အိၣ်ထီၣ်အဃိတဂ့ၢ်လိာ်၀ဲနီတဘျီဘၣ်.
 
အဖံဟ့ၣ်လီၤအီၤစ့လၢပာ်ဖှိၣ်၀ဲန့ၣ်တဖၣ်၀ံၤဒီဖံလံၤခံဂၤဟံးစုကွၢ်မဲာ်လိာ်သး၀ံၤဖိၣ်ဃဲဟးထီၣ်လၢအဒဲန့ၣ်လီၤ
.အဖံတခီဘၣ်အိၣ်တ့ၢ်မၤတၢ်ထဲတဂၤန့ၣ်လီၤ.ဖိၣ်ဃဲနုာ်လီၤလၢသ၀ီပူၤ၀ံၤဟးသံကွၢ်ပှၤထံဖိကီၢ်လၢကၠိအဂ့ၤ
ကတၢၢ်လၢထံကီၢ်ပူၤအံၤန့ၣ်မ့ၢ်အအိၣ်ဖဲလဲၣ်န့ၣ်လီၤ.တအါသီဘၣ်ပှၤနဲၣ်လီၤအီၤလၢသရၣ်မံၤဟူသၣ်ဖျါလၢအ
သိၣ်လိတၢ်ဂ့ၤတဂၤဒီးအ၀ဲလဲၤဆူသရၣ်အံၤအအိၣ်လီၤ.သရၣ်အံၤအကၠိဖိတဖၣ်မ့ၢ်ဒၣ်ထဲပှၤတူၢ်ဒိၣ်ကီၤဒိၣ်,ဒီး
စီၤပၤဖိခွါတဖၣ်န့ၣ်လီၤ.သရၣ်အံၤသိၣ်လိတၢ်ဂ့ၤမးဒီးပှၤဖျိထီၣ်လၢအစုပူၤတဖၣ်အါတက့ၢ်ကဲထီၣ်စီၤပၤလၢအ
ဂ့ၤကတၢၢ်တဖၣ်န့ၣ်လီၤ.ဖဲစီၤပၤဖိခွါ,ပှၤတူၢ်ဒိၣ်ကီၤဒိၣ်ဖိခွါတဖၣ်ဂုာ်ကျဲးစၢးဒ်သိးကဖျိးစိလိာ်သးတဂၤဒီးတဂၤ
အခါဖိၣ်ဃဲတခီတၢ်ကိၢ်တၢ်ဂီၤတဘၣ်အီၤနီတစဲးဘၣ်. မ့ၢ်မၤန့ၢ်လၢခံကတၢၢ်တဂၤဒၣ်လဲာ်ဖိၣ်ဃဲတဘၣ်ယိၣ်
ဘၣ်ဘှီတၢ်ဘၣ်.သရၣ်တဂၤအံၤမ့ၢ်သရၣ်တဂၤလၢအမံၤဟူသၣ်ဖျါတ့ၢ်လံတဂၤအသိးအ၀ဲသိၣ်သီအပျဲၢ်တဖၣ်
ထံထံဆးဆးလီၤတံၢ်လီၤဆဲးဒီးပာ်ကဖၢအသးစ့ၢ်ကီးလၢဒိးန့ၢ်ဘၣ်အပျဲၢ်ထဲအဖျိးစိသ့ၣ်တဖၣ်န့ၣ်လီၤ.လၢတၢ်
န့ၣ်တုၤမ့ၢ်အထံၣ်ဖိၣ်ဃဲအတၢ်ကျဲးစၢးတအိၣ်လၢတၢ်မၤလိမၤဒိးအပူၤန့ၣ်အသးတမုာ်ဘၣ်.ဖိၣ်ဃဲတခီလၢတၢ်
မၤလိဒီကတီၢ်အပူၤမၤဒၣ်အသးကၢၣ်ခုကၢၣ်ခုဒ်အိၣ်မူတ့ၢ်၀ဲအသိးလီၤ.အသရၣ်တခီအဲၣ်ဘၣ်အီၤဖးဒိၣ်သနာ်
က့မၤ၀ဲတသ့နီတမံၤဒ်သိးဖိၣ်ဃဲအံၤကလူၤန့ၢ်ထီၣ်ဘးတၢ်မၤလိအကျိၤအကွာ်တဖၣ်အဂီၢ်လီၤ.အ၀ဲအဲၣ်ဘၣ်
၀ဲဖိၣ်ဃဲထဲလဲၣ်ထဲလဲၣ်သနာ်က့မၤစၢၤ၀ဲတသ့နီတမံၤလၢၤဘၣ်.

မုၢ်တနံၤတုၤဃီၤ၀ဲလၢတၢ်ပျၢ်ကၠိအဂီၢ်အိၣ်ဃုာ်ဒီးတၢ်ဟ့ၣ်လံာ်အုၣ်သးန့ၣ်လီၤ.ပှၤတူၢ်ဒိၣ်ကီၤစီၤပၤဖိခွါတဖၣ်
မၤလိာ်အခ့အပှၤပဒိၣ်ပှၢ်လၢကဟဲတၢ်ပျၢ်ကၠိအမူးအံၤဒီးဟဲစိာ်စ့ၢ်ကီးတၢ်ဟ့ၣ်အါမံၤလၢအသရၣ်အဂီၢ်လီၤ.
လၢတၢ်ပျၢ်ကၠိတဘျီအံၤပှၤကၠိဖိကိးဂၤပာ်ဖျါထီၣ်အတၢ်သ့တၢ်ဘၣ်အတၢ်ဖျိးစိတဂၤဒၣ်စုာ်စုာ်ဒီးကမျၢၢ်အါဂၤ
ဘၣ်သူၣ်ဘၣ်သးဟ့ၣ်ဂံၢ်ဟ့ၣ်ဘါဒဲစုပှီၢ်ခီၣ်လီၤ.ဖိၣ်ဃဲတခီတၢ်လၢအကဘၣ်ပာ်ဖျါတအိၣ်နီတမံၤအဃိအိၣ်တၢ်
အတၢ်လၢတၢ်ချၢလီၤ.တုၤမ့ၢ်တၢ်ဟ့ၣ်လီၤလံာ်အုၣ်သးပတီၢ်ထီတၢ်ဆူပှၤကၠိဖိ၀ံၤဒီးအ၀ဲသ့ၣ်က့ၤကဒါက့ၤဆူ
တဂၤအတၢ်အိၣ်တၢ်ဆိးအလီၢ်စုာ်စုာ်ပှဲၤ၀ဲဒီးအခ့အပှၤတဖၣ်အတၢ်ကဟုာ်ကယာ်န့ၣ်လီၤ.အိၣ်တီၢ်ထဲဖိၣ်ဃဲ
ဒီးအသရၣ်အဃိအသရၣ်စံးဘၣ်အီၤလၢကအုၣ်အသးလၢအဂီၢ်တၢ်တအိၣ်နီတမံၤဘၣ်.ဘၣ်ဆၣ်ဒီးအသရၣ်
ကျီန့ၢ်၀ၣ်တပီၤ,အထီကအိၣ်တချံဘျဲၣ်,ဘၢၣ်ဖျိ၀ဲအကပၤ,၀ံၤဟံးန့ၢ်ဆှီၣ်ဘီထၢနုာ်၀ဲလၢတၢ်ပူၤ၀ံၤစၢထီၣ်န့ၢ်၀ဲ
ဖိၣ်ဃဲယီၢ်ဒ့လိၤလီၤ.အသရၣ်စံးဘၣ်အီၤဖဲနလဲၤတၢ်တပူၤလၢ်လၢ်စၢထီၣ်၀ၣ်ပီၤအံၤလၢနယီၢ်ဒ့လိၤတက့ၢ်.
ဘၣ်သ့ၣ်သ့ၣ်ကဲထီၣ်တၢ်ဘူၣ်ဂ့ၤတီၢ်ဂ့ၤလၢနဂီၢ်လီၤ.

ဖိၣ်ဃဲၣ်တူၢ်လိာ်တၢ်ဟ့ၣ်လၢတၢ်ပာ်ကဖၢလၢသးအပူၤ,စံးဘျုးစံးဖှိၣ်က့ၤအသရၣ်၀ံၤဟဲက့ၤဆူအဟံၣ်လီၤ.၀ၣ်
ပီၤပိာ်ထွဲအခံဘၣ်ထံးဒီးဟီၣ်ခိၣ်သီၣ်ကျီးကျီး့့့ကျီးကျီး့့့န့ၣ်လီၤ.အဖံတခီကွၢ်လၢ်အလံၤခွါအခံကိးနံၤဒဲးတၢ်သ
ယုၢ်သညိလီၤဘၣ်အီၤန့ၣ်လီၤ.တနံၤတခီၣ်ဖဲအဖံကွၢ်လီၤတၢ်ဆူအယံၤအခါ,နၢ်ဟူ၀ဲ၀ၣ်ပီၤသီၣ်ကျီးကျီကျီး့့့ကျီး
ကျီးကျီး့့့လၢအယံၤန့ၣ်လီၤ.တယံာ်တမီၢ်ဒီးထံၣ်ဘၣ်၀ဲလၢအလံၤခွါဟဲက့ၤတုၤအဃိလၢတၢ်သူၣ်ခုသးခုအပူၤ
သဂၢၢ်အလံၤခွါဒီးပျဲအတၢ်ဟံးန့ၢ်တၢ်အိၣ်ဘှံးအိၣ်သါမူၤမူၤနီၢ်န့ၣ်လီၤ. တၢ်ဖံတသံကွၢ်သံဒိးဖိၣ်ဃဲဘၣ်ဃးအ
တၢ်လဲၤမၤလိတၢ်အဂ့ၢ်ဘၣ်.နာ်န့ၢ်အလံၤခွါလၢလၢပှဲၤပှဲၤန့ၣ်လီၤ.တနံၤတခီၣ်တၢ်ရၤလီၤတၢ်ကစီၣ်ဟဲလၢထံ
ကီၢ်အစီၤပၤဆူထံဖိကီၢ်ဖိခဲလၢာ်အအိၣ်လီၤ.လၢတၢ်ကလုၢ်အပူၤန့ၣ်ပာ်ဖျါ၀ဲဒၣ်.စီၤပၤအံၤလၢအဖိမုၣ်ဒိၣ်တၢ်
ဂ့ၤတဂၤအဂီၢ်ကမၢတၢ်ြပၢတခါဒီးပှၤလၢအမၤနၢၤတၢ်တဂၤန့ၣ်ကန့ၢ်ဘၣ်ဒီးစီၤပၤအဖိမုၣ်လၢအမါဒီးတကး
ဒံးဘၣ်ကကဲထီၣ်စ့ၢ်ကီးစီၤပၤလၢဘီမုၢ်တဘ့ၣ်အံၤအပူၤဖဲလၢစီၤပၤသံ၀ံၤအလီၢ်ခံန့ၣ်လီၤ.

ဖဲတၢ်ြပၢဘူးထီၣ်အဆၢကတီၢ်ပှၤတူၢ်ဒိၣ်ကီၤဒိၣ်စီၤပၤဖိခွါလၢလီၢ်ဘူးလီၢ်ယံၤခဲလၢာ်ဟဲပာ်ဖှိၣ်ထီၣ်အသးဆူစီၤ
ပၤအနီပူၤန့ၣ်လီၤ.ဖိၣ်ဃဲစ့ၢ်ကီးနၢ်ဟူဘၣ်တၢ်ကစီၣ်အံၤဒီးဆိကမိၣ်ထီၣ်လထအသးကံၢ်ပူၤ,တဘျီအံၤတၢ်ခွဲး
တၢ်ယာ်ဂ့ၤဟဲပၢၢ်ထီၣ်လၢအဂီၢ်တခါလၢအ၀ဲကဘၣ်အိၣ်ယံၤဒီးတၢ်မၤလၢအဃၢဒီးလီၤကၢၣ်လီၤကျူန့ၣ်လီၤ.
အ၀ဲဃ့အခွဲးလၢအဖံ၀ံၤကတဲာ်ကတီၤထီၣ်အသးလၢတၢ်လဲၤအဂီၢ်န့ၣ်လီၤ.အဖံစ့ၢ်ကီးမုၢ်လၢ်၀ဲလၢအလံၤခွါ
ကမၤနၢၤတၢ်ဒီးအ၀ဲသ့ၣ်ခံဂၤကပူၤထီၣ်လၢတၢ်အိၣ်မူလၢအဖှီၣ်အယာ်အံၤန့ၣ်လီၤ.ဖိၣ်ဃဲဟံးန့ၢ်အတၢ်အုၣ်
သးတခါဧိၤဒ်အမ့ၢ်၀ၣ်ပီၤလၢအသရၣ်ဟ့ၣ်လီၤအီၤန့ၣ်လီၤ.အ၀ဲစၢထီၣ်၀ၣ်ပီၤအံၤလၢအယီၢ်ဒ့လိၤ၀ံၤဟးထီၣ်
လၢအဒဲပူၤမၤအသးဒ်ပှၤဒူပှၤဃိၤတဂၤကတဲာ်ကတီၤအသးလၢကလဲၤဒုးတၢ်အသိးန့ၣ်လီၤ.

စီၤပၤအနူၢ်အံၤပှဲၤ၀ဲဒီးပှၤတူၢ်ဒိၣ်ကီၤဒိၣ်,စီၤပၤဖိခွါတဖၣ်လၢကနုာ်လီၤတၢ်ြပၢမ့ၢ်ဂ့ၤ,ကဟဲကွၢ်ကီတၢ်ြပၢဒိၣ်ဒိၣ်
မုၢ်မုၢ်အံၤမ့ၢ်ဂ့ၤန့ၣ်လီၤ.ထံဖိကီၢ်ဖိတဖၣ်စ့ၢ်ကီးပာ်ဖှိၣ်အသးဒ်သိးကကွၢ်ကီတၢ်ြပၢဒီးမ့ၢ်မတၤတဂၤကမၤန့ၢ်စီၤ
ပၤအဖိမုၣ်ဒီးကကဲထီၣ်အ၀ဲသ့ၣ်အစီၤပၤလဲၣ်န့ၣ်လီၤ.တုၤတၢ်ဆၢကတီၢ်ဘၣ်ဒီးပှၤနုာ်လီၤြပၢတၢ်တဖၣ်ဟဲရဲၣ်
လီၤအသးလၢစီၤပၤအမဲာ်ညါဒ်သိးဒကထံၣ်ဆၢသးဘၣ်စီၤပၤအဖိမုၣ်အတၢ်ဃံတၢ်လၤဒီးအပၢ်စီၤပၤအလၤ
ကပီၤန့ၣ်လီၤ.တယံာ်တဘူးဒီးစီၤပၤအိၣ်တၢ်ပျဲၢ်စီၢ်န့ၣ်တၢ်ကတဲာ်ကတီၤပာ်တၢ်ြပၢအလီၢ်ဃံဃံလၤလၤဖျါဆဲး
မဲာ်ဆဲးနါဒိၣ်မးန့ၣ်လီၤ.စီၤပၤဖိခွါတဖၣ်ဒီးပှၤတူၢ်ဒိၣ်ကီၤဒိိၣ်ဖိတဖၣ်ဆိကမိၣ်၀ဲလၢအသးကံၢ်ပူၤတဘျီအံၤအ၀ဲ
သ့ၣ်တဂၤဒီးတဂၤကဘၣ်ဒုးလိာ်အသးတုၤလီၤလၢပှၤအိၣ်တီၢ်ထဲတဂၤလၢကမၤန့ၢ်ဘၣ်ခိၣ်ဖးန့ၣ်လီၤ.အ၀ဲ
သ့ၣ်ကိးဂၤကတီၤပာ်သးလၢကဆိးကါအတၢ်သ့တၢ်ဘၣ်ဒီးအတၢ်သးဒူဃံဃံလၤလၤလၢစီၤပၤဖိမုၣ်အမဲာ်ညါ
တဘျီဃီစ့ၢ်ကီးကဆိးကါတၢ်ကူၣ်ဘၣ်ကူၣ်သ့ဒ်သိးအသုတမၤကမၣ်ဘၣ်တၢ်တုၤလီၤလၢကဘၣ်သံစ့ၢ်ကီးအ
ဂီၢ်န့ၣ်လီၤ.တၢ်ဆၢကတီၢ်ဘၣ်ဒီးစီၤပၤဂဲၤဆၢထၢၣ်လၢအလီၢ်ဒီးပာ်ဖျါထီၣ်တၢ်ြပၢအဂ့ၢ်အကျိၤလီၤ.

လၢတၢ်ြပၢအလီၢ်အိၣ်၀ဲဒီးတၢ်ပူၤတပူၤ,တယိာ်ကဲၣ်ဆိးဘၣ်,ပှၤတဂၤလၢ်လၢ်လၢအနုာ်လီၤဆူတၢ်ပူၤဘူၣ်န့ၣ်,
အမ့ၢ်၀ဲပှၤလၢအမၤနၢၤတၢ်န့ၣ်လီၤ.တုၤမ့ၢ်ပှၤနုာ်လီၤြပၢတၢ်ဖိိနၢ်ဟူ၀ဲစီၤပၤအတၢ်ကလုၢ်ဒီးဆိကမိၣ်၀ဲလၢ
တၢ်ြပၢဒ်အံၤတမ့ၢ်တၢ်ကီတၢ်ခဲလၢအဂီၢ်နီတဂၤဘၣ်.ကမျၢၢ်တဖၣ်အိၣ်ဘှိၣ်,သးလီၤကတုာ်၀ဲဒီးသးစၢၢ်ဆၢလၢ
ကထံၣ်ဘၣ်၀ဲပှၤမၤနၢၤတၢ်တဂၤလၢတၢ်ြပၢအံၤအပူၤန့ၣ်လီၤ.တုၤတၢ်ြပၢစးထီၣ်ဒီးစီၤပၤဖိခွါတၢတဂၤလဲၤ၀ဲဒူ
ဒူဆူတၢ်မၤကွၢ်တၢ်ပူၤခိၣ်ထိးဒ်သိးကဖုလီၤ၀ဲလီၤ.ဘၣ်ဆၣ်ဖဲအလဲၤတုၤလၢတၢ်ပူၤခိၣ်ထိးဒီးကွၢ်လီၤတၢ်အခါ
အိၣ်ပတုာ်၀ဲချ့သဒံး,မၤအသးဒ်အထံၣ်ဘၣ်တၢ်လီၤပျံၤလီၤဖုးဖးဒိၣ်တခါလီၤ.

အ၀ဲဂုၤအသးဆူလီၢ်ခံဒီးဟဲက့ၤလၢတၢ်မဲာ်ယာ်နိယာ်,ဆုးလီၤအခိၣ်ဆူအလီၢ်ဒၣ်၀ဲ,တတဲတၢ်ဒီးပှၤဂၤနီတမံၤ
လၢၤဘၣ်.တူၢ်ဒိၣ်ကီၤဒိၣ်စီၤပၤဖိခွါတဖၣ်လဲၤဆူတၢ်ပူၤခိၣ်ထိးတဂၤ၀ံၤတဂၤ,ဟဲက့ၤဒၣ်၀ဲလၢတၢ်မဲာ်တမုာ်နါ
တမုာ်,တၢ်ဆုးလီၤခိၣ်ဒ်သိးဒၣ်ပှၤတၢတဂၤမၤ၀ဲအသိးလီၤ.အန့ၢ်တဘျီတုၤဃီၤလၢဖိၣ်ဃဲအတီၤန့ၣ်လီၤ.ဖိၣ်
ဃဲဟးထီၣ်လၢအလီၢ်လဲၤ၀ဲဆူတၢ်ပူၤခိၣ်ထိး,အ၀ၣ်ပီၤတဘိပိာ်ထီၣ်အခံသီၣ်သီၣ်၀ဲကျီးကျီးကျီး့့့ကျီးကျီကျီး့့့့န့ၣ်
လီၤ.တုၤမ့ၢ်ဖိၣ်ဃဲလဲၤတုၤဆူတၢ်ပူၤခိၣ်ထိး၀ံၤကွၢ်လီၤတၢ်လၢတၢ်ပူၤန့ၣ်အကလၤဘူးမးလၢကဟးတ့ၢ်လီၤ.

တၢ်လၢဖိၣ်ဃဲထံၣ်ဘၣ်တခီဘီတဖၣ်တၢ်ဆဲးလီၤဆူဟီၣ်ခိၣ်လာ်တဘိဘၣ်တဘိ,အကနၣ်တခီကွၢ်ထီၣ်တၢ်ဆူ
ထးခီဒ်သိးကဖှီညာ်ဆဲးဖျိကွံာ်ပှၤတဂၤလၢ်လၢ်လၢအဘူၣ်တၢ်ဒီးဖုလီၤန့ၣ်လီၤ.ဖိၣ်ဃဲတရံးအသးဆူအလိၢ်ခံချ့
သဒံးဒ်သိးကဂုၤက့ၤအခံန့ၣ်လီၤ.ဖဲန့ၣ်အခါ၀ၣ်ပီၤလၢအိၣ်စၢဃာ်အသးလၢအယီၢ်ဒ့လိၤန့ၣ်၀ံၢ်ဃီၤအသး,တုၤ
ဆူတၢ်ပူၤခိၣ်ထီး,ဒီးအသယၢၢ်ဃၢထုးလီၤဖိၣ်ဃဲဆူတၢ်ပူၤန့ၣ်လီၤ.ပှၤြပၢတၢ်ဖိလၢသ့ၣ်ညါတၢ်အိၣ်လၢတၢ်ပူၤ
တဖၣ်တုၤထံၣ်၀ဲလၢဖိၣ်ဃဲဖုလီၤဆူတၢ်ပူၤဒီးကျၢၢ်ကျာ်အခိၣ်ဆိကမိၣ်၀ဲဖိၣ်ဃဲတဂၤအံၤနးဒိၣ်မးတုၤဒၣ်လဲာ်
ကဘၣ်သံန့ၣ်တပျံၤ၀ဲဘၣ်န့ၣ်လီၤ.မ့မ့ၢ်ကမျၢၢ်လၢအတသ့ၣ်ညါတၢ်မနုၤအိၣ်လၢတၢ်ပူၤဘၣ်တဖၣ်တခီဒဲစုပှီၢ်ခီၣ်
ဟ့ၣ်ဂံၣ်ဟ့ၣ်ဘါဖိၣ်ဃဲလၢအဘူၣ်တၢ်တဂၤအံၤဒီးသးခုစ့ၢ်ကီး၀ဲလၢအတၢ်ကကဲထီၣ်စီၤပၤလၢအ၀ဲသ့ၣ်အဖီခိၣ်
န့ၣ်လီၤ.တုၤမ့ၢ်အ၀ဲသ့ၣ်လဲၤတုၤဆူတၢ်ပူၤ, ကွၢ်လီၤတၢ်တခီထံၣ်၀ဲဒၣ်ဖိၣ်ဃဲကျံာ်လီၤအသးလၢစးခိ၀ါကပုာ်
လုာ်တဖၣ်အဖီခိၣ်နံၤ၀ဲဃဲးဃဲးန့ၣ်လီၤ.ဖိၣ်ဃဲခီဖျိဒိကနၣ်သရၣ်အကလုၢ်အဃိမၤနၢၤတၢ်၀ံၤမၢန့ၢ်၀ဲစီၤပၤအဖိ
မုၣ်ဃံဃံလၤလၤဖိတဂၤ၀ံၤကဲထီၣ်စ့ၢ်ကီးစီၤပၤဖးဒိၣ်တဂၤလၢဘီမုၢ်တဘ့ၣ်အံၤအပူၤန့ၣ်လီၤ.ဖဲန့ၣ်ဖိၣ်ဃဲမာ်
လိာ်က့ၤအဖံလၢအကဟဲအိၣ်ဒီးအီၤလၢနီပူၤဒီးအ၀ဲသ့ၣ်အိၣ်ဘၣ်က့ၤ၀ဲမုာ်မုာ်ခုၣ်ခုၣ်န့ၣ်လီၤ.