​ဖံ​ဖံ​အဲ​မၣ်

တၢ်စံးဝဲတဘျီဖိၣ်ဃဲဒီပုၢ်ဝဲၢ်မုၣ်ခွါအိၣ်ဝဲခံဂၤလီၤ.မိၢ်ပၢ်သံသဒၣ်အဝဲသ့ၣ်လၢနီၢ်ဆံးခါအဃိအိၣ်လီၤတဲၢ်က့ၤဝဲခံ
ဂၤန့ၣ်လီၤ.ကျိၣ်စ့စ့ၣ်ကိးအိၣ်ဝဲစှှၤကိာ်ဖိလၢကသုဝဲကအီၣ်ကအီအဂီၢ်န့ၣ်လီၤ.ပှၤဖိၣ်ဃဲမ့ၢ်အိၣ်လၢသဝီပူၤန့ၣ် ပှှၤသဝီဖိတဖၣ်နၢ်ဝဲလၢ ကဘၣ်ကူဘၣ်၈ာ် ပှၤသဝီဖိ အဂၤတဖၣ်ဒ်သိးအမိၢ်အပၢ်သံသဒၣ်အဝဲသ့ၣ် ဒီးကဘၣ်အိၣ်ဖိၣ်ဃဲဒ်သိးအဝဲသ့ၣ်န့ၣ်လီၤ.

ဖိၣ် ဃဲဒီပုၢ်ဝဲၢ်မုၣ်ခွါခံဂၤအံၤ သူၣ်ထီၣ်အဒဲဖိတဖျၢၣ် ဒီးဖဲးအီၣ်ခုးဖဲန့ၣ်လီၤ. အဝဲသ့ၣ်ဖံးအီၣ်မၤအီၣ် တီတီလိၤလိၤ ဆၣ်ဖိကီၢ်ဖိတဖၣ် လၢအဟဲ အီၣ်ဒီးဟးဂုာ်ဟးဂီၤတၤသူတၤသၣ်တဖၣ် တဖၣ် ဒၣ်လဲာ် တနီထီၣ်ကွံၢ်ဝဲလၢတၢ်ဆိၣ်တၢ်ထုအပူၤဘၣ်. နီကွံာ်ဝဲလၢတၢ်ကလုာ်အမုာ်အယုာ်အမုၢ် အပူၤလီၤ. ပှၤခးတၢ်ဖိမ့ၢ်ဟဲခးတၢ်မံၤလၢ်, ဆၣ်ဖိကီၢ်ဖိဒီး အဝဲသ့ၣ်ထုကဖၣ်သၣ်ကမဲာ်န့ၢ်တၢ်လၢဆၣိဖိကီၢ်ဖိတဖၣ်အဂီၢ် ဒ်သိးကပူၤဒုၣ်ပူၤဒါအဂီၢ်န့ၣ်လီၤ. 

စှၤနံၣ်အတီၢ်ပူၤ တၢ်ဟဲကဲထီၣ်သးလၢဘုဧိၤဟုဧိၤ ဒီး ပှၤဖဲးခုးဖိသံၣ်ဖိတဖၣ်တမၤန့ၢ်ဘုဧိၤဟုဧိၤလၢလၢပှဲၤပှဲၤဘၣ်အဃိ တၢ်သၣ်ဝံၤလီၤဒိအိၣ်ထီၣ်ဝဲန့ၣ်လီၤ. သဝီဖိတဖၣ်ဟးထီၣ်ဆူသဝီချၢဒီးဟးဃုပှ့ၤအီၣ်ဟုသးန့ၣ်လီၤ$ ဖိၣ်ဃဲခွါဖိခ့ၣ်ကီးမၢဝဲအဒ့မုၣ်အိၣ်ခီးဒဲ ဒီးကလဲၤပှ့ၤအီၣ် ဟုသးစ့ၣ်ကီးန့ၣ်လီၤ.

ဖိၣ်ဃဲဖိအံၤထံၣ်ဘၣ်ဝဲ ပှၤသဝီဖိတဖၣ် အါမး လဲၤလဲၤက့ၤက့ၤ လၢကလဲၤပှ့ၤအီၣ်ဝဲဟုသးအဂီၢ်န့ၣ်လီၤ. ဖိၣ်ဃဲဖိလဲၤပှ့ၤအီၣ်ဟုသးလၢပှၤဆါဟုသးဝံၤ ဟဲက့ၤဝံဝဲဟုသးဖဲန့ၣ်အခါ ဖဲကျဲကပၤတယံၤတဘူးန့ၣ် နၢ်ဟူဝဲတၢ်ကလုာ်တခါ လၢအမ့ၢ်ပှၤပိာ်မုၣ်တ၈ၤ ဃ့တၢ်မၤစၢၤအကလုာ်န့ၣ်လီၤ. ပှၤအါဂၤလဲၤလဲၤက့ၤက့ၤဝဲဖဲကျဲန့ၣ်အါမး နၢ်ဟူဝဲတၢ်ဃ့တၢ်မၤစၢၤအ ကလုာ်န့ၣ်ဘၣ်ဆၣ်သနၣ်က့ တကနၣ်ဃုာ်ဝဲဘၣ်ဒီးလဲၤပူၤကွံာ်ဝဲတကူၤသ့ၣ်န့ၣ်လီၤ.
မ့ၢ်လၢတၢ်သူၣ်ဂ့ၤသးဝါအိၣ်ဝဲအဃိ ဖိၣ်ဃဲခွၣ်ဖိအံၤလဲၤကွာ်ဝဲ ဒီးထံၣ်ဝဲဖံသးပှၢ်ခိၣ်ဝါမဲပိာ်တဂၤ ဘၣ်ဘျးဒီးသ့ၣ်ဃံၣ်န့ၣ်လီၤ. ဖံတဂၤအံၤဖဲထံၣ်ဘၣ်ဖိၣ်ဃဲအံၤဒီး ဃ့ကညးဝဲဒ်သိးကမၤထူၣ်ဖျဲးထီၣ်က့ၤအီၤန့ၣ်လီၤ.
 
“တၢ်လံၤခွါ…တၢ်လံၤခွါ…ဟဲမၤစၢၤဖံတဘီ…ဖံဘၣ်ဘျးဒီးသ့ၣ်ဃံၣ်အံၤ ယံာ်ဝဲ ခံလါလံလီၤ. ဖံတအီၣ်ဘၣ်မ့ၤအီၣ်ဘၣ်ထံ အဃိ တၢ်သးဝံၤဖံသးဒိၣ်လီၤ. ဟဲဒီးမၤထူၣ်ဖျဲးဖံတဘီ တၢ်လံၤခွါဧၢ”
ကွာ်ထံကွာ်ဆးဝဲဖံတဂၤအံၤ ဒီး သူၣ်ကညီၤသးကညီၤဖံတဂၤအံၤဒီး ဟံးထီၣ်ဝဲအဃဲာ်ဒီးကျီ ထီးတဲာ်ဝဲ သ့ၣ်ဃံၣ်တဖၣ်လၢ အဘံဃာ်ဖံတဂၤအံၤခဲလၢာ်ခဲဆ့န့ၣ်လီၤ. ဖံတဂၤအံၤထူၣ်ဖျဲးဝဲ အဃိ သူၣ်ခုသးခုဝဲဒီး စံးဘျူးစံးဖှိၣ်ဘၣ်ဝဲဖိၣ်ဃဲဖိတဂၤအံၤဒိၣ်မးန့ၣ်လီၤ. 

က့ၤကိးဝဲဖံတဂၤအံၤဆူအဒဲအလီၢ် ဒီး မၢအပုၢ်မုၣ်ဖိဖီအီၣ်န့ၢ်မ့ၤလၢဖံတဂၤအံၤကအီၣ်ဝဲအဂီၢ်န့ၣ်လီၤ. ဖိၣ်ဃဲမုၣ်ဖိတဂၤအံၤ စံးကသွံတၢ်ဒီးအဝဲၢ်ခွါဒ်အံၤလီၤ “စီဧၢ ဘၣ်မနုၤနဟဲက့ၤကီးပှၤတမှံၤဖဲ ဟုသးကၤအဆၢကတီၢ်အံၤလဲၣ်” ဖိၣ်ဃဲခွါတဂၤအံၤတုၤအနၢ်ဟူအပုၢ်မုၣ်အံၤစံးတၢ်ဒ်အံၤဒီး တဲကသွံက့ၤဝဲအပုၢ်မုၣ်ဖိလၢတၢ်ကတိၤကပုာ်လုးပူၤဒီးစံးဝဲဒ်အံၤ
“ဒ့မုၣ်ဧၢ….တဲတၢ်ဒ်န့ၣ်တဂ့ၤ မီၣ်” ပပှၤကညီတကလုာ်အံၤ အိၣ်ဝဲဒၣ်ဒီးအလုာ်အလၢ်လၢပျၢၤလံၤလံၤ…..ပှၤတမှံၤမ့ၢ်ဟဲဒီး ကဘၣ်တူာ်လိာ်ခီၣ်ဆၢဝဲလၢလၢပှဲၤပှဲၤန့ၣ်လီၤ.”

တုၤန့ၣ်တဘျီ ဖိၣ်ဃဲမုၣ်ဖိအံၤ ဟံးထီၣ်အသပၢၤဖိတဖျၢၣ် လၢကဖီအီၣ်မ့ၤအဂီၢ်လီၤ.
တချုးဖၢနုာ်ဟုသးဆူ သပၢၤပူၤဒံးဘၣ်ဒီး ဖံတဂၤအံၤ စံးဘၣ်ဖိၣ်ဃဲမုၣ်ဖိဒ်အံၤလီၤ.
“တၢ်လံၤမုၣ်ဧၢ, နမ့ၢ်ဖီ ထီၣ်မ့ၤဒီး ဖၢနုာ်ဟုသးဖဲသပၢၤပူၤ ထဲဟုသးနွံဖျၢၣ်ဧိၤတက့ၢ်” ဒ်ဖံတဂၤစံးကတိၤဝဲအသိး ဖၢနုာ်ဝဲဟုသး ထဲနွံဖျၢၣ်ဧိၤလၢ သပၢၤပူၤ, ဒီးဖီထီၣ်ဝဲလီၤ. တုၤမ့ၤမံဒီးမ့ၤတဖၣ်ပှဲၤဝဲသပၢၤဒီဖျၢၣ်ညါလီၤ. အဃိသတးဒီး ဖိၣ်ဃဲဖိခံဂၤအံၤ အီၣ်လၢအီလၢ ဝဲဒီတနံၤညါန့ၣ်လီၤ. 

ဖံတဂၤ ကိးလီၤအမံၤလၢ အမ့ၢ်ဝဲ “ဖံဘံယီၤ” န့ၣ်လီၤ. ဖံတဂၤအံၤ တမ့ၢ်ဖံကလီကလီတဂၤဘၣ်. မ့ၢ်ဖံလၢအသူဝဲပှိၤဝဲတဂၤစ့ၢ်ကီးန့ၣ်လီၤ. ဆူညါခီတနံၣ်ဖဲ ပှၤစးထီၣ်ထူစံာ်ဒီး မၤသံၣ်မၤခုးအဆၢကတီၢ် န့ၣ်ဒီး ဖံတဂၤအံၤဟ့ၣ်ဝဲ ဖိၣ်ဃဲခွါဖိတဂၤအံၤလၢ ဃဲာ်တဘ့ၣ်ဒ်သိးကကျီဘျ့ကွံာ်တၢ်လူၢ်နွံလူၢ်ဒိး တၢ် ြတီၤပူၤနွံ ြတီၤန့ၣ်လီၤ. ဖိၣ်ဃဲခွါဖိစးထီၣ်ကျီဝဲ သ့ၣ် တထူၣ် တုၤအကၢ်လီၤဒီး တၢ်လူၢ်နွံလူၢ် ဒီး တၢ်ြတီၤပူၤနွံြတီၤသ့ၣ်တဖၣ် ခဲလၢာ် ကၢ်လီၤဝဲခဲလၢာ် စီဖ့ကလ့ၤန့ၣ်လီၤ.
ကုၢ် ဃိစီမ့ၣ်ကွံာ်ဝဲ သ့ၣ်တဖၣ်လၢ တၢ်လူၢ်နွံလူၢ်ဒီး တၢ်ြတီၤပူၤနွံြတီၤ ဝံၤအလီၢ်ခံ ဖံတဂၤအံၤဟးဆှၣ်ဝဲ သကုၤတၢ်လူၢ်နွံလူၢ်ဒီး တၢ်ြတီၤပူၤနွံြတီၤယၢ်ထီၣ်အစုခံခီခံကပၤ ထိၣ်တရူၤလီၤအသး ဒီးဘုဘၣ်ချံသ့ၣ်တဖၣ် လီၤတဲာ်ဝဲသကုၤဘၣ်လီၢ်ဘၣ်စး ဂ့ၤမးန့ၣ်လီၤ. ဘုတဖၣ် မဲထီၣ်ဂ့ၤမးဒီးသၣ်ထီၣ်စ့ၢ်ကီးလၢပှဲၤဂ့ၤမးလီၤ.

မ့ၢ်လၢ ဖံဘံယီၤ ပှိၤဝဲပှီၢ်ဝဲအဃိ ဘုသ့ၣ်တဖၣ်ဟဲမဲထီၣ်ဒိၣ်ထီၣ်သၣ်ထီၣ်ဝဲချ့သဒံးလၢပှဲၤဝဲဒီး ဃံလၤဝဲဂ့ၤမးလီၤ. နွံလူၢ်ဒီးနွံြတီၤအပူၤ ဘုတဖၣ်မဲထီၣ်ဝဲ အိၣ်ဒီးအလွဲၢ်လါဟ့ တုၤဘုတဖၣ်မံထီၣ်ဝဲဒီးအိၣိဖျါဝဲ အလွဲၢ် ဘီညီၣ်ကလာ်အဃိ ဖျါဃံဖျါလၤဝဲ ဒိၣ်ဒိၣ်ကလဲာ်န့ၣ်လီၤ.
အတၢ်မၤစၢၤဆီၣ် ထွဲဝဲအဃိ ဖိၣ်ဃဲဒီပုၢ်ဝဲၢ်မုၣ်ဒီးခွါဖိခံဂၤအံၤ အဘုတဖၣ် မဲထီၣ်သၣ်ထီၣ်ဝဲ လၢပှဲၤဂ့ၤမးလီၤ. ဒူဖိသဝီဖိတဖၣ် ထံၣ်ဝဲတၢ်အံၤဒီး သူၣ်က့ၣ်သးကါဝဲဒီး ကရၢကရိထီၣ်အသးဝံၤလဲၤကူာ် ကွံာ်ဝဲဘုတဖၣ် ခဲလၢာ်ခဲဆ့ဒီးက့ၤစိာ်ဝဲဆူ အဝဲသ့ၣ်အဘုဖီပူၤ စုာ်စုာ်လီၤ. ဖိၣ်ဃဲဖိခံဂၤအံၤ ထံၣ်ဘၣ် တၢ်မၤအသးဒ်အံၤဒီး အသူၣ်တမုာ်အသးတမုာ်ဝဲ ဘၣ် နးနးကလဲာ်လီၤ.

ဘၣ်ဆၣ်ဖံဘံယီၤ စံးဘၣ်ဖိၣ်ဃဲခွါဖိ အံၤလၢ တၢ်ကတိၤ ကသွံဒံအပူၤဒ်အံၤ….. “တၢ်လံၤခွါဧၢ သူၣ်ထီၣ်သးဖျိး ပှၤလၢနဃၢၤတဖၣ်တဂ့ၤ အိၣ်ဒီးတၢ်သူၣ်ဂ့ၤသးဝါထီဘိဒ်နပာ်တ့ၢ်လံ နသးလၢညါခီအသိးန့ၣ်တက့ၢ်…. လဲၤဒီးကျီန့ၢ်၀ၣ်တဖၣ် ဒီးထ့ထီၣ်ဘုဖီဖးဒိၣ်နွံဖျၢၣ်တက့ၢ်.”
ဖိၣ်ဃဲအံၤဒိကနၣ်၀ဲ ဖံဘံယီၤအံၤဂ့ၤမး ဒီးလဲၤကျီန့ၢ်၀ၣ်တဖၣိ ထ့ထီၣ်ဝဲ ဘုဖီဖးဒိၣ်နွံဖျၢၣ် တကူၣ်သ့ၣ်လီၤ. ထ့ဝဲဝံၤခဲလၢာ်ဒီး ဖံဘံယီၤ မၢ ဖိၣ်ဃဲခွါဖိအံၤ ဆီလီၤတဖျၢၣ် ဒီးတဖျၢၣ်လၢ အလီၢ်ဒၣ်ဝဲ စုာ်စုာ်လီၤ. ဖံဘံယီၤလဲၤနုာ်ဆူ ဘုပူၤတဖျၢၣ် ဒီးဟ့ၣ်ထီၣ်အကလုၢ်ဒ်အံၤလီၤ.
“ဘုသ့ၣ်ဟုသ့ၣ်ဧၢ….ဟဲက့ၤ ဟဲက့ၤဆူ သုလီၢ်ကျဲတက့ၢ် ဟဲက့ၤမၤပှဲၤက့ၤဘုဖီတဖၣ်အံၤ တက့ၢ် ဟဲက့ၤပာ်ဖှိၣ်က့ၤသုသးခဲလၢာ်ခဲဆ့တက့ၢ်….”

စံးတၢ်ဒ်န့ၣ်ဝံၤတဘျီဃီ ဘုတဖၣ် ဟဲလူလီၤအသးလၢ ဘုဖီံပူၤ ပှဲၤဝဲဘုဖီဖးဒိၣ် နွံဖျၢၣ်န့ၣ်လီၤ. ပှၤဒူဖိသဝီဖိ သ့ၣ်တဖၣ်ကွၢ် လီၤက့ၤ အဝဲသ့ၣ်ဘုဖီပူၤ ထံၣ်ဘၣ်ဝဲလၢ ဘုတအိၣ်လၢၤနီတဖျၢၣ် လၢၤဘၣ်အဃိ သူၣ်ဒိၣ် သးဖျိးတၢ် ဒိၣ်ဒိၣ်ကလဲာ်လီၤ. အဝဲသ့ၣ်ကိးဖှိၣ်ရိဖှိၣ်လိာ်အသး ဟံးထီၣ်ဘီဧိၤနးဧိၤတဖၣ်ဒီး လဲၤဝဲဆူ သဝီချၢ ဖဲဖိၣ်ဃဲအဒဲဖိ အိၣ်ဝဲ အလီၢ် ဒ်သိးကမၤသံကွံာ် ဖိၣ်ဃဲဒီပုၢ်ဝဲၢ်မုၣ်ခွါခံဂၤဒီး ဖံဘံယီၤ န့ၣ်လီၤ. ဟဲတုၤဘူးထီၣ် ဒီး ဖိၣ်ဃဲအဒဲဒီး ကဝီၤဃာ်ဝဲဒ်သိး ထွးထီၣ်ဃ့ၢ်တသ့နီတဂၤဘၣ်လီၤ. ဖံဘံယီၤစံးဘၣ်ဖိၣ်ဃဲခွါဖိကဒီး…. “တၢ်လံၤခွါဧၢ…တဘၣ်ပျံၤတၢ်တဂ့ၤ တဘၣ်သူၣ်ဒိၣ်သးဖျိး ပှၤဒူဖိသဝီဖိ တဖၣ်အံၤတဂ့ၤ…သူၣ်ကညီၤ သးကညီၤ အဝဲသ့ၣ်တက့ၢ်. တၢ်သူၣ်က့ၣ်သးကါလၢအအိၣ်ဝဲလၢအဝဲသ့ၣ်အဖၣ် ဒ်သိး ကသ့ၣ်ညါလီၤက့ၤဝဲ ဒ်သိး ကပီၢ်ယၢ်လီၤက့ၤ အဝဲသ့ၣ်အသး ကသ့န့ၣ် ဖံကသိၣ်က့ၤသီက့ၤ ဒၣ်ကယၢး…”

ဖံတဂၤအံၤ တဲဘၣ်ဖိၣ်ဃဲခွါဖိလၢ အကလုၢ်ဆံးကိာ်ဖိ ဒီးစံးကတိၤဝဲဆူညါကဒီး ဒ်အံၤလီၤ. 
“တၢ်လံၤခွါဧၢ…ဟ့ၣ်ယၤပျံၤတဘိဒီး နီၣ်လဲာ်တဘိ တက့ၢ်” စံးတၢ်ဒ်န့ၣ်ဝံၤ ဖိၣ်ဃဲဟ့ၣ်ဖံတဂၤအံၤ ပျံၤတဘိ ဒီး နီၣ်လဲာ်တဘိ ချ့သဒံးန့ၣ်လီၤ. တုၤန့ၣ်တစု ဖံဘံယီၤ ဟံးထီၣ်ပျံၤတဘိဒီး ဟ့ၣ်ထီၣ်ဝဲအကလုၢ်… “ပျံၤဧၢ…သူထီၣ်ပှိၤထီၣ်နဲတက့ၢ်…ပှၤတဖၣ်အံၤ မ့မ့ၢ်သၢပျၢၤ ပဒုၣ်ပဒါလၢ အသူၣ်က့ၣ်သးကါတၢ်ဒီး စၢဃာ်အဝဲသ့ၣ် ခဲလၢာ်တက့ၢ်”.

ပျံၤတဘိလၢ အအိၣ်လၢ ဖံဘံယီၤအစုပူၤန့ၣ် လၢတဖျးမဲာ်အတီၢ်ပူၤ လဲၤစၢဃာ် ကွံာ်ဝဲပှၤလၢအကဝီၤ ဃာ်ဒဲအံၤ တဖၣ် ခဲလၢာ် ခဲဆ့လီၤ. ဖံတဂၤအံၤ ဟံးထီၣ် ကဒီးနီၣ်လဲာ်တဘိ ဒီး ဟ့ၣ်ထီၣ်ဝဲအကလုၢ်… “နီၣ်လဲာ်ဧၢ…ပှၤတဖၣ်အံၤ မ့မ့ၢ်ပှၤလၢ အသူၣ်တဂ့ၤသးတဝါဘၣ်သၢပျၢၤန့ၣ်ဒီး…လဲၤဒီးဒိတီၢ်အီၤတက့ၢ်” နီၣ်လဲာ်တဘိအံၤ လဲၤတုၤဝဲ ချ့သဒံး ဒီးဒိဝဲတီၢ်ဝဲ ပှၤတဖၣ်န့ၣ်အဃိ ကိးပသူကိးပသီဝဲသီၣ်တြထုးမးလီၤ. ဖဲပှၤတဖၣ်န့ၣ်အကျါ ပှၤတဂၤ ကိးပသူထီၣ်ဝဲလၢ အကလုၢ်ဖးဒိၣ်…“ဖံဧၢ…ဖံဧၢ…နီၣ်လဲာ်ဒိပှၤတီၢ်ပှၤ ပတုာ်တကဲလၢၤဘၣ်. ယံာ်ယံာ် ပကသံခဲလၢာ်လီၤ. သးကညီၤပှၤ တက့ၢ်…ပသ့ၣ်ညါလၢ ပကမၣ်လံ…၀ံသးစူၤ ပျၢ်ကွံာ် ပတၢ်ကမၣ်ဒီး ဆိတ့ၢ်ကွံာ်နီၣ်လဲာ်လၢ အတီၢ်ပှၤ ဒီး ပျံၤလၢအစၢဃာ်ပှၤအံၤန့ၣ်တက့ၢ်.”

ဖံဘံယီၤ နၢ်ဟူတၢ်ကလုၢ် လၢ အပာ်ဖျါထီၣ် အတၢ်ပီၢ်ယၢ်လီၤသး ဒီးထံၣ်လီၤဝဲ တၢ်ကမၣ်လံ အဃိ ဖံဘံယီၤ ဟ့ၣ်ထီၣ်အကလုၢ်ကဒီး…“ ပျံၤလၢအသူအပှိၤ…နီၣ်လဲာ်လၢအသူအပှိၤသ့ၣ်ဧၢ..ဆိတ့ၢ်ကွံာ် သုတၢ်မၤတဖၣ်တက့ၢ်…ဟဲက့ၤ…ဟဲက့ၤဆူ သုလီၢ်သုကျဲတက့ၢ်.”

စံး တၢ်ဒ်န့ၣ်ဝံၤတဘျီဃီ ပျံၤတဘိဒီး နီၣ်လဲာ်တဘိဟဲက့ၤချ့သဒံးလၢ ဖံဘံယီၤ အစုလိၤန့ၣ်လိၤန့ၣ်လီၤ. ဒူဖိ သဝီဖိသ့ၣ်တဖၣ် ထွးထီၣ်ဃ့ၢ်ဝဲ တကူၣ်သ့ၣ်တုၤဒၣ်လဲာ်ကွၢ်ကဒါက့ၤ အလီၢ်ခံတဘူၣ်လၢၤဘၣ်န့ၣ်လီၤ.
တယံာ်တမီၢ်ဘၣ်ဖံဘံယီၤ တဲဘၣ်ဖိၣ်ဃဲဖိ ခံဂၤအံၤလၢ သါကဘၣ်လဲၤတၢ်ဆူညါ ခီအိၣ်ဒံးဝဲ ဒီးမၢဖိၣ်ဃဲဖိ လဲၤကျီန့ၢ် ၀ၣ်ခံဘိဒ်သိး ကတ့န့ၢ်အီၤဃီတဘိအဂီၢ်လီၤ. ဖိဃဲတ့ဃီတဘိဝံၤဖံဘံယီၤမၢအလဲၤဘိးထီၣ် ဃီလၢ သ့ၣ်တထူၣ်အလိၤန့ၣ်လီၤ. ဖံဘံယီၤ ထီၣ်ဝဲလၢဃီလိၤဝံၤထီၣ်ကဒီးဝဲဆူ သ့ၣ်တထူၣ်န့ၣ် အခံစိးဒီး ဝံၢ်၀ၢ်အစု ဆူဖိၣ်ဃဲဖိသ့ၣ်အအိၣ်ဒီး ယူၤထီၣ်ဝဲဆူတၢ်ဖးဖီဒီးဟါမၢ်ကွံာ်ဝဲန့ၣ်လီၤ.

စးထီၣ်ဖဲမုၢ်တနံၤန့ၣ် ပှၤကညီဖိသ့ၣ်တဖၣ် စူၢ်ဝဲနာ်ဝဲလၢ ဖံဘံယီၤမ့ၢ်သံၣ်ခိၣ်မုၢ်ဃါ လၢအဆိၣ်ဂ့ၤဆိၣ်ဝါ ဘုဧိၤဟုဧိၤ ဒ်ပစံးတၢ်အသိးမ့ၢ်ဝဲဘုအကစၢ်မုၣ် တဂၤန့ၣ်လီၤ. ပှၤထူစံာ်ဖိပှၤဖဲးခုးဖိ သ့ၣ်တဖၣ် ဖဲအသ့ၣ်ဘုအဆၢကတီၢ်န့ၣ် ပာ်ဒိၣ်ပာ်ထီဝဲ ဖံဘံယီၤအံၤ ဒိၣ်မးန့ၣ်လီၤ.

ပထံၣ်ဘၣ်တၢ်လီၢ်အါပူၤဖဲ တၢ်သူၣ်လီၤဖျးလီၤဘုဒီး ဘုဘိတဖၣ်ဟဲထီထီၣ် ဘူးလၢဘုတဖၣ်ကဖီထီၣ် အဆၢကတီၢ်န့ၣ်ဒီး လၢစံာ်ပူၤ မ့တမ့ၢ်ခုးပူၤ အသနၢၣ်န့ၣ် သူၣ်ထီၣ်၀ဲ ဒဲဆံးကိာ်ဖိတဖျၢၣ် ဒ်သိးဖံဘံယီၤ ကဟဲအိၣ်ဟဲဆိးဝဲ အဂီၢ်န့ၣ်လီၤ. တကးဒံးဘၣ်ဖဲဒဲဖိအပူၤ ပာ်ထီၣ်ဝဲမ့ၤနွံဒုၣ် ထံခွးဆံးကိာ်ဖိနွံခွး ဃုာ် ဒီးဖီတဖၣ်ဒီး (နီ) နံၣ်သိချံဖိြပံသ့ၣ်တဖၣ်ဝံၤ ထုကဖၣ်သၣ်ကမဲၤထီၣ်ဝဲဆူ သံၣ်ခိၣ်မုၢ်ဃါ “
ဆံဘံယီၤ” ကဟဲလီၤ အိၣ်ဝဲဆိၣ်ဝဲဖဲ ဒဲဖိအံၤအပူၤန့ၣ်လီၤ. ဒ်သိး ဘုဧိၤဟုဧိၤတဖၣ် ကသၣ်ထီၣ် အါအါဂီၢ်ဂီၢ် န့ၣ်ဒီးထုကဖၣ်သၣ်ကမဲၤထီၣ်ဝဲန့ၣ်လီၤ. လၢတၢ်န့ၣ်အဃိသတးဒီး ပထံၣ်ဘၣ်ပပှၤကညီပှၤထူစံာ်ဖိ ပှၤဖဲးခုးဖိသ့ၣ်တဖၣ် ဖဲဘုဧိၤဟုဧိၤ ဟဲဖီထီၣ် အခါတုၤဃီၤဆူ ဘုတဖၣ်ဘၣ်တၢ်တ့ၢ်နုာ်ဝဲလၢ ဘုဖီပူၤန့ၣ်စ့ၢ်ကီး ဘၣ်မၤဝဲလုၢ်လၢ်တဖၣ်လၢ အလူၤပိာ်ထွဲသးဒီး ဖံဘံယီၤန့ၣ်လီၤ.
 
(ဟံးန့ၢ်အီၤလၢ “ပှၤကညီအပူတဖၣ်” အဘ့ၣ်တၢ လၢ ပီၢ်ရီမါမၢလ့မၠးကၠီၣ်ကွဲးဝဲန့ၣ်လီၤ.)